Sports

U19 એશિયા કપ: નવમી વખત ચેમ્પિયન બનવા મેદાનમાં ઉતર્યું ભારત, પાકિસ્તાનના બે બેટ્સમેન પેવેલિયન ભેગા

ક્રિકેટ જગતના સૌથી રોમાંચક મુકાબલામાં ભારત અને પાકિસ્તાનની ટીમો ફરી એકવાર આમને-સામને ટકરાઈ રહી છે. અંડર-19 એશિયા કપની આ હાઈ-વોલ્ટેજ ફાઇનલ મેચમાં બંને ટીમો સમગ્ર ટુર્નામેન્ટ દરમિયાન શાનદાર પ્રદર્શન કરીને ખિતાબી જંગ સુધી પહોંચી છે. આ નિર્ણાયક મુકાબલામાં પાકિસ્તાને ટોસ જીતીને પ્રથમ બેટિંગ કરવાનો નિર્ણય લીધો હતો, જે અત્યાર સુધી તેમના પક્ષમાં જતો દેખાઈ રહ્યો છે. પ્રથમ બેટિંગ કરતા પાકિસ્તાની ટીમે 30 ઓવરના અંતે 2 વિકેટ ગુમાવીને 207 રનનો મજબૂત સ્કોર ઊભો કરી દીધો છે. મેચમાં હજુ 20 ઓવરની રમત બાકી હોવાથી ભારતીય બોલરો માટે આગામી ઓવરોમાં ઝડપથી વિકેટો ઝડપીને રનગતિ પર અંકુશ લગાવવો અત્યંત જરૂરી બની ગયો છે.

પાકિસ્તાનની ઇનિંગ્સની શરૂઆત ઓપનર ઉસ્માન ખાન અને હયમ ખાને કરી હતી. શરૂઆતની બે ઓવરમાં 9 રન બનાવ્યા બાદ બંને બેટ્સમેનોએ આક્રમક વલણ અપનાવ્યું હતું અને ચોથી ઓવરમાં 28 તેમજ છઠ્ઠી ઓવરમાં વિના વિકેટે 41 રન જોડી દીધા હતા. ભારતીય બોલરો પ્રથમ વિકેટ માટે સંઘર્ષ કરી રહ્યા હતા ત્યારે નવમી ઓવરમાં કાવ્યા પટેલે ભારતને પહેલી મોટી સફળતા અપાવી હતી. કાવ્યાએ 23 બોલમાં ચાર ચોગ્ગાની મદદથી 21 રન બનાવીને રમી રહેલા હયમ ખાનને પેવેલિયન ભેગો કર્યો હતો, ત્યારે પાકિસ્તાનનો સ્કોર 62 રન હતો. જોકે, પહેલી વિકેટ પડ્યા બાદ પણ પાકિસ્તાનની રનગતિ ધીમી પડી ન હતી અને 12મી ઓવરમાં જ ટીમે 100 રનનો આંકડો પાર કરી લીધો હતો.

એક છેડો સાચવીને રમી રહેલા ઓપનર ઉસ્માન ખાને શાનદાર બેટિંગનું પ્રદર્શન કરતા 46 બોલમાં સાત ચોગ્ગા અને એક છગ્ગાની મદદથી ટુર્નામેન્ટમાં પોતાની ત્રીજી અડધી સદી પૂરી કરી હતી. બીજી તરફ, મેદાન પર આવેલા અબ્દુલ કાદિરે આવતાની સાથે જ ભારતીય બોલરો પર પ્રહાર કરવાનું શરૂ કર્યું હતું. તેણે શરૂઆતમાં માત્ર 12 બોલમાં 28 રન ફટકારી દીધા હતા અને ત્યારબાદ 39 બોલમાં ત્રણ ચોગ્ગા અને ચાર છગ્ગા સાથે પોતાની ફિફ્ટી પૂરી કરી હતી. 20 ઓવરના અંતે પાકિસ્તાને 1 વિકેટે 138 રન અને 24 ઓવરમાં 186 રન બનાવીને મેચ પર મજબૂત પકડ બનાવી લીધી હતી. અંતે, અર્જુન રાજપૂતે અબ્દુલ કાદિરને આઉટ કરીને ભારતને બીજી મોટી સફળતા અપાવી હતી. કાદિરે આઉટ થતા પહેલા 54 બોલમાં ત્રણ ચોગ્ગા અને આઠ ગગનચુંબી છગ્ગાની મદદથી 80 રનની વિસ્ફોટક ઇનિંગ રમી હતી. તેના આઉટ થયા બાદ પાકિસ્તાને 200 રનનો આંકડો પાર કર્યો હતો.

