નવી દિલ્હી: રાષ્ટ્રીય ટીવી ચેનલો (National TV Channel) પર દર્શાવવામાં આવતા હિંસક વાંધાજનક દ્રશ્યોને (Violent offensive scenes) નહીં દર્શાવવા માટેની ચેતવણી આજે સરકાર દ્વારા જાહેર કરવામાં આવી છે. સરકારના માહિતી અને પ્રસારણ મંત્રાલયે 9 જાન્યુઆરી 2023ને સોમવારના રોજ દેશની તમામ ટેલિવિઝન ચેનલો માટે એક સૂચનાપત્ર જાહેર કર્યો છે. સરકારે ટીવી ચેનલોને લાગણીને ખલેલ પહોંચાડતા વીડિયો અને ફોટોગ્રાફ્સનું પ્રસારણ બંધ કરવા સૂચના આપી છે. આ સાથે જ સરકારે ટીવી ચેનલોને ચેતવણી આપી છે કે પ્રોગ્રામ કોડ વિરુદ્ધ લોહી, મૃતદેહો અને શારીરિક હુમલાની તસવીરો દર્શાવવી નહીં છે. તાજેતરમાં ટીવી ચેનલો દ્વારા વિવેકબુદ્ધિના અભાવના અનેક મામલા સામે આવ્યા બાદ મંત્રાલયે આ એડવાઈઝરી (Ministry of Information and Broadcasting Advisory) બહાર પાડી છે.
સૂચના અને પ્રસારણ મંત્રાલય તરફથી એવું કહેવામાં આવ્યું છે કે, સોશિયલ મીડિયા પરથી લેવામાં આવેલા હિંસક વીડિયોને ટીવી ચેનલો દ્વારા એડિટીંગ કર્યા વિના દર્શાવવામાં આવી રહ્યા છે, જેના લીધે મહિલાઓ અને બાળકોના માનસ પર તેની ખરાબ અસર પડી રહી છે. મંત્રાલયે કહ્યું કે ટેલિવિઝન ચેનલોએ વ્યક્તિઓના મૃતદેહ અને ચારે બાજુ લોહીના છાંટા, હિંસા સહિત અકસ્માતો અને ટીવી પર ઘાયલ વ્યક્તિઓના ફૂટેજ અને ફોટોગ્રાફ્સ પણ દર્શાવ્યા હોવાનું ધ્યાન પર આવ્યું છે, જે ખરેખર ચિંતાજનક છે.
મંત્રાલય તરફથી વધુમાં એવું કહેવામાં આવ્યું છે કે લોહી, મૃતદેહો અને શારીરિક હુમલાની તસવીરો ટીવી ચેનલોના પ્રોગ્રામ કોડની વિરુદ્ધ છે. આવા હિંસક સમાચાર બાળકોના મનોવિજ્ઞાન પર વિપરીત અસર કરે છે. સરકારે ઉદાહરણ તરીકે કાર્યક્રમો અને પ્રસારણ સામગ્રીની યાદી બહાર પાડી છે.
- 30.12.2022: અકસ્માતમાં ઘાયલ ક્રિકેટરની દર્દનાક તસવીરો અને વીડિયોને એડિટ અને બ્લર કર્યા વગર બતાવવામાં આવ્યા હતા.
- 28.08.2022: લોહીના છાંટા સાથે શરીરને ખેંચી જતા એક માણસના ખલેલજનક ફૂટેજ બતાવવામાં આવ્યા હતા.
- 06-07-2020: બિહારની રાજધાની પટનામાં કોચિંગ ક્લાસ રૂમમાં એક શિક્ષક 5 વર્ષના છોકરાને નિર્દયતાથી મારતો બતાવવામાં આવ્યો હતો. તેમજ આ વિડિયો ક્લિપ મ્યૂટ કર્યા વિના બતાવવામાં આવી હતી, જેમાં દયાની ભીખ માંગી રહેલા બાળકની દર્દનાક ચીસો સાંભળી શકાય છે. આ વીડિયો ક્લિપ લગભગ 9 મિનિટ સુધી બતાવવામાં આવી હતી.
- 04-06-2022: પંજાબી ગાયકના મૃતદેહના દર્દનાક ચિત્રો અસ્પષ્ટ કર્યા વિના બતાવ્યા.
- 25-05-2022: આસામના ચિરાંગ જિલ્લામાં એક વ્યક્તિએ બે સગીર છોકરાઓને લાકડી વડે નિર્દયતાથી માર્યાની હૃદયદ્રાવક ઘટના વીડિયોમાં બતાવવામાં આવી હતી. વીડિયોમાં, જે વ્યક્તિ નિર્દયતાથી છોકરાઓને લાકડીઓથી મારતો હતો તે સ્પષ્ટ રીતે જોઈ શકાય છે. ક્લિપ અસ્પષ્ટ કે મ્યૂટ કર્યા વિના ચલાવવામાં આવી હતી, જેમાં છોકરાઓના રડવાનો અવાજ પણ સ્પષ્ટ રીતે સાંભળી શકાતો હતો.
- 16-05-2022: કર્ણાટકના બાગલકોટ જિલ્લામાં એક મહિલા એડવોકેટ પર તેના પાડોશી દ્વારા નિર્દયતાથી હુમલો કરવામાં આવ્યો હતો.
- 04-05-2022: તમિલનાડુના વિરુધુનગર જિલ્લાના રાજાપાલયમમાં એક વ્યક્તિ પોતાની જ બહેનની હત્યા કરી રહ્યો છે તેવો વીડિયો.
- 01-05-2022: છત્તીસગઢના બિલાસપુર જિલ્લામાં એક વ્યક્તિને ઝાડ પરથી ઊંધો લટકાવી દેવાનો અને પાંચ લોકો દ્વારા નિર્દયતાથી માર મારવામાં આવ્યો હોવાનો વીડિયો બતાવવામાં આવ્યો હતો.
- 12-04-2022: એક વીડિયોમાં, પાંચ મૃતદેહોના દર્દનાક દ્રશ્યો અસ્પષ્ટ કર્યા વિના સતત બતાવવામાં આવ્યા હતા.
- 11-04-2022: કેરળના કોલ્લમમાં એક વ્યક્તિ તેની 84 વર્ષીય માતા પર નિર્દયતાથી હુમલો કરતો બતાવવામાં આવ્યો હતો, 12 મિનિટના વિડિયોમાં અસ્પષ્ટતા વિના એક માણસ તેની માતાને સતત મારતો અને નિર્દયતાથી મારતો જોઈ શકાય છે.
- 07-04-2022: બેંગલુરુમાં એક વૃદ્ધ વ્યક્તિ તેના પુત્ર પર અસ્પષ્ટતા વિના સળગતી માચીસની સ્ટિક ફેંકી રહ્યો હોવાનો વીડિયો વારંવાર પ્રસારિત થયો છે.
- 22-03-2022: આસામના મોરીગાંવ જિલ્લામાં 14 વર્ષના સગીર છોકરાને માર મારવામાં આવ્યો હોવાનો વિડિયો અસ્પષ્ટ અને મ્યૂટ કર્યા વિના ચલાવવામાં આવ્યો હતો. વીડિયોમાં, છોકરો રડતો અને વિનંતી કરતો સાંભળી શકાય છે કારણ કે તેને નિર્દયતાથી મારવામાં આવ્યો હતો.
