સુરત પાલિકા કમિશનરે વર્ષ 2025-26 નું રૂપિયા 9603 કરોડનું ડ્રાફ્ટ બજેટ રજૂ કર્યું હતું જેમાં રૂપિયા 4562 કરોડના કેપીટલ કામો હતા. સ્થાયી સમિતિએ આ બજેટમાં 401 કરોડના વધારા સાથે 1004 કરોડનું બજેટ મંજૂર કર્યું છે. સ્થાયીએ આ બજેટ મંજુર કરતા સુરત મનપાએ નવો ઈતિહાસ રચ્યો છે. પહેલીવાર SMCનું બજેટ રૂપિયા 10 હજાર કરોડને પાર થયું છે.
સુરત મ્યુનિસિપલ કમિશનર શાલિની અગ્રવાલે વર્ષ 2025-26નાં 9603 કરોડ રૂપિયાનું બજેટ સ્થાયી સમિતિ સમક્ષ રજૂ કર્યું હતું જેમાં 4562 કરોડના કેપીટલ કામો રજૂ કરાયા હતા. બે દિવસની મેરેથોન ચર્ચા બાદ આજે ગુરુવારે સ્થાયી સમિતિએ બજેટ મંજુર કર્યું છે, જેમાં સ્થાયી સમિતિએ મ્યુનિસિપલ કમિશ્નરે રજુ કરેલા બજેટમાં 401 કરોડનો વધારો કર્યો છે અને કેપીટલ કામ મ્યુનિસિપલ કમિશ્નરે બજેટમાં 4562 કરોડના સુચવ્યા હતા તેમાં 301 કરોડનો વધારો કરીને 4903 કરોડના કર્યા છે અને રેવન્યુ ખર્ચ 5041 કરોનો હતો. તેમાં 60 કરોડનો વધારો કરીને 5101 કરોડના કર્યા છે.
સ્થાયી સમિતિ અધ્યક્ષ રાજન પટેલે બજેટ રજુ કરવા સાથે આ બજેટને સર્વાંગી ગણાવવા સાથે સમાજના તમામ વર્ગોના લોકો અને તમામ ઘટક ક્ષેત્રોના સર્વાગી વિકાસ સાથે સુરત શહેરનો વધુને વધુ વિકાસ અને વૃદ્ધિ કરવાની જવાબદારી બમણી કરવાનું બજેટ ગણાવ્યું હતું.
આ ઉપરાંત શહેરીજનોને હિત તેમજ વિકાસને લક્ષ્યમાં લઈ લોકોની લાગણી અને રજુઆતોને વાચા આપી ગયા વર્ષના જ કર-દર આ વર્ષે પણ થયાવત રાખવાની પણ જાહેરાત કરી છે. કર-દરમાં વધારો કર્યા વગર શહેરીજનોને સીધી રીતે સ્પર્શતી લાભકારી જોગવાઈ કરી તેનાથી ઉદ્ધવતી અસંતુલનને ઘટાડવાની વાત ગણી હતી.
શહેરમાં 10 નવા આરોગ્ય કેન્દ્ર બનશે
તેઓએ વધુમાં કહ્યું હતું કે બજેટમાં શિક્ષણ, રમત-ગમત, આરોગ્ય, ફાયર એન્ડ ઈમરજન્સી સર્વિસ વિભાગ, હાઇડ્રોલિક વિભાગ, સહિત ડ્રેનેજ અને બ્રિજ-ફૂટ ઓવર બ્રિજ સહિત શહેરીજનો માટે વિવિધ સુવિધાઓ પ્રકલ્પો પર ખાસ ભાર મૂકવામાં આવ્યો છે. બજેટમાં પહેલીવાર પીપીપી ધોરણે કોમ્યુનીટી હોલ બનાવવા આયોજન કરવામાં આવ્યું છે. જ્યારે શહેરના જુદા-જુદા વિસ્તારોમાં 10 નવા આરોગ્ય કેન્દ્ર બનાવવામાં આવશે.
બજેટમાં લિંબાયત, વરાછા અને ઉધનામાં અલાયદા પાણી પુરવઠો પૂરું પાડવા આયોજન કરાયું છે. સાથે સાથે બાળ મરણ પર અંકુશ મેળવવા માટે નવજાત બાળકો માટે 50 આઈસીયુ બેડની સુવિધા ઉપલબ્ધ કરાવવા માટે નિર્ણય કરાયો છે.
શાળાઓમાં રમત-ગમતના સાધનો આપવામાં આવશે
સ્થાયી સમિતિ દ્વારા સને 2025-26ના બજેટમાં કરેલ આયોજન પૈકી શહેરના ગરીબ-શ્રમજીવી પરિવારોનાં બાળકો માટે આશીર્વાદ રૂપ શિક્ષણ સમિતિની શાળાઓમાં રમત-ગમતનાં સાધનોની કીટ આપવાનું આયોજન કરવામાં આવ્યું છે. વહીવટી તંત્ર દ્વારા રજુ કરવામાં આવેલ 1058 કરોડની જોગવાઈ સામે શાસકો દ્વારા 44.50 કરોડનો વધારો સુચવવામાં આવ્યો છે. સ્થાયી સમિતિ દ્વારા સુધારેલ બજેટમાં હવે શિક્ષણ સમિતિ માટે 1103 કરોડ રૂપિયાની જોગવાઈ કરવામાં આવી છે.
એક ફૂટ ઓવર અને ત્રણ નવા બ્રિજનું આયોજન
એક ફૂટ ઓવર બ્રિજ અને ત્રણ નવા બ્રિજ બનાવવાનું આયોજન કરાયું છે. મશીન હોલના ફેમ કવર શોધવા મેટલ ડિટેક્ટરની ખરીદી કરાશે કરવા સાથે પહેલીવાર જીઆઈએસ આધારિત રીઅલ ટાઈમ ડ્રેનેજ મેપિંગ માટેની જાહેરાત કરવામાં આવી છે.
તક્ષશિલા હોનારત બાદ સુરત મહાનગર પાલિકા શહેરીજનોની જાન-માલની સુરક્ષા માટે કરોડો રૂપિયાના ખર્ચે ફાયર વિભાગને અત્યાધુનિક બનાવવાની દિશામાં ગંભીરતાપૂર્વક આગળ વધી રહ્યું છે. જેમાં સ્થાયી સમિતિ દ્વારા આગામી સમયમાં સુરત શહેરમાં ગગનચુંબી ઈમારતોમાં આગ જેવી હોનારતમાં અત્યંત જરૂરી 104 મીટરની ઉંચાઈનું હાઈડ્રોલિક પ્લેટફોર્મ ખરીદવાનું નક્કી કરાયું છે.