આ મહત્વપૂર્ણ ફાઇનલ મેચ પહેલા ભારતીય ટીમને એક મોટો ઝટકો લાગ્યો હતો. ટીમના મુખ્ય અને વિકેટ ઝડપવાની ક્ષમતા ધરાવતા બોલર ઈશાન સૂદ કમરના દુખાવાના કારણે આજના મુકાબલામાં રમી શક્યા નથી, જેની ગેરહાજરી ભારતીય બોલિંગ આક્રમણમાં સ્પષ્ટપણે વર્તાઈ રહી છે. આજના મુકાબલામાં ભારતની પ્લેઈંગ ઈલેવનમાં કેપ્ટન લક્ષ્ય રાયચંદાની, આર્યવીર સેહવાગ, વીકે વિનીત, યશવર્ધન ચૌહાણ, અર્જુન રજત, વિકેટકીપર અન્વય દ્રવિડ, મનલ ચૌહાણ, મોહિત ઉલવા, આર્યન સવસાણી, કાવ્યા પરેશ પટેલ અને સી. વેંકટનો સમાવેશ કરવામાં આવ્યો છે. બેટિંગમાં સૌની નજર ખાસ કરીને આર્યવીર સેહવાગ અને અન્વય દ્રવિડ પર ટકેલી છે. સેહવાગે આ ટુર્નામેન્ટમાં અગાઉ અણનમ 70, 160 અને 51 રનની શાનદાર ઇનિંગ્સ રમી છે. પાકિસ્તાન સામેની ગત મેચમાં તે નિષ્ફળ રહ્યો હોવાથી આજે તેની પાસે મોટી ઇનિંગ રમીને હિસાબ બરાબર કરવાની તક છે.

ઐતિહાસિક દ્રષ્ટિએ જોઈએ તો ભારતીય ટીમ રેકોર્ડ નવમી વખત અંડર-19 એશિયા કપનો ખિતાબ જીતવાના લક્ષ્ય સાથે મેદાનમાં ઉતરી છે. છેલ્લી ત્રણ આવૃત્તિઓમાં ટ્રોફી જીતવામાં નિષ્ફળ રહેલી ભારતીય ટીમ આ વખતે ખિતાબનો દુકાળ સમાપ્ત કરવા મક્કમ છે, જ્યારે પાકિસ્તાન ત્રીજી વખત ચેમ્પિયન બનવાનું સ્વપ્ન જોઈ રહ્યું છે. આ ફાઇનલ ભારત માટે બદલો લેવાનો પણ અવસર છે, કારણ કે દુબઈમાં રમાયેલી ગત આવૃત્તિની ફાઇનલમાં સમીર મિન્હાસના 172 રન અને અલી રઝાની ચાર વિકેટના સહારે પાકિસ્તાને ભારતને 191 રનથી કારમી હાર આપી હતી. આ ઉપરાંત, વર્તમાન ટુર્નામેન્ટના ગ્રુપ સ્ટેજમાં પણ પાકિસ્તાને ભારતને ત્રણ વિકેટથી હરાવ્યું હતું, જેમાં 209 રનના લક્ષ્ય સામે 61 રનમાં પાંચ વિકેટ ગુમાવ્યા બાદ હમઝા ઝહૂરની અણનમ સદીએ પાકિસ્તાનને જીત અપાવી હતી. ટુર્નામેન્ટમાં ભારતની આ એકમાત્ર હાર હતી, તેથી આજની ફાઇનલ જીતીને ભારત પાસે તમામ જૂના હિસાબ ચૂકતે કરવાની સુવર્ણ તક છે.

Most Popular

To Top