સુરત શહેર અને સમગ્ર દક્ષિણ ગુજરાતમાં સતત વરસી રહેલા ભારે વરસાદને કારણે વહીવટી તંત્ર એલર્ટ મોડમાં છે. હવામાન વિભાગે આગામી દિવસોમાં પણ ભારે વરસાદની આગાહી કરતા સુરક્ષા માટે મહત્વનો નિર્ણય લેવામાં આવ્યો છે. શહેરના લોકપ્રિય પર્યટન સ્થળ એવા ડુમસ બીચ અને સુવાલી બીચ પર 7 ઓગસ્ટ સુધી પ્રવાસીઓના પ્રવેશ પર પ્રતિબંધ મૂકવામાં આવ્યો છે. સુરત શહેર પોલીસ કમિશનર દ્વારા જાહેરનામું બહાર પાડીને જણાવવામાં આવ્યું છે કે ભારે વરસાદ, દરિયામાં ઊંચા મોજાં અને તીવ્ર કરંટને ધ્યાનમાં રાખીને આ નિર્ણય લેવામાં આવ્યો છે. દરિયાકાંઠે કોઈ દુર્ઘટના કે જાનહાનિ ન થાય તે માટે ડુમસ બીચ, સુવાલી બીચ તેમજ સી-ફેઝ વિસ્તારમાં સામાન્ય લોકોના પ્રવેશ પર તાત્કાલિક અસરથી પ્રતિબંધ લાગુ કરવામાં આવ્યો છે.
આ પ્રતિબંધ હેઠળ લોકોને દરિયા કિનારે ફરવા જવાની તેમજ દરિયાના પાણીમાં ઉતરવાની સંપૂર્ણ મનાઈ રહેશે. ચોમાસા દરમિયાન દરિયામાં પાણીનો પ્રવાહ અને મોજાં અચાનક વધી જતા અકસ્માતની શક્યતા રહેતી હોવાથી તંત્ર દ્વારા આ પગલું ભરવામાં આવ્યું છે. પોલીસે નાગરિકોને અપીલ કરી છે કે તેઓ પોતાની સુરક્ષાને ધ્યાનમાં રાખીને જાહેરનામાનું પાલન કરે અને બીચ વિસ્તાર તરફ જવાનું ટાળે. ખાસ કરીને ભારે વરસાદ દરમિયાન દરિયાકાંઠે જવું જોખમી સાબિત થઈ શકે છે.
પોલીસ તંત્રએ એ પણ સ્પષ્ટ કર્યું છે કે જાહેરનામાનો ભંગ કરનાર અથવા પ્રતિબંધનો ઉલ્લંઘન કરનાર વ્યક્તિ સામે કાયદેસરની કાર્યવાહી કરવામાં આવશે. તેથી પ્રવાસીઓ અને સ્થાનિક લોકોને જરૂરી કામ સિવાય દરિયાકાંઠાના વિસ્તારમાં ન જવાની સલાહ આપવામાં આવી છે. હવામાન વિભાગની આગાહી મુજબ આગામી દિવસોમાં દક્ષિણ ગુજરાતમાં હજુ પણ ભારે વરસાદ પડી શકે છે. આવી સ્થિતિમાં નાગરિકોએ સાવચેતી રાખવી, વહીવટી તંત્રની સૂચનાઓનું પાલન કરવું અને અફવાઓથી દૂર રહેવું જરૂરી છે.
