ભારતીય શેરબજારમાં ગુરુવાર, 2 એપ્રિલના રોજ જબરદસ્ત ઘટાડો જોવા મળ્યો, જેના કારણે રોકાણકારોમાં ચિંતા વધી ગઈ છે. કારોબારની શરૂઆતથી જ બજાર નબળાઈ દર્શાવતું હતું અને બપોરે આશરે 12:30 વાગ્યા સુધીમાં BSE Sensex લગભગ 1300 પોઈન્ટ સુધી તૂટી ગયો હતો, જ્યારે Nifty 50, 415 પોઈન્ટ નીચે સરકી ગયો હતો. આ અચાનક આવેલા ઘટાડાના કારણે રોકાણકારોને ભારે નુકસાન વેઠવું પડ્યું છે. શરૂઆતના કલાકોમાં જ અંદાજે 10 લાખ કરોડ રૂપિયાનું માર્કેટ કેપ ઘટી ગયું હતું. Bombay Stock Exchange પર લિસ્ટેડ કંપનીઓનું કુલ માર્કેટ કેપ લગભગ 412 લાખ કરોડ રૂપિયા સુધી ઘટી ગયું, જે બજારની નબળી સ્થિતિ દર્શાવે છે. આ ઘટાડા પાછળ અનેક વૈશ્વિક અને સ્થાનિક કારણો જવાબદાર છે.
પ્રથમ કારણ તરીકે Donald Trump ના નિવેદનને માનવામાં આવી રહ્યું છે. મિડલ ઈસ્ટમાં તણાવ વધવાની શક્યતાએ વૈશ્વિક બજારોમાં ભયનો માહોલ ઉભો કર્યો છે. ઈરાન સાથે સંભવિત સંઘર્ષની આશંકાએ રોકાણકારો સાવચેત બની ગયા છે. બીજું મહત્વપૂર્ણ કારણ વિદેશી રોકાણકારોની સતત વેચવાલી છે. છેલ્લા 22 ટ્રેડિંગ સેશનથી FIIs બજારમાંથી નાણાં બહાર ખેંચી રહ્યા છે. તાજેતરમાં જ લગભગ 8331 કરોડ રૂપિયાની વેચવાલી નોંધાઈ હતી, જેના કારણે બજાર પર દબાણ વધ્યું છે. તે સિવાય, ક્રૂડ ઓઈલના ભાવમાં ભારે ઉછાળો પણ બજાર માટે નકારાત્મક સાબિત થયો છે.
બ્રેન્ટ ક્રૂડ લગભગ 107 ડોલર પ્રતિ બેરલ સુધી પહોંચી ગયું છે, જ્યારે WTI ક્રૂડ 105 ડોલર પાર થયું છે. ઊંચા તેલના ભાવથી મોંઘવારી અને આર્થિક દબાણ વધવાની ભીતિ ઉભી થાય છે. વૈશ્વિક બજારોમાંથી મળેલા નબળા સંકેતો પણ આ ઘટાડાને વધુ તીવ્ર બનાવે છે. એશિયાઈ બજારોમાં પણ ઘટાડો નોંધાયો છે, જેમાં જાપાન, દક્ષિણ કોરિયા, ચીન અને હોંગકોંગના બજારો લાલ નિશાનમાં રહ્યા હતા. વૈશ્વિક અનિશ્ચિતતા, વિદેશી રોકાણકારોની વેચવાલી અને ક્રૂડ ઓઈલના વધતા ભાવને કારણે ભારતીય શેરબજારમાં આ મોટો ઘટાડો જોવા મળ્યો છે.
