નોકરી-ધંધાર્થે આવતા શ્રમિકો અને કર્મચારીઓ રસ્તામાંજ ફસાયા :
( પ્રતિનિધિ )વડોદરા,તા.1
વડોદરા જિલ્લામાં મેઘરાજાએ પોતાનું રૌદ્ર સ્વરૂપ ધારણ કર્યું છે, જેના કારણે જનજીવન ભારે પ્રભાવિત થયું છે. વડોદરાના વાઘોડિયા પંથકમાં સતત વરસી રહેલા ધોધમાર વરસાદને કારણે સ્થિતિ અત્યંત ગંભીર બની ગઈ છે. ભારે વરસાદના પગલે વાઘોડિયા અને ડભોઇને જોડતો મહત્વનો મુખ્ય માર્ગ સંપૂર્ણપણે બંધ કરવાની ફરજ પડી છે.
માર્ગ પર પાણી ફરી વળતા વાહનવ્યવહાર સંપૂર્ણ ઠપ થઈ ગયો અને અનેક વાહનચાલકો રસ્તા વચ્ચે જ અટવાઈ પડ્યા હતા. સ્થાનિક સૂત્રોના જણાવ્યા અનુસાર, આસપાસના વિસ્તારોમાં પડેલા ભારે વરસાદના કારણે ઢાઢર નદી બે કાંઠે વહી રહી છે અને નદીના પૂરમાં વધારો થતાં પાણી સીધા વાઘોડિયા-ડભોઇ રોડ પર ફરી વળ્યા છે. રોડ ઉપર પાણીનો પ્રવાહ એટલો બધો તીવ્ર અને ઊંડો હતો કે નાના-મોટા કોઈપણ વાહન માટે પસાર થવું જોખમી બની ગયું હતું. સલામતીના ભાગરૂપે અને અકસ્માતની આશંકાને ધ્યાનમાં રાખીને આ રૂટ પરનો વાહનવ્યવહાર રોકી દેવામાં આવ્યો છે. આ મુખ્ય માર્ગ બંધ થઈ જવાના કારણે રોજબરોજ અપડાઉન કરતા નોકરિયાતો અને કામદારોને ભારે હાલાકીનો સામનો કરવો પડ્યો છે. વાઘોડિયા જીઆઈડીસીમાં નોકરી કે ધંધાર્થે આવતા સેંકડો શ્રમિકો અને કર્મચારીઓ રસ્તામાં જ ફસાઈ ગયા હતા. પાણી ભરાઈ જવાના કારણે જીઆઈડીસી તરફ જઈ રહેલા નોકરીયાતોને પોતાની જગ્યાએ પહોંચ્યા વગર જ નાછૂટકે પાછા ફરવાનો વારો આવ્યો હતો. વહેલી સવારે કામ પર નીકળેલા લોકો રસ્તા બંધ હોવાથી કલાકો સુધી અટવાયા રહ્યા હતા. ભારે વરસાદ અને નદીના પાણી ફરી વળવાના આ બનાવને પગલે સ્થાનિક વહીવટી તંત્ર અને આપત્તિ વ્યવસ્થાપન ટીમો એલર્ટ થઈ ગઈ છે. તંત્ર દ્વારા નીચાણવાળા વિસ્તારોના લોકોને સતર્ક રહેવા અને નદી કિનારા તરફ ન જવા માટે કડક સૂચનાઓ આપવામાં આવી છે. વરસાદી માહોલ યથાવત રહેતા પ્રશાસન દ્વારા સ્થિતિ પર સતત નજર રાખવામાં આવી રહી છે અને નાગરિકોને અનાવશ્યક મુસાફરી ટાળવા અનુરોધ કરાયો છે.
