છોટાઉદેપુર જિલ્લાના ભાજપ મહામંત્રીમાં કેન્દ્રીય નેતૃત્વનો વિશ્વાસ, કાર્યકરોમાં આનંદની લાગણી
સંગઠન માટે વર્ષો સુધી કરેલી નિષ્ઠાવાન સેવાઓનું ફળ, આદિવાસી વિસ્તારને મળશે મજબૂત પ્રતિનિધિત્વ
વડોદરા: છોટાઉદેપુર જિલ્લાના ભાજપ મહામંત્રી અને આદિવાસી સમાજના અગ્રણી નેતા મુકેશભાઈ રાઠવાની ભારતીય જનતા પાર્ટી દ્વારા રાજ્યસભાના ઉમેદવાર તરીકે પસંદગી કરવામાં આવતા જિલ્લામાં આનંદ અને ગૌરવની લાગણી છવાઈ ગઈ છે. ભાજપની કેન્દ્રીય ચૂંટણી સમિતિએ રાજ્યસભાની દ્વિવાર્ષિક ચૂંટણી-2026 માટે ગુજરાતમાંથી જાહેર કરેલા ઉમેદવારોમાં મુકેશભાઈ રાઠવાનું નામ સામેલ કર્યું છે.
ભાજપ દ્વારા જાહેર કરાયેલી યાદી અનુસાર ગુજરાતમાંથી રાજુભાઈ શુક્લા, મુકેશભાઈ રાઠવા, માનસિંહ પરમાર અને જિતેન્દ્ર મેઘજીભાઈ કંજારિયાને રાજ્યસભા માટે ઉમેદવાર તરીકે પસંદ કરવામાં આવ્યા છે. તેમાં મુકેશભાઈ રાઠવાની પસંદગીને ખાસ મહત્વપૂર્ણ માનવામાં આવી રહી છે, કારણ કે તેઓ સંગઠનના પાયાના કાર્યકર તરીકે લાંબા સમયથી પક્ષ માટે કાર્યરત રહ્યા છે.
મુકેશભાઈ રાઠવાએ આદિવાસી વિસ્તાર અને ગ્રામ્ય સમાજ વચ્ચે ભાજપના સંગઠનને મજબૂત બનાવવા મહત્વપૂર્ણ ભૂમિકા ભજવી છે. તેઓ અનેક વર્ષોથી પક્ષના વિવિધ હોદ્દાઓ પર રહીને સંગઠનને સશક્ત બનાવવાના પ્રયાસોમાં સક્રિય રહ્યા છે. તેમની સાદગી, સંગઠન પ્રત્યેની નિષ્ઠા અને કાર્યકરો સાથેના સતત સંપર્કને કારણે તેઓ જિલ્લાના કાર્યકરોમાં લોકપ્રિય નેતા તરીકે ઓળખાય છે.
તેમની રાજ્યસભા ઉમેદવાર તરીકેની પસંદગી બાદ છોટાઉદેપુર સહિત સમગ્ર આદિવાસી પટ્ટામાં ભાજપ કાર્યકરો અને સમર્થકોમાં ઉત્સાહનો માહોલ જોવા મળી રહ્યો છે. કાર્યકરોનું માનવું છે કે ભાજપે ફરી એકવાર પાયાના કાર્યકરની કદર કરી છે અને નિષ્ઠાપૂર્વક કામ કરનારા કાર્યકરોને યોગ્ય સ્થાન આપવાની પોતાની પરંપરા જાળવી રાખી છે.
રાજ્યસભામાં મુકેશભાઈ રાઠવાની સંભવિત એન્ટ્રીથી આદિવાસી સમાજના પ્રશ્નો અને વિકાસના મુદ્દાઓને રાષ્ટ્રીય સ્તરે વધુ મજબૂત અવાજ મળશે તેવી આશા વ્યક્ત કરવામાં આવી રહી છે.
