( પ્રતિનિધી )વડોદરા,તા.16
અણખોલ ગામમાં મગર આવી જતા ગ્રામજનોમાં ફફડાટ ફેલાયો હતો. બનાવની જાણ કરવામાં આવતા વાઈલ્ડ લાઈફ રેસ્ક્યુ ટ્રસ્ટના વોલીએન્ટર સ્થળ પર પહોંચ્યા હતા. ભારે જહેમતે બાદ ચાર ફૂટના મગરને રેસ્ક્યુ કરી વન વિભાગને સોંપવામાં આવ્યો હતો.
ચોમાસામાં જળચર જીવો રહેણાંક વિસ્તારોમાં આવી જતા હોવાના બનાવો સામે આવી રહ્યા છે. તેવામાં શહેર નજીક અણખોલ ગામમાં મગર આવી જતા ગ્રામજનોમાં ફફડાટ ફેલાયો હતો. લોકો દ્વારા મગર ગામના વચ્ચે આવી ગયો હોવાની જાણ શહેરની વાઇલ્ડ લાઇફ રેસ્ક્યુ ટ્રસ્ટના પ્રેસિડેન્ટ અરવિંદ પવારને કરવામાં આવતા તેમના દ્વારા સંસ્થાના વોલીએન્ટર યુવરાજસિંહ રાજપુત અને યશ તડવીને માહિતી આપતા તેઓ અણખોલ ગામ ખાતે પહોંચ્યા હતા. જ્યાં તપાસ કરતા ચાર ફૂટનો મગર નજરે પડ્યો હતો. તેઓ દ્વારા સુરક્ષિત રીતે ભારે જહેમતે રેસ્ક્યુ કરી મગરને વન વિભાગમાં સોંપવામાં આવ્યો હતો.
