મુંબઈ(Mumbai): બોલિવુડમાંથી (Bollywood) એક ખૂબ જ દુઃખદ સમાચાર સામે આવ્યા છે. હિન્દી સિનેમાના જાણીતા નિર્માતા રાજકુમાર કોહલીનું નિધન (RajkumarKohliDied) થયું છે. તેઓ 93 વર્ષના હતા. શુક્રવારે સવારે તેમને હાર્ટ એટેક (HeartAttack) આવ્યો હતો, જેમાંથી તેઓ બચી શક્યા ન હતા.
હિન્દી સિનેમામાં, રાજકુમાર કોહલી નાગિન, જાની દુશ્મન, નૌકર બીવી કા, બદલે કી આગ, મુકાબલા અને રાજ તિલક જેવી ઘણી મહાન ફિલ્મો બનાવવા માટે જાણીતા છે. ઈન્ડસ્ટ્રીમાં તેમણે ધર્મેન્દ્ર, જીતેન્દ્ર, શત્રુઘ્ન સિંહા, અનિતા રાજ અને સુનીલ દત્ત જેવા ઘણા મોટા કલાકારો સાથે કામ કર્યું હતું. જોકે, રાજકુમાર કોહલીને તેમની વાસ્તવિક ઓળખ ફિલ્મ જાની દુશ્મનથી મળી હતી. મલ્ટી-સ્ટારર ફિલ્મ 1979 માં રિલીઝ થઈ હતી, જે ભારતની પ્રથમ હોરર ફિલ્મ હતી, જેણે થિયેટરોમાં હલચલ મચાવી હતી.
રાજકુમાર કોહલીએ પંજાબી સ્ટાર નિશી સાથે લગ્ન કર્યા હતા. નિશીએ તેની સાથે 1963માં આવેલી ફિલ્મ પિંડ દી કુડીમાં કામ કર્યું હતું. ફિલ્મના સેટ પર જ તેમનો પ્રેમ થયો અને પછી તેઓએ લગ્ન અને એક થવાનું નક્કી કર્યું. લગ્ન પછી બંનેને બે પુત્રો થયા, જેમનું નામ અરમાન અને રજનીશ કોહલી રાખ્યું.
રાજકુમાર કોહલીનો પુત્ર અરમાન કોહલી એક્ટર છે. તેમણે અરમાનને ફિલ્મ જાની દુશ્મનથી ઈન્ડસ્ટ્રીમાં લોન્ચ કર્યો હતો. જાની દુશ્મન હિટ રહી હતી, પરંતુ તેનાથી અરમાનની કારકિર્દીને વધુ ફાયદો થયો ન હતો. 2002 માં, તેમણે તેમના પુત્ર સાથે બીજી ફિલ્મ બનાવી હતી, જેનું નામ હતું એક અનોખી કહાની. આ ફિલ્મ પણ કંઈ ખાસ ચાલી નહોતી.
જ્યારે અરમાન કોહલીને હિન્દી સિનેમામાં ઓળખ ન મળી ત્યારે તેણે સલમાન ખાનના શો બિગ બોસમાં જવાનું નક્કી કર્યું. અરમાન બિગ બોસ સીઝન 7 નો ભાગ હતો. આ શોમાં તે તનિષા મુખર્જી સાથેના સંબંધોને લઈને ઘણી ચર્ચામાં રહ્યો હતો. અરમાન કોહલી તેના પિતાની ખૂબ નજીક હતો. તે ઘણીવાર તેના પિતા સાથે સમય વિતાવતો જોવા મળ્યો હતો. અનેક ઈન્ટરવ્યુમાં તેણે પોતાના પિતાને પણ પોતાની તાકાત ગણાવી હતી. હવે રાજકુમાર કોહલીના નિધનથી તેના પરિવાર અને પ્રિયજનોને મોટો આઘાત લાગ્યો છે
