અમેરિકામાં મિડટર્મ ચૂંટણીમાં રિપબ્લિકન પાર્ટીની હાર બાદ રાષ્ટ્રપ્રમુખ ડોનાલ્ડ ટ્રમ્પના મંત્રીમંડળમાં ફેરફારની ચર્ચા તેજ બની છે. ખાસ કરીને સંરક્ષણ મંત્રી પીટ હેગસેથની ખુરશી જોખમમાં હોવાનું મનાઈ રહ્યું છે. ઈરાન સાથે લાંબા સમય સુધી ચાલેલા યુદ્ધને ચૂંટણીમાં પક્ષની હારનું મોટું કારણ માનવામાં આવી રહ્યું છે. રિપબ્લિકન પાર્ટીના કેટલાક નેતાઓ આ યુદ્ધ માટે હેગસેથને જવાબદાર ઠેરવી રહ્યા છે. બીજી તરફ, ડેમોક્રેટ્સે પણ તેમની સામે મહાભિયોગની કાર્યવાહી કરવાની તૈયારી શરૂ કરી છે.
મિડટર્મ ચૂંટણીમાં ડેમોક્રેટ્સે કોંગ્રેસ પર નિયંત્રણ મેળવ્યા બાદ રિપબ્લિકન પાર્ટીમાં હારનાં કારણો અંગે ચર્ચા શરૂ થઈ છે. પક્ષના કેટલાક નેતાઓનું માનવું છે કે ઈરાન સાથેના યુદ્ધ અને તેના કારણે અમેરિકામાં વધેલો જીવનનિર્વાહનો ખર્ચ મતદારોની નારાજગીનું મુખ્ય કારણ બન્યાં છે. આ નારાજગી ચૂંટણીના પરિણામોમાં જોવા મળી હોવાનું તેઓ માની રહ્યા છે.
રિપબ્લિકન નેતાઓનો આરોપ છે કે પીટ હેગસેથે ડોનાલ્ડ ટ્રમ્પને ઈરાન પર હુમલો કરવા માટે મનાવવામાં મહત્ત્વની ભૂમિકા ભજવી હતી. તેમના મતે, યુદ્ધ શરૂ કરતાં પહેલાં તેના અંત માટે કોઈ સ્પષ્ટ યોજના તૈયાર કરવામાં આવી નહોતી. યુદ્ધના સંભવિત રાજકીય પરિણામો અને તેના કારણે ઊભા થનારા પડકારોનો પણ પૂરતો અંદાજ લગાવવામાં આવ્યો નહોતો.
પક્ષના એક નેતાએ તો સ્પષ્ટ શબ્દોમાં કહ્યું કે જો ટ્રમ્પ મિડટર્મ ચૂંટણીમાં થયેલી હાર માટે કોઈને જવાબદાર ઠેરવવા માગતા હોય તો પીટ હેગસેથને જવાબદાર ગણવા જોઈએ. યુદ્ધ કેટલો સમય ચાલશે, તેના ચોક્કસ લક્ષ્યો શું હશે અને તેને કયા ઉદ્દેશ સાથે આગળ વધારવામાં આવશે, તે અંગે હેગસેથનાં અગાઉનાં નિવેદનો પણ હવે સવાલોના ઘેરામાં છે. આ સ્થિતિમાં સંરક્ષણ મંત્રી સામે પક્ષની અંદર જ અસંતોષ વધી રહ્યો છે.
ચૂંટણીમાં હાર બાદ પીટ હેગસેથને સંરક્ષણ મંત્રીના પદ પરથી દૂર કરવામાં આવશે કે નહીં તે અંગે સવાલો ઊઠ્યા હતા. જોકે, ડોનાલ્ડ ટ્રમ્પે જાહેરમાં તેમનો બચાવ કર્યો હતો. ટ્રમ્પે કહ્યું હતું કે હેગસેથ ખૂબ સારું કામ કરી રહ્યા છે. વ્હાઇટ હાઉસે પણ નિવેદન આપીને સ્પષ્ટ કર્યું હતું કે રાષ્ટ્રપ્રમુખને સંરક્ષણ મંત્રી પર સંપૂર્ણ વિશ્વાસ છે. જોકે, આ જાહેર નિવેદનો વચ્ચે હેગસેથના ભવિષ્ય અંગે આંતરિક ચર્ચાઓ ચાલી રહી હોવાનું સામે આવ્યું છે. અહેવાલો અનુસાર, ટ્રમ્પ પોતાના સલાહકારો સાથે હેગસેથને મંત્રીપદે ચાલુ રાખવા કે નહીં તે અંગે વિચારવિમર્શ કરી રહ્યા છે. આ ચર્ચાઓને કારણે મંત્રીમંડળમાં ફેરફારની અટકળોને વેગ મળ્યો છે.
