સુરત શહેર અને જિલ્લામાં અતિભારે વરસાદ અને તેજ પવનની આગાહીને ધ્યાનમાં રાખીને સમગ્ર વહીવટી તંત્ર હાઈ એલર્ટ પર મૂકવામાં આવ્યું છે. કોઈપણ પ્રકારની આપત્તિજનક પરિસ્થિતિને પહોંચી વળવા માટે તંત્રે તમામ તૈયારીઓ પૂર્ણ કરી દીધી છે. રાહત અને બચાવ કામગીરીને વધુ અસરકારક બનાવવા માટે પહેલેથી જ NDRF અને SDRFની ટીમો તૈનાત કરવામાં આવી છે. હવે સ્થિતિને વધુ મજબૂત રીતે સંભાળવા માટે ભારતીય આર્મીની બે વિશેષ ટુકડીઓ પણ સુરત મોકલવાનો નિર્ણય લેવામાં આવ્યો છે.
જિલ્લા આપત્તિ વ્યવસ્થાપન તંત્રના જણાવ્યા મુજબ હાલ સુરતમાં એક NDRF અને ત્રણ SDRF ટીમો કાર્યરત છે. આગામી કલાકોમાં આર્મીની બે ટુકડીઓ પણ પહોંચશે, જેથી જરૂર પડ્યે તાત્કાલિક રાહત અને બચાવ કામગીરી હાથ ધરી શકાય. હવામાન વિભાગની આગાહીને ધ્યાનમાં રાખીને તમામ વિભાગોને સતત સતર્ક રહેવા સૂચના આપવામાં આવી છે. તંત્ર દ્વારા જિલ્લાના તમામ નદીઓ, ખાડીઓ, તળાવો અને જળાશયોના જળસ્તર પર 24 કલાક સતત નજર રાખવામાં આવી રહી છે. પાણીનું સ્તર વધે અથવા પૂર જેવી સ્થિતિ સર્જાય તો તરત જ જરૂરી પગલાં લેવામાં આવે તે માટે સતત મોનિટરિંગ કરવામાં આવી રહ્યું છે. સંવેદનશીલ વિસ્તારોમાં અધિકારીઓને ખાસ જવાબદારી સોંપવામાં આવી છે.
અધિકારીઓએ જણાવ્યું કે 31 જુલાઈની સવારે 8 વાગ્યા સુધી જિલ્લામાં ક્યાંય પૂર જેવી ગંભીર સ્થિતિ સર્જાઈ નથી. તેમ છતાં ભૂતકાળમાં પાણી ભરાવાની સમસ્યા સર્જાઈ હોય તેવા તમામ નીચાણવાળા વિસ્તારોની ઓળખ કરી લેવામાં આવી છે અને ત્યાં રહેતા લોકોને સાવચેતીના ભાગરૂપે સલામત સ્થળે ખસેડવાની કામગીરી શરૂ કરવામાં આવી છે. તંત્રનું કહેવું છે કે જો આગામી કલાકોમાં ભારે વરસાદના કારણે કોઈ વિસ્તારમાં પાણી ભરાવાની સ્થિતિ સર્જાશે તો લોકોને તાત્કાલિક સ્થળાંતર કરાવવામાં આવશે. બચાવ ટીમો, વાહનો અને જરૂરી સાધનો પણ તૈયાર રાખવામાં આવ્યા છે જેથી જરૂર પડ્યે તરત કાર્યવાહી કરી શકાય.
નાગરિકોને પણ બિનજરૂરી રીતે ઘરની બહાર ન નીકળવા અને વહીવટી તંત્રની સૂચનાઓનું પાલન કરવા અપીલ કરવામાં આવી છે. કોઈપણ કટોકટીની સ્થિતિમાં મદદ માટે જિલ્લા ઇમરજન્સી ઓપરેશન સેન્ટરનો હેલ્પલાઈન નંબર 1077 ચોવીસે કલાક કાર્યરત રાખવામાં આવ્યો છે. ઉપરાંત પોલીસ, ફાયર બ્રિગેડ, એમ્બ્યુલન્સ અને અન્ય તાત્કાલિક સેવાઓ માટે 112 નંબર પર સંપર્ક કરવાની અપીલ કરવામાં આવી છે. વહીવટી તંત્રે લોકોને અફવાઓથી દૂર રહેવા, માત્ર સત્તાવાર માહિતી પર વિશ્વાસ રાખવા અને જરૂરિયાત સિવાય વરસાદ દરમિયાન મુસાફરી ટાળવાની પણ સલાહ આપી છે.
