સુરતની વીર નર્મદ દક્ષિણ ગુજરાત યુનિવર્સિટી (VNSGU) સંલગ્ન સમરસ હોસ્ટેલમાં વિદ્યાર્થીનીઓને મળતી સુવિધાઓને લઈને ફરી એકવાર સવાલો ઊભા થયા છે. ગર્લ્સ સમરસ હોસ્ટેલમાં પાણી, ભોજન અને અન્ય મૂળભૂત વ્યવસ્થાઓ અંગે લાંબા સમયથી મુશ્કેલીઓ હોવાનો આક્ષેપ કરીને વિદ્યાર્થીનીઓએ ભારે વિરોધ નોંધાવ્યો હતો. વારંવાર રજૂઆતો કરવા છતાં સમસ્યાઓનું નિરાકરણ ન આવતા અંતે વિદ્યાર્થીનીઓએ ધરણાં પર બેસીને તંત્ર સામે પોતાનો રોષ વ્યક્ત કર્યો હતો.વિદ્યાર્થીનીઓએ વિરોધના અનોખા સ્વરૂપ તરીકે જમવાની થાળીઓ વગાડી હોસ્ટેલ તંત્ર સામે આક્રોશ વ્યક્ત કર્યો હતો. આ દરમિયાન મોટી સંખ્યામાં વિદ્યાર્થીનીઓ એકત્ર થઈ હતી અને પોતાની વિવિધ સમસ્યાઓના તાત્કાલિક ઉકેલની માંગ કરી હતી.
વારંવાર ફરિયાદ છતાં ઉકેલ નહીં આવ્યાનો આક્ષેપ: વિદ્યાર્થીનીઓના જણાવ્યા મુજબ, હોસ્ટેલમાં પાણી અને ભોજન સહિતની અનેક સમસ્યાઓ અંગે તેઓ અગાઉ પણ અનેક વખત વોર્ડન અને સંબંધિત તંત્રને જાણ કરી ચૂક્યા હતા. તેમ છતાં ફરિયાદોનું યોગ્ય રીતે નિરાકરણ કરવામાં ન આવતું હોવાનો આક્ષેપ કરવામાં આવ્યો છે.વિદ્યાર્થીનીઓએ વોર્ડનના વર્તન અંગે પણ ગંભીર આક્ષેપો કર્યા હતા. ફરિયાદ રજૂ કરતી વખતે માનસિક રીતે હેરાન કરવામાં આવતા હોવાનો તેમજ કેટલીક વખત અપશબ્દો બોલવામાં આવતા હોવાનો દાવો વિદ્યાર્થીનીઓએ કર્યો હતો. જોકે, આ આક્ષેપો અંગે સત્તાવાર પક્ષની પ્રતિક્રિયા સામે આવી નથી.
ભોજનની ગુણવત્તા સામે પણ સવાલ: હોસ્ટેલમાં આપવામાં આવતા ભોજનની ગુણવત્તાને લઈને પણ વિદ્યાર્થીનીઓમાં ભારે નારાજગી જોવા મળી હતી. વિદ્યાર્થીનીઓનો આક્ષેપ છે કે ઘણી વખત ભોજન યોગ્ય ગુણવત્તાનું હોતું નથી. થાળીમાં ધૂળ કે ગંદકી જેવી સ્થિતિ જોવા મળતી હોવાનો પણ દાવો કરવામાં આવ્યો હતો.વિદ્યાર્થીનીઓનું કહેવું છે કે હોસ્ટેલમાં રહેતા વિદ્યાર્થીઓ માટે ભોજન અને પાણી જેવી મૂળભૂત સુવિધાઓ અત્યંત મહત્વની છે. તેમ છતાં લાંબા સમયથી સમસ્યાઓ યથાવત રહેતા તેમની મુશ્કેલીઓ વધી રહી હતી.
