12 નવેમ્બરના રોજ ખોરવાઈ ગયેલી માઈક્રોસોફ્ટની આઉટલુક (Outlook) અને ક્લાઉડ સેવાઓ હવે પુનઃસ્થાપિત થઈ રહી છે. કંપનીએ પુષ્ટિ કરી છે કે મોટાભાગના પ્રદેશોમાં સેવાઓ ફરી શરૂ થઈ ગઈ છે. ૨૦ કલાક સુધી ચાલેલી આ વિક્ષેપની સ્થિતિને કારણે ૭૪ દેશોમાં લાખો વ્યવસાયો પ્રભાવિત થયા છે, જેમાં લાખોનું નુકસાન થયું હોવાનો અંદાજ છે.
ઘણા પ્રદેશોમાં સેવાઓ પુનઃસ્થાપિત
માઈક્રોસોફ્ટે તેના સત્તાવાર X (અગાઉનું ટ્વિટર) એકાઉન્ટ દ્વારા જણાવ્યું છે કે પ્રભાવિત વિસ્તારોમાં સેવાઓ પુનઃસ્થાપિત કરવાના પ્રયાસો ચાલુ છે. ઉત્તર અમેરિકા, યુરોપ અને એશિયા-પેસિફિક ક્ષેત્રમાં નોંધપાત્ર સુધારો જોવા મળ્યો છે. જોકે કેટલાક વપરાશકર્તાઓને હજુ પણ ઈમેલ અથવા અન્ય સેવાઓનો ઉપયોગ કરવામાં મુશ્કેલી પડી શકે છે, કારણ કે અમુક વિસ્તારોમાં ઈમેલ ડિલિવરીની સમસ્યાઓ ઉકેલવાનું કામ હજુ પણ ચાલી રહ્યું છે. માઈક્રોસોફ્ટ ૩૬૫ એડમિન સેન્ટર (Microsoft 365 Admin Center) માટે ‘MO1550821’ નામનું એક અપડેટ જારી કરવામાં આવ્યું છે.
સંચાર વ્યવસ્થા ખોરવાઈ
માઈક્રોસોફ્ટની ક્લાઉડ સેવાઓમાં સર્જાયેલી સમસ્યાઓને કારણે વિશ્વના ઘણા દેશોમાં સંચાર વ્યવસ્થા (communication chains) ખોરવાઈ ગઈ છે, કારણ કે આ પ્રદેશોમાં મોટી સંખ્યામાં વ્યવસાયો માઈક્રોસોફ્ટના ક્લાઉડ ઈન્ફ્રાસ્ટ્રક્ચર પર નિર્ભર છે. ઓફિસ ૩૬૫ (Office 365) માં આવેલી ખામીઓને કારણે ઈમેલ દ્વારા થતો સંચાર સંપૂર્ણપણે અટકી ગયો હતો, જેમાં ફિનટેક (fintech) કંપનીઓને સૌથી વધુ અસર થઈ છે.
ઈન્ટરનેટ સેવા ટ્રેકર ‘ડાઉનડિટેક્ટર’ (Downdetector) અનુસાર, આ વિક્ષેપથી ૭૪ દેશો પ્રભાવિત થયા છે, જેમાં એશિયા (ભારત સહિત), ઓસ્ટ્રેલિયા, ન્યુઝીલેન્ડ, ઉત્તર અમેરિકા અને યુરોપના કેટલાક ભાગોનો સમાવેશ થાય છે. આ પ્રદેશોના વપરાશકર્તાઓ માઈક્રોસોફ્ટની સેવાઓનો ઉપયોગ કરી શક્યા ન હતા.
નુકસાનમાં સતત વધારો
એવો અંદાજ છે કે આ સેવા વિક્ષેપથી વૈશ્વિક સ્તરે ૪૦ લાખ (૪ મિલિયન) વ્યવસાયો પ્રભાવિત થયા છે. ટીમ મીટિંગ્સથી લઈને મહત્વપૂર્ણ સંચાર સુધીના આવશ્યક કાર્યો અટકી જવાથી, વ્યવસાયિક કામગીરી લગભગ થંભી ગઈ હતી. ‘કોઈનપીડિયા’ (CoinPedia) ના અહેવાલ મુજબ આ વૈશ્વિક વિક્ષેપને કારણે દર કલાકે લગભગ ૧,૦૦,૦૦૦ યુએસ ડોલર (જે ભારતીય રૂપિયામાં લગભગ ૯૪ લાખ થાય છે) નું નુકસાન થયું છે. આ આંકડો બદલાઈ શકે છે. હાલમાં ઘણા દેશોમાં માઈક્રોસોફ્ટની સેવાઓ પુનઃસ્થાપિત થઈ ગઈ છે અને આગામી થોડા કલાકોમાં સંપૂર્ણ સેવાઓ ફરી શરૂ થઈ જવાની અપેક્ષા છે.
