એન્ટી-ઈન્ડિયા નેટવર્ક સાથે જોડાણના આરોપથી ચકચાર
ભારતમાં રાષ્ટ્રીય સુરક્ષાને લઈને મોટી કાર્યવાહી સામે આવી છે. અમેરિકન નાગરિક Matthew Aaron VanDyke ને ભારતની National Investigation Agency (NIA) એ 13 માર્ચે છ યુક્રેનિયન નાગરિકો સાથે ધરપકડ કરી છે. તપાસ એજન્સી મુજબ, આ તમામ લોકો ટૂરિસ્ટ વિઝા પર ભારતમાં આવ્યા હતા, પરંતુ ગેરકાયદેસર પ્રવૃત્તિઓમાં સંડોવાયેલા હતા.
NIAના જણાવ્યા અનુસાર, આ લોકો પહેલા ગુવાહાટી પહોંચ્યા અને ત્યારબાદ જરૂરી પરવાનગી વગર મિઝોરમ વિસ્તારમાં ગયા. ત્યાંથી તેઓ ગેરકાયદેસર રીતે મ્યાનમાર પ્રવેશ્યા હતા. તપાસમાં સામે આવ્યું છે કે તેઓ મ્યાનમારમાં આવેલા એથનિક આર્મ્ડ ગ્રુપ્સ (EAGs) સાથે સંપર્કમાં હતા, જે ભારત વિરોધી બળવાખોર સંગઠનોને સહાયતા કરે છે.
મેથ્યુ વેનડાઈક વિશે વાત કરીએ તો, તે અમેરિકાના મેરિલેન્ડ રાજ્યના બાલ્ટિમોર શહેરનો રહેવાસી છે. તે પોતાને વોર કરસ્પોન્ડન્ટ, સૈનિક અને સિક્યુરિટી ટ્રેનર તરીકે ઓળખાવે છે. 2009માં તેણે ઈરાકમાં રિપોર્ટિંગ કર્યું હતું અને તેણે Libyan Civil War દરમિયાન લડતનો પણ દાવો કર્યો છે. તેની સ્થાપિત સંસ્થા Sons of Liberty International (SOLI) વિશ્વભરના સંઘર્ષગ્રસ્ત વિસ્તારોમાં ટ્રેનિંગ અને સુરક્ષા ની સલાહ આપે છે. પરંતુ NIAનો આરોપ છે કે આ ટ્રેનિંગનો ઉપયોગ આતંકવાદી પ્રવૃત્તિઓ માટે થઈ રહ્યો હતો.
તપાસ દરમિયાન સામે આવ્યું છે કે આરોપીઓએ મ્યાનમારના ગ્રુપ્સને ડ્રોન ઓપરેશન, એસેમ્બલી અને જૅમિંગ જેવી ટેકનોલોજીમાં તાલીમ આપી હતી. સાથે જ યુરોપમાંથી મોટા પ્રમાણમાં ડ્રોન મ્યાનમાર પહોંચાડવામાં પણ તેમની ભૂમિકા હોવાનું કહેવાય છે. આ કેસમાં Unlawful Activities (Prevention) Act, 1967 (UAPA) હેઠળ ગુનો દાખલ કરવામાં આવ્યો છે, જે આતંકવાદી પ્રવૃત્તિઓને ટેકો આપવાના આરોપો માટે લાગુ પડે છે. દિલ્હી કોર્ટએ તમામ આરોપીઓને 27 માર્ચ સુધી NIA કસ્ટડીમાં મોકલ્યા છે. હાલ આ સમગ્ર મામલે આંતરરાષ્ટ્રીય સ્તરે પણ હલચલ મચી છે, જ્યાં અમેરિકા અને યુક્રેન બંનેએ આ મુદ્દે ભારત સાથે સંપર્ક સાધ્યો છે.
