ગેરકાયદે જમીન પચાવી પાડવા માટે ખેડૂત હોવાનું બોગસ પ્રમાણપત્ર રજૂ કર્યું હતું.
કરજણ પોલીસ દ્વારા લેન્ડ ગ્રેબિંગનો ગુનો નોંધી આરોપીની ધરપકડ કરાઇ
પ્રતિનિધિ વડોદરા તા.12
વડોદરા જિલ્લાના છંછવા ગામની જમીન ગેરકાયદે પચાવી પાડવા માટે બોગસ ખેડૂત હોવાનું પ્રમાણપત્ર રજૂ કરનાર ભંવરલાલની કરજણ પોલીસ દ્વારા ધરપકડ કરી લેવામાં આવી હતી. તેની વધુ પુછપરછ કરવા માટે કોર્ટમાં રજૂ કરીને સાત દિવસના રિમાન્ડની માગણી કરતા કોર્ટે બે દિવસના રિમાન્ડ મંજુર કર્યા છે.
વડોદરા શહેરના છાણી વિસ્તારમાં રહેતા ભુમાફિયા ભંવરલાલ લક્ષ્મીનારાયણ ગૌડ પોતે ખેડૂત ન હોવા છતાં છંછવા ગામની સીમમાં આવેલી બેલીમ મંગલભાઇ ઉર્ફે મહંમદભાઇ મોજમભાઇની જમીન વર્ષ 1999માં રજિસ્ટ્ર વેચાણ દસ્તાવેજથી રાખી હતી. ભંવરલાલે ખાતેદાર હોવાના પુરાવા રજૂ કર્યા હતા જેની કરજણ સર્કલ ઓફિસરે નોધ કરી હતી અને મામલતદારે ખોટા ખાતેદારના પુરાવા રજૂ કર્યા હોય ભંવરલાલ ગૌડને નોટિસ આપી તપાસ કરી હતી. દરમિયાન તેઓએ આજોડમાં ખેડૂત ખાતેદાર અને જમીન પણ ધરાવતા હતા. જે જમીન એક્સપ્રેસ વેના માટે સંપાદન થઇ હતી. જેનો એવોર્ડ પણ રજૂ કરાયો હતો. 18 નવેમ્બરે ભંવરલાલ વિરુદ્ધ ખોટુ ખેડૂત પ્રમાણપત્ર રજૂ કર્યું હોવાની કલેક્ટરમાં રજૂઆત કરાઇ હતી. જેની તપાસ મામલતદાર દ્વારા કરવામાં આવી હતી. જેમા જાણવા મળ્યું હતું કે આજોડ ગામની જમીનમાં મહાશંકરભાઇ ઇચ્છારામ પંડ્યાનું નામ ખાતેદાર તરીકે દર્શાવ્યું હતું. જ્યારે ભંવરલાલ ગૌડના નામનો કોઇ ઉલ્લેખ નથી. જેની મામલતદાર દ્વારા સુનાવણી કરાતા આરોપી દ્વારા રજૂ કરાયેલું ખેડૂત હોવાનુ પ્રમાણત્ર બનાવટી હોવાનું જાણવા મળ્યું હતું. જેથી કલેક્ટર દ્વારા 10 ડિસેમ્બરના રોજ ભંવરલાલ ગૌડ વિરુદ્ધ ફોજદારી કાર્યવાહી કરવા માટે હુકમ કરતા કરજણ તાલુકા મામલતદાર દિનેશકુમાર પટેલ દ્વારા ભંવરલાલ વિરુદ્ધ લેન્ડ ગ્રેબિંગની ફરિયાદ નોંધાવતા પોલીસે તેની ધરપકડ કરી હતી. 12 ડિસેમ્બરે તેને કોર્ટમાં રજૂ કરી 7 દિવસના દિવસના રિમાન્ડની માગણી કરતા 2 દિવસના કોર્ટે રિમાન્ડ મંજુર કર્યા છે.
