GANDHINAGAR : છ મનપાની ચૂંટણીમાં ભાજપ ( BHAJAP) નો કેસરિયો લહેરાયા બાદ હવે સ્થાનિક સ્વરાજયની ચૂંટણી એટલે કે 31 જિલ્લા પંચાયત, 231 તાલુકા પંચાયતો અને 81 નગરપાલિકાઓમાં યોજાયેલી ચૂંટણીમાં પણ ભાજપનો કેસરિયો લહેરાયો છે. આ રીતે ભાજપની વિજય કૂચ આગળ વધી છે. જેના પગલે હવે શહેરી અને ગ્રામીણ વિસ્તારના મતદારોએ ભાજપને સમર્થન આપતાં આગામી 2022માં યોજાનાર વિધાનસભાની ચૂંટણીમાં ભાજપને લાભ થઈ શકે તેમ છે. બીજી તરફ કોંગ્રેસનો રીતસરનો સફાયો થઈ જવા પામ્યો છે. કોંગ્રેસના બે સિનિયર નેતાઓ વિપક્ષના નેતા પરેશ ધાનાણી ( PARESH DHANANI) અને પ્રદેશ કોંગ્રેસના અધ્યક્ષ અમીત ચાવડા ( AMIT CHAVDA) એ પણ રાજીનામું આપી દીધું છે. જે હાઈકમાન્ડ દ્વ્રારા સ્વીકારી લેવામાં આવ્યું છે.
31 જિલ્લા પંચાયતો પૈકી તમામ જિલ્લા પંચાયતોમાં ભાજપનો કેસરિયો લહેરાયો છે. જયારે જિલ્લા પંચાયતોની 980 બેઠકો પૈકી 25 બેઠકો બિન હરીફ જાહેર થઈ હતી. એટલે 955 બેઠકોમાંથી ભાજપને 785 , કોંગીની 167, અપક્ષને 3, આપને 2, બસપાને 1 અને અન્યોને 4 બેઠકો મળી છે. 231 તાલુકા પંચાયતોમાં 4774 બેઠકો પૈકી 117 બેઠકો બિન હરીફ જાહેર થઈ હતી. એટલે બાકી રહેતી 4655 બેઠકોમાંથી 3322 બેઠકો ભાજપને , 1243 બેઠકો કોંગીને, અપક્ષોને 115, આપને 31, બસપાને 4 અને અન્યોને 16 બેઠકો મળી છે.
81 નગરપાલિકાની 2720 બેઠકમાંથી 95 બેઠકો બિન હરીફ જાહેર થઈ હતી. બાકી રહેતી 2625 બેઠકોમાંથી 2063 બેઠકો ભાજપને, કોંગીને 385, અપક્ષોને 172, આપને 9, બસપાને 6 અને અન્યોને 24 બેઠકો મળી છે.તમામ 31 જિલ્લા પંચાયતો ભાજપને મળી છે. જયારે 231 તાલુકા પંચાયતોમાંથી 196 પર ભાજપનો કેસરિયો લહેરાયો છે. જયારે 33 તાલુકા પંચાયતો કોંગીને મળી છે. આ ઉપરાંત 81 નગરપાલિકાઓ પૈકી ભાજપને 75 અને 4 નગરપાલિકાઓ પર કોંગીનો વિજય થયો છે.
સીએમ વિજય રૂપાણી ( CM VIJAY RUPANI) એ કહ્યું હતું કે, સ્થાનિક સ્વરાજયની ચૂંટણીમાં પ્રજાએ વિકાસને અપનાવ્યો છે. પ્રદેશ ભાજપના અધ્યક્ષ સી આર પાટીલે ( C R PATIL) કહ્યું હતું કે છ મનપાની ચૂંટણીમાં ભાજપનો કેસરિયો લહેરાયો હતો. જયારે કોંગ્રેસના સૂપડા સાફ થઈ ગયા હતા. તેવી જ રીતે સ્થાનિક સ્વરાજયની ચૂંટણીમાં પણ કોંગ્રેસ હવે નેસ્ત નાબૂદ થઈ ગઈ છે. પીએમ નરેન્દ્ર મોદી અને કેન્દ્રિય ગૃહ પ્રધાન અમીત શાહે ( AMIT SHAH) પણ રાજયના મતદારોને અભિનંદન આપ્યા હતા. ભાજપની નેતાગીરી દ્વારા ગાંધીનગરમાં કમલમ કાર્યાલયમાં વિજયોત્સવ મનાવ્યો હતો.
