પશ્ચિમ એશિયામાં વધતા તણાવ વચ્ચે અમેરિકા તરફથી એક મહત્વપૂર્ણ નરમ વલણ જોવા મળ્યું છે. અમેરિકાના રાષ્ટ્રપતિ Donald Trumpએ ઈરાન સામે ચાલી રહેલી લશ્કરી કાર્યવાહી ટૂંક સમયમાં સમાપ્ત કરવાની દિશામાં સંકેત આપ્યો છે. સાથે જ વૈશ્વિક તેલ પુરવઠા પર દબાણ ઓછું કરવા માટે અમેરિકાએ ઈરાનના ક્રૂડ ઓઈલ શિપમેન્ટ પર લાગેલા કેટલાક પ્રતિબંધોમાં તાત્કાલિક છૂટછાટ આપી છે. ટ્રમ્પે પોતાના પ્લેટફોર્મ Truth Social પર પોસ્ટ કરીને જણાવ્યું કે મિડલ ઇસ્ટમાં અમેરિકાના લશ્કરી ઉદ્દેશ્યો લગભગ પૂર્ણતાની નજીક છે અને હવે આગળની રણનીતિ પર વિચાર ચાલી રહ્યો છે. આ નિવેદનને યુદ્ધ બાદ તણાવ ઘટાડવાના સૌથી સ્પષ્ટ સંકેત તરીકે જોવામાં આવી રહ્યું છે.
વ્હાઇટ હાઉસ તરફથી પ્રેસ સેક્રેટરી Karoline Leavittએ જણાવ્યું કે આ સમગ્ર મિશન માટે 4થી 6 અઠવાડિયાનો અંદાજ હતો અને હવે ત્રીજા અઠવાડિયામાં પ્રવેશ થઈ રહ્યો છે. તેમના મુજબ અમેરિકન સેનાએ નોંધપાત્ર સફળતા મેળવી છે અને ઈરાનની ક્ષમતા નબળી પડી રહી છે. જોકે, અમેરિકાના આ સંકેતો વચ્ચે Iranએ પોતાની આક્રમકતા યથાવત રાખી છે. ઈરાને Saudi Arabia અને Israelને નિશાન બનાવી ડ્રોન અને મિસાઈલ હુમલાઓનો નવો રાઉન્ડ શરૂ કર્યો છે. ઈરાનના સર્વોચ્ચ નેતા મોજતબા ખામેનેઈએ દાવો કર્યો કે તેમના દેશે વિરોધીઓને ભારે ઝટકો આપ્યો છે.
આ સંજોગોમાં વૈશ્વિક તેલ બજાર પર વધતા દબાણને ધ્યાનમાં રાખીને અમેરિકાએ મહત્વપૂર્ણ નિર્ણય લીધો છે. 20 માર્ચ પહેલાં લોડ થયેલા ઈરાની ક્રૂડ ઓઈલના જહાજોને 19 એપ્રિલ સુધી વેચાણ અને ડિલિવરી માટે મંજૂરી આપવામાં આવી છે. આ પગલાંથી ઊર્જા બજારમાં સ્થિરતા લાવવા અને ભાવવધારો નિયંત્રિત કરવા મદદ મળશે તેવી આશા વ્યક્ત કરવામાં આવી રહી છે. એક તરફ અમેરિકા તણાવ ઘટાડવાના સંકેત આપી રહ્યું છે, તો બીજી તરફ જમીન પર સંઘર્ષ યથાવત રહેતા મિડલ ઇસ્ટની સ્થિતિ હજુ પણ અત્યંત સંવેદનશીલ અને અસ્થિર બની રહી છે.