હેગસેથને અન્ય રાજકીય જવાબદારી સોંપવાનો વિકલ્પ પણ ચર્ચામાં છે. તેમને ટેનેસીની સેનેટ બેઠક મળી શકે તેવી સંભાવના વ્યક્ત કરવામાં આવી રહી છે. બીજી તરફ, ફ્લોરિડાના ગવર્નર રોન ડીસેન્ટિસને સંરક્ષણ મંત્રીના સંભવિત વિકલ્પ તરીકે જોવામાં આવી રહ્યા છે. જો ટ્રમ્પ હેગસેથને પદ પરથી હટાવવાનો નિર્ણય લે છે તો તેમના સ્થાને કોને જવાબદારી સોંપવામાં આવશે તે અંગે પણ ચર્ચા શરૂ થઈ છે.
પીટ હેગસેથની મુશ્કેલીઓ માત્ર રિપબ્લિકન પાર્ટીની અંદરના અસંતોષ સુધી મર્યાદિત નથી. કેન્ટુકીના રિપબ્લિકન સાંસદ થોમસ મેસીએ તેમની સામે મહાભિયોગના આઠ આરોપો રજૂ કર્યા છે. આ આરોપોમાં કોંગ્રેસની મંજૂરી વિના ઈરાન સામે યુદ્ધ ચલાવવાનો મુદ્દો સામેલ છે. આ ઉપરાંત વેનેઝુએલાના રાષ્ટ્રપ્રમુખ નિકોલસ માદુરોની ધરપકડ બંધારણીય સત્તા વિના કરવામાં આવી હોવાનો આરોપ પણ મૂકવામાં આવ્યો છે. કેરેબિયન સમુદ્રમાં ડ્રગ્સની હેરાફેરીમાં સંડોવાયેલા હોવાની શંકા ધરાવતા લોકોને ન્યાયિક મંજૂરી વિના મારવામાં આવ્યા હોવાનો મુદ્દો પણ મહાભિયોગના આરોપોમાં સામેલ છે.
ડેમોક્રેટિક પાર્ટીના નેતા હકીમ જેફ્રીઝે પણ હેગસેથને સંરક્ષણ મંત્રીના પદ પરથી દૂર કરવાની જરૂરિયાત વ્યક્ત કરી છે. જોકે, મહાભિયોગની કાર્યવાહી દ્વારા તેમને પદ પરથી દૂર કરવું સરળ નથી. આ માટે પહેલાં હાઉસ ઓફ રિપ્રેઝન્ટેટિવ્સમાં મહાભિયોગની કાર્યવાહી આગળ વધવી પડશે અને ત્યારબાદ સેનેટમાં બે તૃતીયાંશ બહુમતી મેળવવી જરૂરી રહેશે. આ પ્રક્રિયામાં ડેમોક્રેટ્સને રિપબ્લિકન સાંસદોનું સમર્થન પણ મેળવવું પડશે. બીજી તરફ, પીટ હેગસેથે વ્હાઇટ હાઉસને જણાવ્યું છે કે તેઓ મહાભિયોગની કોઈ પણ કાર્યવાહીનો સામનો કરવા તૈયાર છે. ચૂંટણીમાં મળેલી હાર, ઈરાન યુદ્ધ અંગે પક્ષમાં વધતો અસંતોષ અને મહાભિયોગના આરોપો વચ્ચે હવે તેમનું રાજકીય ભવિષ્ય ડોનાલ્ડ ટ્રમ્પના નિર્ણય પર નિર્ભર હોવાનું મનાઈ રહ્યું છે. ટ્રમ્પ તેમને મંત્રીમંડળમાંથી દૂર કરીને હારનો જવાબદારીનો બોજ તેમના પર નાખશે કે પછી હેગસેથને પદ પર જાળવી રાખશે, તે આગામી દિવસોમાં સ્પષ્ટ થશે.
