શહેરના કાપોદ્રા વિસ્તારમાં આવેલા હીરાના કારખાનામાં કરોડોના હીરાની ચોરી થઈ હોવાની સનસનીખેજ ઘટના બની છે. આજે કાપોદ્રાની ડીકે એન્ડ સન્સ ડાયમંડ કંપનીમાંથી 25 કરોડના હીરાની ચોરી થઈ છે. ઘટનાની જાણ થતા પોલીસ દોડી ગઈ છે. હાલ તપાસ ચાલી રહી છે.
પ્રાથમિક વિગતો અનુસાર કાપોદ્રાની ડી. કે. એન્ડ સન્સ ડાયમંડ કંપનીમાંથી 25 કરોડના હીરા ચોરાયા છે. કરોડોના હીરાની ચોરી થઈ છે. ઓફિસની તિજોરી કટરથી કાપી ડાયમંડ અને રોકડા લઇ ચોર ઈસમો ભાગી છૂટ્યા છે.
પોલીસ સૂત્રો પાસેથી મળતી માહિતી અનુસાર હીરાની કંપનીમાં 15મી ઓગસ્ટ, જન્માષ્ટમી અને રવિવાર એમ ત્રણ દિવસની રજા હતી. ત્રણ દિવસથી કારખાનું બંધ હતું. આ રજાઓનો લાભ ઉઠાવીને તસ્કરોએ આ ચોરીને અંજામ આપ્યો છે. કપૂરવાડી ખાતે આવેલા આ હીરા કારખાનાના ચોથા માળેથી રફ હીરા અને રોકડની ચોરી થઈ છે.
ચોરટાઓ માત્ર હીરા અને રોકડા નહીં પરંતુ પુરાવાનો નાશ કરવા માટે ફેક્ટરીના તમામ સીસીટીવી કેમેરા અને ડીવીઆર પણ ઉપાડી ગયા છે. પોલીસ હવે આસપાસના વિસ્તારના CCTV ફૂટેજ મેળવી તપાસ કરી રહી છે. ઘટનાસ્થળે DCP, ACP સહિતની ટીમો અને FSLની ટીમ પણ પહોંચી છે. આ ઘટનાને કારણે હીરા ઉદ્યોગમાં ચિંતાનો માહોલ ફેલાયો છે અને સુરક્ષા વ્યવસ્થા પર પ્રશ્નાર્થ ઊભો થયો છે. પોલીસ દ્વારા આ મામલે સઘન તપાસ ચાલી રહી છે.
ડીસીપી આલોક કુમારે જણાવ્યું હતું કે, ત્રણ દિવસની રજા હોવાથી તસ્કરો ક્યારે આવ્યા અને ચોરી કરી છે તે અંગે અમે તપાસ કરી રહ્યા છીએ. ઇન્વૉઇસ બિલ પ્રમાણે લગભગ 25 કરોડથી પણ વધુના હીરાની ચોરી થઈ છે. અમે નજીકના કેમેરાની તપાસ કરી રહ્યા છીએ.
