મુંબઈની વૈશ્વિક સ્તરે જાણીતી અને ઐતિહાસિક તાજ મહલ પેલેસ હોટલને બોમ્બથી ઉડાવી દેવાની એક સનસનાટીભરી ધમકી મળતાં રવિવારે મધ્યરાત્રિએ સુરક્ષા એજન્સીઓ અને પોલીસ તંત્ર દોડતું થઈ ગયું હતું. રાત્રે 12:13 વાગ્યે એક અજાણ્યા શખ્સે નવી મુંબઈ પોલીસ કંટ્રોલ રૂમને ફોન કરીને કહ્યું કે, “દાઉદે તાજ હોટલમાં બોમ્બ રાખ્યો છે.” આ ગંભીર ઇનપુટ મળતાં જ નવી મુંબઈ પોલીસે તાત્કાલિક મુંબઈ મેઈન કંટ્રોલ રૂમને જાણ કરી હતી, જેના પગલે એજન્સીઓ યુદ્ધના ધોરણે એક્શનમાં આવી ગઈ હતી.
મધ્યરાત્રિએ સર્ચ ઓપરેશન અને ઇમરજન્સી ચેકિંગ
ધમકીભર્યા ફોનની માહિતી મળતા જ કોલાબા પોલીસ સ્ટેશનનો કાફલો, ક્રાઈમ સીન ઇન્વેસ્ટિગેશન ટીમ અને બોમ્બ ડિટેક્શન એન્ડ ડિસ્પોઝલ સ્ક્વોડની ટીમો અત્યાધુનિક સાધનો અને સ્નિફર ડોગ્સ સાથે તાત્કાલિક તાજ હોટલ પહોંચી ગઈ હતી. સુરક્ષા ટીમો દ્વારા હોટલની મેઈન લોબી, સ્વિમિંગ પૂલ એરિયા, અલગ-અલગ બેન્ક્વેટ હોલ, રેસ્ટોરન્ટ્સ, પાર્કિંગ ઝોન, હોટલના બહારના વિસ્તારો અને અન્ય અતિ સંવેદનશીલ સ્થળો પર સઘન સર્ચ ઓપરેશન હાથ ધરવામાં આવ્યું હતું. કલાકો સુધી ચાલેલી આ ઇમરજન્સી તપાસ અને કડક ઇન્સ્પેક્શનના અંતે હોટલ પરિસરમાંથી કોઈ જ શંકાસ્પદ સામગ્રી, બોમ્બ કે વિસ્ફોટક મળી આવ્યા ન હતા, જેનાથી પ્રશાસને રાહતનો શ્વાસ લીધો છે.
નવી મુંબઈના તુર્ભે વિસ્તારમાંથી આવ્યો હતો ફોન
મુંબઈ પોલીસની ટેકનિકલ સેલ અને સાયબર ટીમે જ્યારે ધમકીભર્યા કોલનું લોકેશન ટ્રેસ કર્યું, ત્યારે જાણવા મળ્યું કે આ કોલ નવી મુંબઈના ‘તુર્ભે’વિસ્તારમાંથી કરવામાં આવ્યો હતો. પોલીસે તે મોબાઈલ નંબરના આધારે શંકાસ્પદ આરોપીનું ચોક્કસ સરનામું શોધવા માટે તુર્ભે પોલીસ સ્ટેશનની મદદથી સર્ચ ઓપરેશન શરૂ કરી દીધું છે અને ટૂંક સમયમાં જ તેની ધરપકડ કરવામાં આવે તેવી શક્યતા છે.
સુરક્ષા વ્યવસ્થા ચાંપતી કરાઈ
આ ઘટના બાદ તાજ હોટલ અને તેની આસપાસના ગેટવે ઓફ ઇન્ડિયા જેવા વિસ્તારોમાં સુરક્ષા એજન્સીઓને હાઈ એલર્ટ મોડ પર રાખવામાં આવી છે. હોટલની બહાર અને અંદર વધારાનો પોલીસ બંદોબસ્ત તૈનાત કરી દેવામાં આવ્યો છે અને ત્યાં આવતા-જતા લોકો તેમજ શંકાસ્પદ હલચલ પર ઝીણવટભરી નજર રાખવામાં આવી રહી છે.
ઉલ્લેખનીય છે કે, થોડા મહિનાઓ પહેલાં પણ તાજ હોટલના સ્ટાફને આ પ્રકારનો જ એક ફેક ધમકીભર્યો કોલ આવ્યો હતો. હાલ પૂરતી હોટલ સુરક્ષિત છે, પરંતુ પોલીસ આ સમગ્ર મામલાને અત્યંત ગંભીરતાથી લઈને તપાસ આગળ ધપાવી રહી છે.