થાળીઓના અવાજથી ગુંજી ઊઠ્યું હોસ્ટેલ: ફરિયાદોનો ઉકેલ ન આવતા વિદ્યાર્થીનીઓએ સામૂહિક રીતે વિરોધ શરૂ કર્યો હતો. થાળીઓ વગાડી સૂત્રોચ્ચાર સાથે પોતાનો રોષ વ્યક્ત કરવામાં આવ્યો હતો. સ્થિતિ વધુ ઉગ્ર બનતા હોસ્ટેલના ગેટને તાળું મારવામાં આવ્યું હોવાનું પણ જાણવા મળ્યું છે.વિદ્યાર્થીનીઓના વિરોધની જાણ થતાં પોલીસ પણ ઘટનાસ્થળે પહોંચી હતી. જોકે, ગેટ બંધ હોવાના કારણે પોલીસને શરૂઆતમાં અંદર પ્રવેશવામાં મુશ્કેલી પડી હતી. ત્યારબાદ પોલીસે ગેટ કૂદીને હોસ્ટેલ પરિસરમાં પ્રવેશ કર્યો હોવાનું સામે આવ્યું છે.
પોલીસની સમજાવટ બાદ પણ વિદ્યાર્થીનીઓની માંગ યથાવત: પોલીસે વિદ્યાર્થીનીઓ સાથે વાતચીત કરીને સ્થિતિ સામાન્ય બનાવવાનો પ્રયાસ કર્યો હતો. અધિકારીઓએ વિદ્યાર્થીનીઓને સમજાવીને ધરણાં સમાપ્ત કરવા માટે અપીલ કરી હતી. પરંતુ વિદ્યાર્થીનીઓએ સ્પષ્ટપણે જણાવ્યું હતું કે તેઓ અગાઉ પણ અનેક વખત ફરિયાદ કરી ચૂક્યા છે અને હવે માત્ર આશ્વાસન નહીં પરંતુ સમસ્યાઓના કાયમી ઉકેલની જરૂર છે.આ સમગ્ર મામલે વિદ્યાર્થી પરિષદ દ્વારા પણ વિદ્યાર્થીનીઓના પ્રશ્નોને સમર્થન આપવામાં આવ્યું હતું. જેના કારણે મામલો વધુ ચર્ચામાં આવ્યો હતો.
લેખિત બાંહેધરી બાદ વિરોધમાં રાહત: વિદ્યાર્થીનીઓના વિરોધ બાદ મામલો ગંભીર બનતા હોસ્ટેલના ડેપ્યુટી ડિરેક્ટર દ્વારા સમસ્યાઓના નિરાકરણ અંગે લેખિત બાંહેધરી આપવામાં આવી હોવાનું જાણવા મળે છે. લેખિત ખાતરી મળ્યા બાદ વિદ્યાર્થીનીઓના વિરોધમાં રાહત જોવા મળી હતી અને સ્થિતિ ધીમે ધીમે સામાન્ય બની હતી.ઉલ્લેખનીય છે કે અગાઉ બોય્ઝ સમરસ હોસ્ટેલમાં પણ વિવિધ સુવિધાઓને લઈને વિદ્યાર્થીઓ દ્વારા વિરોધ નોંધાવવામાં આવ્યો હતો. હવે ગર્લ્સ હોસ્ટેલમાં પણ સમાન પ્રકારની ફરિયાદો સામે આવતા સમરસ હોસ્ટેલની સમગ્ર વ્યવસ્થા સામે સવાલો ઊભા થયા છે.હવે સૌથી મોટો પ્રશ્ન એ છે કે વિદ્યાર્થીનીઓને આપવામાં આવેલી લેખિત બાંહેધરીનો વાસ્તવમાં કેટલો અમલ થાય છે? પાણી, ભોજન અને અન્ય સુવિધાઓની સમસ્યાઓનો કાયમી ઉકેલ આવે છે કે નહીં, તેના પર સૌની નજર રહેશે.
