ભારતની સ્ટાર શટલર પીવી સિંધુ લગ્નના બંધનમાં બંધાઈ ગઈ છે. રવિવારે તેણે ઉદયપુરમાં તેના મંગેતર વેંકટ દત્તા સાઈ સાથે લગ્ન કર્યા. લગ્નના પરંપરાગત પોશાકમાં બંને ખૂબ જ સુંદર લાગી રહ્યા હતા. આ દંપતી તેમના પરિવાર અને નજીકના લોકોની હાજરીમાં લગ્નના બંધનમાં બંધાયા હતા.
કેન્દ્રીય મંત્રી ગજેન્દ્ર સિંહ શેખાવતે સિંધુના લગ્નનો ફોટો શેર કર્યો છે. તેમણે લખ્યું કે રવિવારે સાંજે ઉદયપુરમાં વેંકટ દત્તા સાઈ સાથે અમારી બેડમિન્ટન ચેમ્પિયન ઓલિમ્પિયન પીવી સિંધુના લગ્ન સમારોહમાં હાજરી આપીને ખુશી થઈ. હું દંપતીને તેમના નવા જીવન માટે શુભકામનાઓ અને આશીર્વાદ પાઠવું છું.
કોણ છે વેંકટ દત્તા સાઈ?
સિંધુ અને વેંકટે શનિવારે સગાઈ કરી હતી. વેંકટ હૈદરાબાદના રહેવાસી છે. તેઓ પોસાઇડેક્સ ટેક્નોલોજીના એક્ઝિક્યુટિવ ડિરેક્ટર છે. વેંકટ ફાઉન્ડેશન ઓફ લિબરલ એન્ડ મેનેજમેન્ટ એજ્યુકેશનમાંથી લિબરલ આર્ટ્સ એન્ડ સાયન્સ/લિબરલ સ્ટડીઝમાં ડિપ્લોમા ધરાવે છે. તેમણે 2018માં FLAME યુનિવર્સિટીમાંથી બેચલર ઑફ બિઝનેસ એડમિનિસ્ટ્રેશનમાંથી BBA એકાઉન્ટિંગ અને ફાઇનાન્સ પૂર્ણ કર્યું અને પછી ઇન્ટરનેશનલ ઇન્સ્ટિટ્યૂટ ઑફ ઇન્ફર્મેશન ટેકનોલોજી, બેંગ્લોરમાંથી ડેટા સાયન્સ અને મશીન લર્નિંગમાં માસ્ટર ડિગ્રી મેળવી.
વેંકટની LinkedIn પ્રોફાઇલ અનુસાર તેમણે JSW સાથે સમર ઇન્ટર્ન તેમજ ઇન-હાઉસ કન્સલ્ટન્ટ તરીકે કામ કર્યું છે. તેમણે તેમની પ્રોફાઈલમાં એ પણ ઉલ્લેખ કર્યો છે કે તેમણે આઈપીએલ ટીમનું સંચાલન પણ કર્યું છે. તેમણે 2019 થી સોર એપલ એસેટ મેનેજમેન્ટના મેનેજિંગ ડિરેક્ટર તરીકે સેવા આપી છે. તેમણે પોસાઇડેક્સમાં એક્ઝિક્યુટિવ ડિરેક્ટર તરીકે પણ કામ કર્યું છે.
આ કપલ 24 ડિસેમ્બરે હૈદરાબાદમાં રિસેપ્શન પાર્ટીનું આયોજન કરશે. સિંધુના લગ્નનો કાર્યક્રમ 20 ડિસેમ્બરે સંગીત સાથે શરૂ થયો હતો. બીજા દિવસે હલ્દી, પેલ્લીકુથુરુ અને મહેંદી હતી. લગ્ન વિશે વાત કરતા સિંધુના પિતાએ કહ્યું હતું કે બંને પરિવાર એકબીજાને સારી રીતે ઓળખે છે પરંતુ લગ્ન એક મહિનાની અંદર નક્કી કરવામાં આવ્યા હતા. આ જોડીએ 22 ડિસેમ્બરની તારીખ પસંદ કરી કારણ કે સિંધુ આવતા વર્ષથી તાલીમ અને ટૂર્નામેન્ટમાં વ્યસ્ત રહેશે.
