મુંબઈ: અક્ષય કુમારનો સમય સારો નથી ચાલી રહ્યો. છેલ્લાં કેટલાંય સમયથી તેની એક પછી એક ફિલ્મો ફ્લોપ થઈ રહી છે. સમ્રાટ પૃથ્વીરાજ, રામ સેતુ અને બચ્ચન પાંડે જેવી ફિલ્મો બોક્સ ઓફિસ પર સુપર ફ્લોપ રહી હતી. આટલું જ નહીં તાજેતરમાં રિલીઝ થયેલી અક્ષય અને ઈમરાન હાશ્મીની ફિલ્મ ‘સેલ્ફી’ પણ ખરાબ રીતે પીટાઈ ગઈ હતી. અક્ષય કુમાર પોતાની ફિલ્મોના ફ્લોપ ગ્રાફને જોઈને ડરી ગયો છે. તેથી જ અભિનેતાએ તેની મોસ્ટ અવેટેડ ફિલ્મ ‘ઓહ માય ગોડ 2’ ની રિલિઝ અંગે આંચકારૂપ નિર્ણય લીધો છે.
અક્ષય કુમારને બોલિવૂડ ઈન્ડસ્ટ્રીનો ‘ખિલાડી’ પણ કહેવામાં આવે છે. અભિનેતાઓ સારી રીતે જાણે છે કે તેમની ફિલ્મો દ્વારા દર્શકોને થિયેટર સુધી કેવી રીતે ખેંચી શકાય. અક્ષયે પોતાના કરિયરમાં ઘણી બ્લોકબસ્ટર ફિલ્મો આપી છે. જોકે, ગયા વર્ષથી ફ્લોપ ફિલ્મોના મામલે અભિનેતાનો ગ્રાફ ઝડપથી વધી રહ્યો છે. આને ધ્યાનમાં રાખીને ખિલાડી કુમારે તેની સુપરહિટ ફિલ્મ ‘ઓહ માય ગોડ’ની સિક્વલ ‘ઓહ માય ગોડ 2’ને બોક્સ ઓફિસના બદલે OTT પર રિલીઝ કરવાનો નિર્ણય લીધો છે.
અહેવાલ મુજબ, અક્ષય કુમાર સ્ટારર ‘ઓહ માય ગોડ 2’ના નિર્માતાઓ ડાયરેક્ટ-ટુ-ડિજિટલ રિલીઝના વિકલ્પ પર વિચાર કરી રહ્યા છે. આગામી સિક્વલના નિર્માતાઓ તેને ઓટીટી પર રિલીઝ કરવાના આયોજન કરી રહ્યાં છે. જો કે હજુ સુધી કોઈ સત્તાવાર જાહેરાત કરવામાં આવી નથી.
‘ઓહ માય ગોડ 2’ની વાત કરીએ તો તેનું નિર્દેશન અમિત રાય કર્યું છે. અશ્વિન વર્દે અને અક્ષય કુમાર આ ફિલ્મના નિર્માતા છે. ફિલ્મમાં અક્ષય કુમારની સાથે પંકજ ત્રિપાઠી, અરુણ ગોવિલ અને યામી ગૌતમ જેવા સ્ટાર્સ લીડ રોલમાં જોવા મળશે.
‘ઓહ માય ગોડ 2’ 2012માં આવેલી ફિલ્મ ‘ઓહ માય ગોડ’ની સિક્વલ છે. આ ફિલ્મ સ્ક્રીન પર આવતાની સાથે જ હિટ થઈ ગઈ હતી અને બોક્સ ઓફિસ પર જોરદાર કલેક્શન કર્યું હતું. અહેવાલ છે કે ‘ઓહ માય ગોડ 2’ની વાર્તા ભારતીય શિક્ષણ પ્રણાલી પર આધારિત હશે.
