સિંગાપોર (Singapore) અને હોંગકોંગ બાદ નેપાળે (Nepal) પણ કથિત ગુણવત્તાની ચિંતાઓને કારણે ભારતીય કંપનીઓના કેટલાક મસાલા ઉત્પાદનોની આયાત અને વેચાણ પર પ્રતિબંધ મૂક્યો છે. નેપાળના ખાદ્ય પ્રૌદ્યોગિકી અને ગુણવત્તા નિયંત્રણ વિભાગ અનુસાર શંકાસ્પદ ઇથિલિન ઓક્સાઇડ અથવા EtO દૂષણને કારણે MDH અને એવરેસ્ટના ચાર મસાલા ઉત્પાદનો પર શુક્રવારથી પ્રતિબંધ મૂકવામાં આવ્યો છે. આ હેઠળ MDHના મદ્રાસ કરી પાવડર, સાંભર મસાલા પાવડર અને મિશ્ર મસાલા કરી પાવડર અને એવરેસ્ટના ફિશ કરી મસાલા પર પ્રતિબંધ મૂકવામાં આવ્યો છે.
આ કારણ આપવામાં આવ્યું
આ ચાર ઉત્પાદનોમાં ઇથિલિન ઓક્સાઇડનું પ્રમાણ નિર્ધારિત મર્યાદા કરતાં વધુ હોવાનું જણાયું હોવાથી ફૂડ રેગ્યુલેશન 2027 BSની કલમ 19 મુજબ દેશમાં આ ઉત્પાદનોની આયાત અને વેચાણ પર પ્રતિબંધ મુકાયો છે તેવું વિભાગે જણાવ્યું હતું. શુક્રવારે જારી કરાયેલી નોટિસમાં કહેવામાં આવ્યું છે કે અમારું ધ્યાન બજારમાં આ નબળા ઉત્પાદનોના વેચાણ અને વપરાશ માટે હાનિકારક હોવા અંગેના અહેવાલો તરફ દોરવામાં આવ્યું છે. ખાદ્ય ગુણવત્તા નિયંત્રણ દેખરેખ સંસ્થાએ આયાતકારો અને વેપારીઓને આગ્રહ કર્યો છે કે તેઓ આ ઉત્પાદનોને બજારમાંથી પાછા ખેંચી લે.
જણાવી દઈએ કે ગયા મહિને સિંગાપોર અને હોંગકોંગે કેટલાક MDH અને એવરેસ્ટ મસાલાનું વેચાણ અટકાવ્યું હતું, જેમાં કેટલાક કેન્સર-લિંક્ડ ETOના શંકાસ્પદ ઉચ્ચ સ્તરો ટાંકવામાં આવ્યા હતા. ફૂડ સેફ્ટી એન્ડ સ્ટાન્ડર્ડ ઓથોરિટી ઓફ ઈન્ડિયા (FSSAI) એ ત્યારથી દેશમાં વિવિધ બ્રાન્ડના મસાલાઓની ગુણવત્તાની ચકાસણી કરવા માટે પગલાં લીધાં છે. જ્યારે બ્રિટને ભારતમાંથી આયાત થતા તમામ મસાલાઓ પર કડક તકેદારી રાખીને આયાતની ચકાસણી વધારી છે. બ્રિટનના ખાદ્ય નિયમનકારે કહ્યું કે તેણે ભારતમાંથી આયાત થતા તમામ મસાલા પર વધારાના નિયંત્રણના પગલાં લાદ્યા છે.
