સુરત મહાનગરપાલિકાની ચૂંટણી પહેલા જ રાજકીય માહોલ ગરમાયો છે. કોંગ્રેસ પ્રમુખ વિપુલ ઉધનાવાળાએ ભાજપ અને પોલીસ સામે ગંભીર આક્ષેપો કર્યા છે, જેના કારણે ચૂંટણી પૂર્વે જ વિવાદનો માહોલ ઊભો થયો છે. ઉધનાવાળાના જણાવ્યા મુજબ, વોર્ડ નંબર 1ના કોંગ્રેસ ઉમેદવાર બોની પટેલને પોલીસે રસ્તા વચ્ચેથી ઉઠાવી લીધા હતા અને ધાકધમકી આપીને ઉમેદવારી ફોર્મ પરત ખેંચાવાયું હોવાનું તેમણે આરોપ લગાવ્યો છે.
કોંગ્રેસના આક્ષેપો બાદ રાજકીય વર્તુળોમાં ચકચાર મચી ગઈ છે. પાર્ટીના નેતાઓએ આ ઘટનાને લોકશાહી પર પ્રહાર ગણાવ્યો છે અને નિષ્પક્ષ તપાસની માંગણી પણ કરી છે. સાથે જ ભાજપ અને પોલીસની ભૂમિકા પર સવાલો ઊભા કર્યા છે.
બીજી તરફ, આ સમગ્ર મામલે ઉમેદવાર બોની પટેલે પોતાનું અલગ જ નિવેદન આપ્યું છે. તેમણે સ્પષ્ટતા કરતાં કહ્યું કે તેમણે પાર્ટી સાથે કોઈ ગદ્દારી કરી નથી અને પોતાનું ફોર્મ સ્વઇચ્છાએ પરત ખેંચ્યું છે. બોની પટેલના જણાવ્યા મુજબ, તેઓ છેલ્લા બે વર્ષથી કોંગ્રેસ સાથે જોડાયેલા કાર્યકર્તા છે અને ટિકિટ પણ તેમની મરજી વિરુદ્ધ આપવામાં આવી નહોતી.
તેમણે વધુમાં જણાવ્યું કે ફોર્મ ભરતી વખતે જ તેમણે પાર્ટીને જણાવ્યું હતું કે જો તેમનું કામ યોગ્ય રીતે નહીં થાય તો તેઓ ફોર્મ પરત ખેંચી લેશે. સાથે જ કાર્યકર્તાઓ સાથે સતત મતભેદ અને મિટિંગ ન થઈ શકવાના કારણે તેમણે આ નિર્ણય લીધો હોવાનું જણાવ્યું છે. બોની પટેલે તમામ આક્ષેપોને નકારી કાઢતા જણાવ્યું કે તેમણે કોઈ પણ પ્રકારના પૈસા લીધા નથી અને કોઈ દબાણ હેઠળ નિર્ણય લીધો નથી. હાલ આ મામલે રાજકીય તણાવ વધ્યો છે અને આગામી દિવસોમાં વધુ રાજકીય હલચલ થવાની શક્યતા દેખાઈ રહી છે.
