મણિપુરી ભાષાની ભારતીય ફિલ્મ ‘બૂંગ’એ બાફ્ટા 2026માં મોટી સિદ્ધિ હાંસલ કરી છે. ફિલ્મે ‘શ્રેષ્ઠ બાળકો અને કૌટુંબિક ફિલ્મ’ શ્રેણીમાં એવોર્ડ જીતી હોલીવુડની જાણીતી ફિલ્મોને પાછળ છોડી દીધી છે. આ જીત માત્ર નિર્માતા ફરહાન અખ્તરના પ્રોડક્શન હાઉસ માટે જ નહીં, પરંતુ સમગ્ર ભારતીય પ્રાદેશિક ફિલ્મ ઉદ્યોગ માટે ગૌરવની ક્ષણ છે. લંડનના Royal Festival Hall ખાતે આયોજિત સમારોહમાં વિશ્વભરના કલાકારો અને ફિલ્મ નિર્માતાઓ ઉપસ્થિત રહ્યા હતા. 22 ફેબ્રુઆરી, 2026ના રોજ યોજાયેલા બાફ્ટા એવોર્ડ સમારોહનું સંચાલન Alan Cummingએ કર્યું હતું. એવોર્ડ નાઇટમાં આલિયા ભટ્ટ પ્રસ્તુતકર્તા તરીકે હાજર રહી હતી. ‘બૂંગ’ ‘ ફિલ્મ આર્કો’, Lilo & Stitch અને Zootopia જેવી આંતરરાષ્ટ્રીય ફિલ્મો સાથે દોડમાં હતી. કઠિન સ્પર્ધા છતાં ‘બૂંગ’એ એવોર્ડ જીતીને ભારતીય સિનેમાને વૈશ્વિક મંચ પર નવી ઓળખ અપાવી છે. દિગ્દર્શક-નિર્માતા અને અભિનેતા ફરહાન અખ્તર દ્વારા નિર્મિત, આ ફિલ્મનું વર્લ્ડ પ્રીમિયર 2024 ટોરોન્ટો ઇન્ટરનેશનલ ફિલ્મ ફેસ્ટિવલમાં થયું હતું, જેને દર્શકોએ સ્ટેન્ડિંગ ઓવેશન આપ્યું હતું. ત્યારબાદ તેને મેલબોર્નના ઇન્ડિયન ફિલ્મ ફેસ્ટિવલમાં પણ પ્રદર્શિત કરવામાં આવી હતી. આ ફિલ્મ સપ્ટેમ્બર 2025 માં ભારતીય થિયેટરોમાં રિલીઝ થઈ હતી. લક્ષ્મીપ્રિયા દેવી દ્વારા દિગ્દર્શિત, ફરહાને વિકેશ ભૂટાની, એલન મેકલેક્સ, રિતેશ સિધવાની અને શુજાત સૌદાગર સાથે આ ફિલ્મનું સહ-નિર્માણ કર્યું હતું.
સપ્ટેમ્બર 2024માં રિલીઝ થયેલી ‘બૂંગ’ મણિપુરની ટેકરીઓમાં રહેતા એક નિર્દોષ છોકરાની હૃદયસ્પર્શી સફર રજૂ કરે છે. પોતાની માતાને ખુશ કરવા માટે બૂંગ પોતાના ગુમ થયેલા પિતાની શોધમાં નીકળે છે. તેની આ યાત્રા દરમિયાન તેને અનેક અનપેક્ષિત પડકારો અને આશ્ચર્યોનો સામનો કરવો પડે છે. ફિલ્મમાં ગુગુન કિપગેન મુખ્ય ભૂમિકામાં ‘બ્રજેન્દ્રો ઉર્ફે બૂંગ’ તરીકે જોવા મળે છે. સાથે બાલા હિજામ, જેની ખુરાઈ, હમોમ સદાનંદ, અંગમ સનાતોમ્બમ, વિક્રમ કોચર, નેમેટિયા નગનબમ, થૌડમ બ્રજબિધુ અને મોધુબાલા થૌડમ જેવા કલાકારો પણ મહત્વપૂર્ણ ભૂમિકામાં છે.
