સરફરાઝ ખાન (Sarfaraz khan) એ ડોમેસ્ટિક ક્રિકેટમાં (Cricket) ઘણા રન બનાવનાર બેટ્સમેન. છેલ્લા બે વર્ષથી લોકો એ જાણવાની રાહ જોઈ રહ્યા હતા કે સરફરાઝ આખરે ટીમ ઈન્ડિયામાં (Team India) ક્યારે એન્ટ્રી કરશે. તેને ટીમમાં સામેલ કરવામાં આવ્યો એટલું જ નહીં પરંતુ તેને પહેલા જ દિવસે બેટિંગ કરવાની તક પણ મળી. સરફરાઝ ખાન માટે આ દિવસ કદાચ હંમેશા યાદગાર રહેશે. જે દિવસે તેણે ડેબ્યૂ કર્યું તે દિવસે તેણે એક એવો રેકોર્ડ બનાવ્યો જેના વિશે કદાચ કોઈએ વિચાર્યું પણ નહીં હોય. તેણે હાર્દિક પંડ્યાની પણ બરાબરી કરી હતી.
જ્યારે કેપ્ટન રોહિત શર્મા સદી ફટકારીને આઉટ થયો ત્યારે સરફરાઝ ખાન ક્રિઝ પર આવ્યો હતો. આખી દુનિયા આ ક્ષણની રાહ જોઈ રહી હતી, જે હવે સામે હતી. સરફરાઝે પ્રથમ રન બનાવવા માટે થોડા બોલ રમ્યા હતા. તેના પહેલો રન લેતાની સાથે જ આખા સ્ટેડિયમમાં જોરદાર અવાજ આવ્યો. સરફરાઝ તેની આક્રમક બેટિંગ શૈલી માટે જાણીતો છે. પહેલા સાવધાની સાથે અને પછી તેના બેટમાંથી કેટલાક વિસ્ફોટક સ્ટ્રોક સાથે તે રમ્યો. આ રીતે સરફરાઝે પોતાના ડેબ્યૂ ટેસ્ટમાં જ રેકોર્ડ બનાવી દીધો.
સરફરાઝની બેટિંગની વાત કરીએ તો તેણે શાનદાર બેટિંગ કરી હતી. જો કે દિવસની રમત પૂરી થાય તેના થોડા સમય પહેલા જ તે રન લેવા બાબતે રવિન્દ્ર જાડેજા સાથે થયેલી ગેરસમજને કારણે રનઆઉટ થયો હતો. જાડેજા જ્યારે 99 રન પર હતો ત્યારે તે રન લેવા દોડ્યો હતો પરંતુ આ દરમિયાન બોલ નજીક હોવાથી જાડેજાએ તેના પગ પાછળ ખેંચી લીધા હતા, પરંતુ સરફરાઝ ઘણો આગળ નીકળી ગયો હતો અને તે પાછો આવ્યો ત્યાં સુધીમાં તે રનઆઉટ થઈ ગયો હતો. સરફરાઝે આઉટ થતા પહેલા 66 બોલમાં 62 રનની ઇનિંગ રમી હતી. તેણે 9 ચોગ્ગા અને એક છગ્ગો ફટકાર્યો હતો. જ્યારે તે બીજી ઇનિંગમાં બેટિંગ કરવા આવે છે ત્યારે તે કેવી રીતે રમે છે તે જોવાનું રહે છે. બાકીની ટીમ ઈન્ડિયા પાંચ વિકેટે 326 રનના વર્તમાન સ્કોરને ઓછામાં ઓછા 500થી આગળ લઈ જવાનો પ્રયાસ કરશે.
સરફરાઝ ખાન હાર્દિક પંડ્યાની બરાબરી પર પહોંચી ગયો
સરફરાઝ ખાન હવે પોતાની ડેબ્યૂ ટેસ્ટમાં સૌથી ઝડપી અડધી સદી ફટકારનાર ભારતીય ખેલાડીઓમાં સંયુક્ત બીજા સ્થાને પહોંચી ગયો છે. હાર્દિક પંડ્યાએ વર્ષ 2017માં શ્રીલંકા સામે ટેસ્ટ ડેબ્યૂ કર્યું હતું. ત્યારબાદ તેણે 48 બોલમાં પોતાના 50 રન પૂરા કર્યા. આ પછી સરફરાઝ ખાને પણ આજે ઈંગ્લેન્ડ સામે પોતાની પ્રથમ ટેસ્ટ મેચ રમતા 48 બોલમાં પોતાની અડધી સદી પૂરી કરી હતી. આ મામલે પટિયાલાનો યુવરાજ સિંહ નંબર વન પર છે. આ ભારતીય ખેલાડી યાદવેન્દ્ર સિંહ ઉર્ફે પટિયાલાનો યુવરાજ છે. જેણે ભારત માટે માત્ર એક જ ટેસ્ટ રમી છે અને તેમાં રેકોર્ડ બનાવ્યો છે.
