ભારતે ગોલ ખાતે રમાયેલી પહેલી ટેસ્ટમાં શ્રીલંકાને 165 રનથી હરાવ્યું, બે મેચની શ્રેણીમાં 1-0ની લીડ મેળવી છે. આ ભારતની 600મી ટેસ્ટ મેચ હતી. ભારતની જીતનો હીરો 24 વર્ષીય ડાબોડી સ્પિનર માનવ સુથાર હતો તેણે મેચમાં 10 વિકેટ લીધી, જેમાં શ્રીલંકાના બીજા દાવમાં છ વિકેટનો સમાવેશ થાય છે. દેવદત્ત પડિકલને પ્લેયર ઓફ ધ મેચ જાહેર કરવામાં આવ્યો, તેણે પ્રથમ દાવમાં 167 અને બીજા દાવમાં 44 મળી કુલ 211 રન બનાવ્યા.
બુધવારે મેચના પાંચમા દિવસે શ્રીલંકાએ તેમના બીજા દાવ દરમિયાન 75 ઓવરમાં 6 વિકેટ ગુમાવીને 199 રન બનાવ્યા હતા. સુથારે આગામી ઓવરમાં જ સોનલ દિનુષા, પ્રભથ જયસૂર્યા અને લાહિરુ કુમારાને આઉટ કરીને ભારતની જીત પર મહોર લગાવી દીધી. શ્રીલંકાનો સ્કોર 9 વિકેટે 199 રન થઈ ગયો. ત્યારબાદ સુથારે તેની પછીની ઓવરમાં કેશરા નુવંતાને આઉટ કરીને શ્રીલંકાની ઇનિંગ્સને સમેટી લીધી.
વર્લ્ડ ટેસ્ટ ચેમ્પિયનશિપમાં ભારત 5મા સ્થાને
ગોલ ટેસ્ટમાં વિજય બાદ ભારત 53.33% ના પોઈન્ટ ટકાવારી સાથે WTC પોઈન્ટ ટેબલ પર પાંચમા સ્થાને છે. 10 ટેસ્ટમાં ભારતનો રેકોર્ડ 5 જીત, 4 હાર અને 1 ડ્રો છે, જેમાં કુલ 64 પોઈન્ટ છે. ભારત પાસે નવ ટેસ્ટ બાકી છે. શ્રીલંકા સામે એક, ન્યુઝીલેન્ડ સામે બે અને ઓસ્ટ્રેલિયા સામે પાંચ જે મહત્તમ 108 પોઈન્ટ ઉમેરવાની તક આપે છે. WTCમાં જીત 12 પોઈન્ટ આપે છે.
પડિક્કલની પ્રથમ ઇનિંગ્સમાં સદી
ભારતે ટોસ જીતીને પ્રથમ બેટિંગ કરવાનો નિર્ણય લીધો હતો. ત્રીજા નંબરે બેટિંગ કરતા દેવદત્ત પડિકલે 230 બોલમાં 167 રન બનાવ્યા. તેમની ઇનિંગમાં 15 ચોગ્ગા અને એક છગ્ગાનો સમાવેશ થતો હતો. તેમણે કેએલ રાહુલ સાથે 162 રનની ભાગીદારી કરી. કેએલ રાહુલે 82, ધ્રુવ જુરેલે 51 અને ઋષભ પંતે 39 રન બનાવ્યા. ભારતે 462 રન બનાવ્યા. શ્રીલંકા તરફથી પ્રભત જયસૂર્યાએ 4 વિકેટ અને કેશરા નુવંતાએ 3 વિકેટ લીધી હતી.
શ્રીલંકા તરફથી પ્રથમ ઇનિંગમાં સોનલ દિનુષાએ 168 બોલમાં 100 રન બનાવ્યા. નિરોશન ડિકવેલાએ 80 રનની ઇનિંગ રમી. ભારત તરફથી માનવ સુથારે 4 વિકેટ અને રવિન્દ્ર જાડેજાએ 3 વિકેટ લીધી. શ્રીલંકા પોતાની પ્રથમ ઇનિંગમાં 284 રન બનાવી શક્યું. ભારતનો બીજો ઇનિંગ 193 રનમાં સમેટાઈ ગયો. ઋષભ પંતે 69 બોલમાં 8 ચોગ્ગા અને 2 છગ્ગાની મદદથી 66 રન બનાવ્યા. પંત ઉપરાંત કેએલ રાહુલે 35 રન અને પડિકલે 44 રન બનાવ્યા. શ્રીલંકા તરફથી, અસિતા ફર્નાન્ડોએ 4, પ્રભત જયસૂર્યાએ 3 અને લાહિરુ કુમારાએ 2 વિકેટ લીધી.
શ્રીલંકાનો બીજો દાવ 77.4 ઓવરમાં 206 રન પર સમાપ્ત થયો. માનવ સુથારે કેશરા નુવંતાને બોલ્ડ કરીને શ્રીલંકાની ઇનિંગને સમેટી લીધી અને મેચમાં 10 વિકેટ પૂર્ણ કરી. સુથારે શ્રીલંકાના બીજા દાવની 75મી ઓવરમાં 3 વિકેટ લઈને મેચ ભારતના પક્ષમાં ફેરવી દીધી. તેણે પહેલા સોનલ દિનુષાને 84 રન પર આઉટ કર્યો ત્યારબાદ સુથારે પહેલા જ બોલ પર પ્રબથ જયસૂર્યાને બોલ્ડ કર્યો અને આગામી બોલ પર લાહિરુ કુમારાને વિકેટકીપર ઋષભ પંત દ્વારા કેચ કરાવ્યો. આ સુથારનો સતત ટેસ્ટ મેચમાં બીજો પાંચ વિકેટનો રેકોર્ડ છે.
