અનન્યા પાંડે ‘ગહેરાઇયા’થી તેનું 2022નું વર્ષ શરૂ કરી ચૂકી હોત પણ ખરે, હવે ફેબ્રુઆરીથી કરશે. અનન્યા માટે હમણાં ખરાબ સમય પણ ગયો છે પણ ફિલ્મમાં કામ કરનાર માટે પરદા પરનું જીવન જ વધારે મહત્ત્વું છે. ‘સ્ટૂડન્ટ ઓફ ધ યર-2’થી કારકિર્દી શરૂ કર્યાને હજુ ત્રણ જ વર્ષ પુરા થયા કહેવાય પણ અત્યારે તેની પાસે ત્રણેક ફિલ્મો છે એ જોતાં તે સારી સ્થિતિમાં ગણાય. કારકિર્દીના આરંભે જ કોરોનાનાં સંજોગ ઊભા થતાં તેણે પછડાટ જરૂર અનુભવવી પડી છે પણ આ વિશે ફરિયાદ કરવાનો અર્થ નથી એવું સમજી ચૂકી છે એટલે કામ પર ધ્યાન આપે છે. તે જાણે છે કે સારા અલી ખાન, જાન્હ્વી કપૂર સહિત ઘણી બધી યુવા અભિનેત્રીઓ વચ્ચે તે ઊભી છે. અનન્યા પરદા પર સોહામણી લાગે છે. તેનું સ્મિત તરત દોસ્તી કરી લે એવું છે પણ આ જ કારણે તેને અમુક મેચ્યોર પાત્રો મળતા નથી. શકુન બત્રાની ‘ગહેરાઇયાં’માં દિપીકા પાદુકોણ મુખ્ય ભુમિકામાં છે.
આમ છતાં અનન્યા તેની ફેશનેસને કારણે પ્રેક્ષકોનું ધ્યાન ખેંચશે એ નકકી છે. ફિલ્મના દિગ્દર્શક શકુન બત્રા કહે છે કે મારા માટે આ ફકત ફિલ્મ નથી બલ્કે માનવસંબંધોની યાત્રા છે. આજની એડલ્ટ રિલેશનશીપના મિરર જેવી આ ફિલ્મ છે. અનન્યા આ ફિલ્મ પર વધારે ભરોસો એટલે પણ ધરાવે છે તેના નિર્માતા કરણ જોહર છે. ખાલીપીલી’માં ઇશાન ખટ્ટર સાથે કામ કરી ચૂકેલી અનન્યા સારા વિષયની ફિલ્મ છોડવા માંગતી નથી એટલે દિપીકાની મુખ્ય હાજરી છતાં તે ‘ગહેરાઇયાં’ માટે તૈયાર થઇ હતી. તેની આવનારી ફિલ્મ ‘લાઇગર’ પણ કરણ જોહરની જ છે અને તે ફિલ્મ તેલુગુ અને હિન્દીમાં સમાંતરે બની રહી છે. વિજય દેવરકોન્ડા સાથેની એ ફિલ્મ તેની કારકિર્દી માટે ખાસ પુરવાર થાય તો નવાઇ નહીં. એ ફિલ્મમાં અમેિરકાનો પ્રોફેશનલ બોકસર રહેલો માઇક ટાઇસન પણ કામ કરી રહ્યો છે અને ત્યાર પછી ઝોયા અખ્તર, રીમા કાગતીની લખેલી ‘ખો ગયે હમ કહાં’ તેની પાસે છે. સિધ્ધાંત ચતુર્વેદી સાથેની તેની આ બીજી ફિલ્મ હશે. અનન્યા વરુણ ધવન, ટાઇગર શ્રોફ જેવા નવી પેઢીના પણ જાણીતા સ્ટાર્સ સાથે હજુ િફલ્મો મેળવી શકતા નથી.
સામાન્યપણે તે ઓછા જાણીતા અભિનેતા સાથે જ કામ કરે છે પણ એ ફિલ્મના નિર્માતા-દિગ્દર્શક તેને નવી શકયતા તરફ દોરવે છે. અનન્યા પાંડે ઇશાન ખટ્ટર સાથે સિરીયસ રિલેશનશીપમાં હોવાનું મનાય છે. હમણાં તે બંનેએ નવા વર્ષની ઉજવણી પણ સાથે જ કરેલી. જોકે બંનેએ ખુલ્લામાં આ સંબંધ સ્વીકાર્યો નથી. પરંતુ રણથંભોર નેશનલ પાર્કમાં તેઓ વેકેશન ગુજારી આવ્યા છે પરંતુ અત્યારે કાંઇ કહેવું ન જોઇએ કારણકે ‘ધડક’ વખતે ઇશાન અને જાન્હ્વીના સંબંધની ય ચર્ચા રહી હતી. અનન્યાને પણ કાર્તિક આર્યન સાથે મૈત્રી હોવાની ચર્ચા રહી હતી. ફિલ્મસ્ટાર્સના સંંબંધો ફિલ્મ શરૂ થવા સાથે શરૂ થાય ને ફિલ્મ પુરી થતાં પુરા થાય એવું અનેકવાર બન્યું છે. અનન્યાએ હજુ ખૂબ કામ કરવાનું છે એટલે ઉતાવળી તો ન જ હશે.
