કેન્દ્ર સરકારે ભારતને વૈશ્વિક રફ ડાયમંડ ટ્રેડિંગ હબ બનાવવાના મહત્વાકાંક્ષી પગલાં હેઠળ વિદેશી ડાયમંડ ટ્રેડિંગ કંપનીઓને મોટી કર રાહત આપવાનો પ્રસ્તાવ મૂક્યો છે. લોકસભામાં રજૂ થયેલા Taxation and Other Laws (Amendment) Bill, 2026માં સ્પેશિયલ નોટિફાઇડ ઝોન (SNZ) મારફતે રફ ડાયમંડનું ટ્રેડિંગ કરતી પાત્ર વિદેશી કંપનીઓને 15 વર્ષ સુધી ઇન્કમ ટેક્સમાંથી મુક્તિ આપવાની જોગવાઈ કરવામાં આવી છે.
સુરતના હીરા ઉદ્યોગને શું મળશે ફાયદો?
આ પ્રસ્તાવનો સૌથી મોટો લાભ સુરતના હીરા ઉદ્યોગને મળી શકે છે. હાલમાં વિશ્વના લગભગ 90% રફ હીરાનું કટિંગ અને પોલિશિંગ સુરતમાં થાય છે, પરંતુ રફ હીરાના આંતરરાષ્ટ્રીય વેપારનો મોટો હિસ્સો દુબઈ અને એન્ટવર્પ જેવા કેન્દ્રોમાં થાય છે. સરકારનું માનવું છે કે ટેક્સ છૂટ મળવાથી વિદેશી માઇનિંગ અને ટ્રેડિંગ કંપનીઓ સીધું ભારત આવવા પ્રોત્સાહિત થશે.
શું છે સરકારનો પ્રસ્તાવ?
- સ્પેશિયલ નોટિફાઇડ ઝોન (SNZ)માં ટ્રેડિંગ કરતી પાત્ર વિદેશી કંપનીઓને 15 વર્ષ સુધી ઇન્કમ ટેક્સમાં છૂટ મળશે.
- ભારતને વૈશ્વિક રફ ડાયમંડ ટ્રેડિંગ હબ તરીકે વિકસાવવાનો પ્રયાસ થશે.
- વિદેશી કંપનીઓ સીધું ભારતમાં રફ હીરાનું વેચાણ કરી શકશે.
- હીરાના વેપારમાં પારદર્શિતા અને સ્પર્ધાત્મકતા વધશે.
સુરતના વેપારીઓને કેમ મહત્વનું?
અત્યાર સુધી ટેક્સ અને અન્ય નિયમોને કારણે અનેક આંતરરાષ્ટ્રીય ડાયમંડ કંપનીઓ ભારતને બદલે દુબઈ અથવા અન્ય દેશોમાંથી ટ્રેડિંગ કરતી હતી.
- સુરતમાં રફ હીરાની ઉપલબ્ધતા વધવાની શક્યતા છે.
- આયાત અને ટ્રેડિંગનો ખર્ચ ઘટી શકે છે.
- MSME ડાયમંડ યુનિટ્સને કાચો માલ સરળતાથી મળી શકે છે.
- રોજગાર અને નિકાસને પ્રોત્સાહન મળી શકે છે.
હજુ કાયદો બનવાનો બાકી
હાલ આ જોગવાઈ Taxation and Other Laws (Amendment) Bill, 2026નો ભાગ છે. બિલને સંસદની મંજૂરી અને જરૂરી પ્રક્રિયા પૂર્ણ થયા બાદ જ આ ટેક્સ છૂટ અમલમાં આવશે.
