ટોક્યો ઓલિમ્પિકમાં ગોલ્ડ મેડલ જીતીને નીરજ ચોપરાએ ઈતિહાસ રચી દીધો છે. નીરજની જીતથી દેશભરમાં ઉત્સવનો માહોલ જોવા મળી રહ્યો છે. ગોલ્ડ મેડલ જીતી દેશને ગૌરવ અપાવનારા નીરજ પર અભિનંદનના વરસાદ થવાની સાથે તેમના નામ પર કેટલાય ઈનામોની જાહેરાત થઈ છે. દેશને એથ્લેટિકસમાં પહેલો ગોલ્ડ અપાવવા બદલ નીરજ ચોપરા ઉપર જ્યારે ઈનામોની વર્ષા થઈ રહી છે ત્યારે દરેક ભારતીય ગર્વ સાથે નીરજ ચોપરાને મળેલા ગોલ્ડ મેડલની ઉજવણીમાં મગ્ન બન્યા છે આ માહોલની વચ્ચે સુરત શહેર પણ નીરજનું સન્માન કરવામાં પાછળ રહ્યું નથી. શહેરમાં સલૂનથી લઈને કેફે સુધી નીરજના સન્માનમાં એક અનોખી સ્કીમ શરૂ કરવામાં આવી છે. જાણો શહેરમાં નીરજ નામના વ્યક્તિ માટે થઈ રહેલી ઓફરોના વરસાદ વિશે.
નીરજ નામના વ્યક્તિને કેક ફ્રી
શહેરના પરવતપાટીયા વિસ્તારમાં આવેલી જાણીતી LIVE બેકરીમાં નીરજ ચોપરાના સન્માનમાં ફ્રી ઓફર શરૂ કરવામાં આવી છે. આવનાર 15 મી ઓગસ્ટથી 15 મી સપ્ટેમ્બર સુધી જે કોઈ નીરજ નામના વ્યક્તિની બર્થ ડે હશે તેમને કેક ફ્રી માં આપવામાં આવશે. નીરજ નામના વ્યક્તિએ તેમનું કોઈ પણ આઈડી પ્રુફ સાથે લાવવાનું રહેશે.
નીરજ નામના વ્યક્તિ માટે ફ્રી અનલિમિટેડ ઢોસાની જાહેરાત
ભારતને ઐતહાસિક ગૌરવ અપાવનાર ભારતના ગોલ્ડન બોય નિરજ ચોપરાના સન્માનમાં શહેરની એક઼ ઢોસાની રેસ્ટોરન્ટ દ્વારા અનલિમિટેડ ઢોસા સ્કીમની જાહેરાત કરવામાં આવી છે. જેમાં શહેરના કોઈ પણ શાખામાં 13 ઓગસ્ટ સુધી નીરજ નામનો કોઈ પણ વ્યક્તિ આવશે તો તેને ફ્રી માં અનલિમિટેડ ઢોસા ખવડાવવામાં આવશે. નીરજ નામના વ્યક્તિએ તેમનું આઈડી પ્રુફ સાથે લઈને જવાનું રહેશે.
નીરજ નામના વ્યક્તિ માટે હેર કટીંગ ફ્રી
શહેરના એક મેન્સ સલૂનમાં નીરજ ચોપરાના સન્માનમાં અનોખી સ્કીમ શરૂ કરવામાં આવી છે. શહેરમાં નીરજ નામના જે વ્યક્તિ 15 મી ઓગસ્ટના દિવસે આ સલૂનમાં હેર કટ કરાવવા માટે આવશે તેમને ફ્રી માં હેર કટ કરી આપવામાં આવશે. નીરજ નામના તમામ વ્યક્તિઓએ પોતાનું આધારકાર્ડ સાથે લઈને આવવાનું રહેશે. આ તમામ વ્યક્તિઓને સલૂન દ્વારા સન્માનિત પણ કરવામાં આવશે.
નીરજ નામના વ્યક્તિને રાખડી ફ્રી
ટોક્યો ઓલિમ્પિકમાં નીરજે ભારતનું નામ રોશન કર્યું છે ત્યારે રક્ષાબંધનના તહેવારને ધ્યાનમાં રાખીને રાખડીઓ પર પણ નીરજ નામની સ્કીમ શરૂ કરવામાં આવી છે. જે બહેનના ભાઈનું નામ નીરજ હશે તેમને રાખડી ફ્રી માં આપવામાં આવશે. શહેરમાં યોજાઈ રહેલા અનેક રાખી એક્ઝિબિઝનથી માંડીને રાખડીઓની દુકાનમાં પણ નીરજના નામે રાખડીઓ ફ્રી માં મળી રહી છે.
નીરજ નામના વ્યક્તિને ફ્રી માં ફૂડની જાહેરાત
શહેરમાં નીરજ ચોપરાના સન્માનમાં અનેક ફ્રી ઓફરોની જાહેરાત કરવામાં આવી છે ત્યારે શહેરના કેનાલ રોડ પર આવેલા કેફેમાં નીરજ નામના કોઈ પણ વ્યક્તિનું બિલ બનશે તો તેને ડિસ્કાઉન્ટ નહીં પણ સમગ્ર ફૂડ ફ્રી માં ઓફર કરવામાં આવશે. નીરજ ચોપરાના સન્માનમાં 13 અને 14 ઓગસ્ટ બે દિવસ સુધી આ ઓફર શરૂ કરવામાં આવી છે. નીરજ નામના આ તમામ વ્યક્તિઓનું જાહેરમાં સન્માન કરવામાં આવશે.
