રાંચી: (Ranchi) પત્ની અલગ રહેતી હોય તો પતિ દ્વારા ભરણપોષણની કેટલી રકમ આપવી તે અંગે ઝારખંડ હાઈકોર્ટે (High Court) મોટો નિર્ણય સંભળાવ્યો છે. હાઈકોર્ટે પોતાના એક આદેશમાં કહ્યું છે કે જો કોઈ પત્ની કોઈ યોગ્ય કારણ વગર તેના પતિથી અલગ રહે છે તો તે ભરણપોષણની રકમ મેળવવા માટે હકદાર નથી. જસ્ટિસ સુભાષ ચંદની કોર્ટે રાંચીની ફેમિલી કોર્ટના એ નિર્ણયને રદ કર્યો જેમાં અમિત કુમાર કચ્છપ નામના વ્યક્તિને તેની પત્ની સંગીતા ટોપોના ભરણપોષણ માટે દર મહિને 15,000 રૂપિયા ચૂકવવાનો આદેશ આપવામાં આવ્યો હતો.
હાઈકોર્ટે કહ્યું કે બંને પક્ષો દ્વારા રજૂ કરાયેલા પુરાવાઓ જોતાં જાણવા મળ્યું કે પ્રતિવાદી કોઈ પણ કારણ વગર તેના પતિથી અલગ રહે છે. પરિણામે ફોજદારી કાર્યવાહી સંહિતા 1973ની કલમ 125 (4)ને ધ્યાનમાં રાખીને તે ભરણપોષણની કોઈપણ રકમ માટે હકદાર નથી. તમને જણાવી દઈએ કે સંગીતા ટોપોએ તેના પતિ અમિત કુમાર કચ્છપ વિરુદ્ધ કેસ દાખલ કર્યો છે. રાંચીની ફેમિલી કોર્ટમાં તેણીએ આરોપ લગાવ્યો હતો કે 2014માં આદિવાસી રીતિ-રિવાજ મુજબ લગ્ન કર્યા બાદ જ્યારે તે તેના સાસરે ગઈ ત્યારે તેઓએ કાર, ફ્રીજ અને એલઈડી ટીવી સહિત દહેજની માંગણી શરૂ કરી હતી.
કોર્ટે 15,000 રૂપિયાનું ભથ્થું નક્કી કર્યું હતું
સંગીતા ટોપ્પોએ પોતાના આરોપમાં કહ્યું કે તેનો પતિ અને તેનો પરિવાર તેના પર દહેજ માટે દબાણ કરતો હતો. તેણે કહ્યું કે તેનો પતિ નાની નાની બાબતોમાં તેની અવગણના કરતો હતો અને દારૂના નશામાં હોય ત્યારે ઘણીવાર તેની સાથે દુર્વ્યવહાર કરતો હતો. સંગીતાએ તેના પતિ પર એક મહિલા સાથે લગ્નેતર સંબંધ હોવાનો પણ આરોપ લગાવ્યો હતો અને ભરણપોષણ માટે દર મહિને 50,000 રૂપિયાનો દાવો કર્યો હતો. તેના પર ફેમિલી કોર્ટે તેની તરફેણમાં આદેશ આપ્યો હતો અને 30 ઓક્ટોબર 2017 થી દર મહિને 15,000 રૂપિયા ભરણપોષણ ભથ્થું નક્કી કર્યું અને પતિને આ રકમ ચૂકવવા જણાવ્યું હતું.
લગ્ન પછી પત્ની માત્ર એક સપ્તાહ મારી સાથે રહી
ફેમિલી કોર્ટના આ નિર્ણય સામે પતિ અમિત કુમાર કચ્છપે હાઈકોર્ટમાં ક્રિમિનલ રિવિઝન પિટિશન દાખલ કરી હતી. તેણે કહ્યું કે લગ્ન પછી તેની પત્ની એક અઠવાડિયા સુધી જમશેદપુરમાં તેના ઘરે રહી. આ પછી તે થોડા દિવસો માટે પરિવારની સેવાના નામે રાંચી ગઈ હતી. તેણીએ કહ્યું હતું કે તે 15 દિવસમાં પરત આવશે પરંતુ વારંવાર વિનંતી કરવા છતાં તે પરત આવી ન હતી.
