નવી દિલ્હી: ભારતીય ક્રિકેટ ટીમના () પૂર્વ કેપ્ટન વિરાટ કોહલી આજે 5 નવેમ્બરના રોજ 34 વર્ષનો થઈ ગયો છે. આ અવસર પર વિશ્વભરમાં હાજર રહેલા ચાહકોમાં ભારે ઉત્સાહ જોવા મળી રહ્યો છે. હાલમાં કિંગ કોહલી ઓસ્ટ્રેલિયામાં T20 વર્લ્ડ કપ 2022 રમી રહ્યો છે. પરંતુ આ દરમિયાન ચાહકોએ કેક કાપીને તેનો જન્મદિવસ ઉજવ્યો હતો.
તમને જણાવી દઈએ કે T20 વર્લ્ડ કપમાં ભારતીય ટીમ અત્યાર સુધી પોતાની 4 મેચ રમી ચુકી છે અને તે 6 પોઈન્ટ સાથે સેમીફાઈનલની ઉંબરે ઉભી છે. હવે ભારતીય ટીમે આવતીકાલે 6 નવેમ્બરને રવિવારના રોજ ઝિમ્બાબ્વે સામે સુપર-12ના તેના ગ્રુપ-2માં છેલ્લી મેચ રમવાની છે. કોહલી અને ટીમ આ મેચ માટે મેલબોર્ન પહોંચી ગયા છે.
આ દરમિયાન મેલબોર્નમાં વિરાટ કોહલીના ચાહકોએ કેક કાપીને જન્મદિવસની ઉજવણી કરી હતી. તેનો વીડિયો ન્યૂઝ એજન્સી શેર કર્યો છે. વીડિયોમાં તમે જોઈ શકો છો કે કેવી રીતે કોહલીની ફેન છોકરીઓ હેપ્પી બર્થ ડે ગાતી વખતે કેક કાપે છે. કેક પર ‘હેપ્પી બર્થ ડે વિરાટ કોહલી’ લખેલું જોવા મળે છે.
વીડિયો જોવા માટે અહીં ક્લીક કરો
આ વીડિયોમાં તમામ ફેન્સ ‘ગો ઈન્ડિયા’, ‘ગો વિરાટ કોહલી’ના નારા લગાવતા પણ જોવા મળે છે. આ તમામ ચાહકોએ કોહલીના લાંબા આયુષ્ય માટે પ્રાર્થના કરતું ગીત પણ ગાયું હતું. બધા ચાહકો ગાતા જોવા મળે છે, ‘બાર બાર દિન યે આયે, બાર બાર દિલ યે ગયે, તુમ જિયો હજાર સાલ… યે મેરી હૈ આરઝૂ… હેપ્પી બર્થ ડે ટુ યુ… કિંગ કોહલી.’
કોહલીએ વર્લ્ડ કપમાં પોતાનું જોરદાર પ્રદર્શન જારી રાખ્યું છે
વિરાટ કોહલીએ ટી20 વર્લ્ડ કપ 2022 સીઝનમાં અત્યાર સુધી ચાર મેચ રમી છે, જેમાં તેણે 220 રન બનાવ્યા છે. કોહલી T20 ઈન્ટરનેશનલમાં સૌથી વધુ રન બનાવનાર બેટ્સમેન છે. કોહલીએ અત્યાર સુધી T20 ઈન્ટરનેશનલમાં 113 મેચ રમી છે, જેમાં તેણે 105 ઈનિંગમાં 3932 રન બનાવ્યા છે. આ દરમિયાન કોહલીએ એક સદી અને 36 અડધી સદી ફટકારી હતી.
આ સિવાય કોહલીએ અત્યાર સુધી 102 ટેસ્ટ મેચ રમી છે, જેમાં તેણે 49.53ની શાનદાર એવરેજથી 8074 રન બનાવ્યા છે. વનડેમાં પણ કોહલીએ 262 મેચ રમી હતી જેમાં તેની એવરેજ 57.68 હતી. કોહલીએ વનડેમાં 12344 રન બનાવ્યા છે. આંતરરાષ્ટ્રીય ક્રિકેટમાં 71 સદી ફટકારનાર કોહલી સંયુક્ત બીજા બેટ્સમેન છે.
