કહેવાય છે કે મહારાષ્ટ્ર-મુંબઈમાં વરસાદ પડે તેના ગણતરીના કલાકોમાં દક્ષિણ ગુજરાતમાં મેઘરાજાની એન્ટ્રી થતી હોય છે. રવિવારે અને સોમવારે મહારાષ્ટ્રમાં ધમધોકાર વરસાદ પડ્યા બાદથી દક્ષિણ ગુજરાતમાં ચોમાસું બેસે તેની રાહ જોવાતી હતી અને પેક્ષા અનુસાર મધરાત્રિથી દક્ષિણ ગુજરાત સહિત રાજ્યમાં મેઘરાજાની એન્ટ્રી થઈ છે. સુરત, વલસાડ સહિત દક્ષિણ ગુજરાતમાં મૂશળધાર વરસાદ વરસ્યો છે.
અચાનક આવેલા વાતાવરણના પલટાથી ચોમાસું વહેલું શરૂ થઈ ગયું છે. મુંબઈની સાથે દક્ષિણ ગુજરાતમાં વરસાદ વરસી રહ્યો છે. હવામાન વિભાગે 1 જૂન સુધી રાજ્યમાં છુટાછવાયા વરસાદની આગાહી કરી છે. આજે (27 મે) મોટાભાગના જિલ્લાઓમાં ગાજવીજ અને પવન સાથે છુટાછવાયા સ્થળે વરસાદની આગાહી કરવામાં આવી છે.
સુરત જિલ્લામાં વહેલી સવારથી વરસાદ પડી રહ્યો છે. જિલ્લાના ઓલપાડ, કામરેજ, માંગરોળ અને માંડવી સહિતના તાલુકાઓમાં વરસાદ નોંધાયો છે. કમોસમી વરસાદને કારણે ખેડૂતોની ચિંતામાં વધારો થયો છે. ડાંગર, કેરી અને કેળાના પાકને મોટું નુકસાન થઈ રહ્યું છે. તો બીજી તરફ વરસાદના કારણે વાતાવરણમાં ઠંડક પ્રસરતા લોકોને ગરમીથી રાહત મળી છે.
ડાંગરનો પાક પલળી જતા ખેડૂતોને નુકસાન
સુરત જિલ્લાના અનેક ગામડાંઓમાં ડાંગર પકવી ચૂકેલા ખેડૂતો સામે ફરી એકવાર કુદરતનો કહેર ઊભો થયો છે. સોમવારે મોડી રાતથી વરસી રહેલાં વરસાદને પગલે સુકવવા મુકેલો ડાંગરનો પાક પલળી ગયો છે, જેના લીધે સુરત જિલ્લાના ખેડૂતોને માથે હાથ મુકી રડવાનો વારો આવ્યો છે.
ભરૂચ જિલ્લામાં 2 ઈંચ વરસાદ ખાબક્યો
ભરૂચમાં ગાજવીજ સાથે મોડીરાથી વરસાદ ખાબકી રહ્યો છે. ભારે વરસાદના કારણે ચારેય તરફ પાણી-પાણી થતાં જનજીવન પર તેની અસર વર્તાઈ રહી છે. વરસાદને પગલે નોકરી-ધંધાએ જતા લોકોને મુશ્કેલીનો સામનો કરવો પડ્યો હતો.
નવસારી જિલ્લામાં 1.5 ઈંચથી વધુ વરસાદ પડ્યો
નવસારી જિલ્લામાં મોડી રાતે ધોધમાર વરસાદ પડ્યો હતો. ચીખલી અને વાંસદામાં સૌથી વધુ વરસાદ નોંધાયો છે. કમોસમી વરસાદને કારણે ખાસ કરીને ખેતીમાં નુકસાનની ઘટનાઓ સામે આવી રહી છે. ડાંગરના ખેતરોમાં પાણી ભરાઈ જતાં વાવણી પૂર્વ તૈયારી ખોરવાઈ છે, જ્યારે કેરી ખરી જતાં ખેડૂતોએ નુકસાન સહન કરવું પડી રહ્યું છે.
વલસાડમાં સરેરાશ સવા ઈંચ વરસાદ પડ્યો
વલસાડ જિલ્લામાં આખી રાત વીજળીના કડાકા ભડાકા સાથે વરસાદ પડ્યો હતો. સરેરાશ 1થી સવા ઈંચ વરસાદ પડ્યો હતો, જેના લીધે વલસાડના નીચાણવાળા વિસ્તારોમાં પાણી ભરાયા હતા. જિલ્લા કંટ્રોલરૂમના આંકડા અનુસાર વલસાડમાં રાત્રિ દરમિયાન 49 મિ.મિ., ધરમપુરમાં 26 મિ.મિ., પારડીમાં 12 મિ.મિ., કપરાડામાં 14 મિ.મિ., ઉમરગામમાં 46 મિ.મિ., અને વાપીમાં 19 મિ.મિ. વરસાદ ખાબક્યો છે. સરેરાશ જિલ્લામાં 27.67 મિ.મિ. વરસાદ નોંધાયો છે.
