મુંબઈ: (Mumbai) આદિત્ય ચોપરાએ યશરાજ ફિલ્મ્સની (Yashraj Films) તેની ચાર મોટી મોટી ફિલ્મોની (Film) રિલીઝ તારીખો જાહેર કરી છે. આ ફિલ્મોમાં બંટી ઔર બબલી 2, પૃથ્વીરાજ, જયેશભાઈ જોરદાર અને શમશેરાનો સમાવેશ થાય છે. બીજી તરફ રોહિત શેટ્ટી (Rohit Shetty) પણ તેની ફિલ્મ સૂર્યવંશી દિવાળીમાં રિલીઝ કરશે. બીજી તરફ ડિઝનીએ દિવાળીના અવસર પર તેની બહુપ્રતિક્ષિત ફિલ્મ ‘ઈટર્નલ્સ’ ભારતમાં રિલીઝ કરવાની જાહેરાત કરી દીધી છે.
આદિત્ય ચોપરાએ યશરાજ ફિલ્મ્સની તેની ચાર મોટી મોટી ફિલ્મોની રિલીઝ તારીખો જાહેર કરી છે. વરુણ વી.શર્મા દ્વારા નિર્દેશિત બંટી ઔર બબલી 19 નવેમ્બર, 2021 ના રોજ રિલીઝ થશે. આ ફિલ્મમાં સૈફ અલી ખાન, રાની મુખર્જી, સિદ્ધાંત ચતુર્વેદી અને નવોદિત શર્વરી જોવા મળશે. યશ રાજ ફિલ્મ્સની મોટા બજેટની ફિલ્મ પૃથ્વીરાજ 21 જાન્યુઆરી, 2022 ના રોજ વિશ્વભરમાં રિલીઝ થશે. આ ફિલ્મમાં સુપરસ્ટાર અક્ષય કુમાર રાજા પૃથ્વીરાજ ચૌહાણની ભૂમિકામાં જોવા મળશે. મિસ વર્લ્ડ માનુષી છિલ્લર તેની પ્રથમ ફિલ્મમાં સંયોગિતાની ભૂમિકા ભજવશે. આ ફિલ્મનું નિર્દેશન ડો.ચંદ્રપ્રકાશ દ્વિવેદીએ કર્યું છે.
રણવીર સિંહ અને શાલિની પાંડે અભિનીત ફિલ્મ જયેશભાઈ જોરદાર આગામી વર્ષે 25 ફેબ્રુઆરીએ મોટા પડદા પર આવશે. દિવ્યાંગ ઠક્કર દ્વારા નિર્દેશિત આ ફિલ્મમાં રણવીર એક ગુજરાતી માણસની ભૂમિકા ભજવતો જોવા મળશે. સુપરસ્ટાર રણબીર કપૂર અભિનીત શમશેરા આવતા વર્ષે 18 માર્ચે રિલીઝ થશે. આ ફિલ્મમાં રણબીર કપૂર સાથે અભિનેત્રી વાણી કપૂર પણ જોવા મળશે. કરણ મલ્હોત્રા દ્વારા નિર્દેશિત આ ફિલ્મમાં સંજય દત્ત પણ મુખ્ય ભૂમિકામાં જોવા મળશે.
રોહિત શેટ્ટી પોતાની ફિલ્મો લઈ દિવાળીમાં મેદાનમાં ઉતરશે
આ વર્ષની દિવાળી બોક્સ ઓફિસ પર ધમાકેદાર સાબિત થવાની છે. દિગ્દર્શક રોહિત શેટ્ટીએ દિવાળી પર પોતાની ફિલ્મ ‘સૂર્યવંશી’ રિલીઝ કરવાની જાહેરાત કરીને ફિલ્મના શોખીનોની મજા બમણી કરી દીધી છે. તેનું કારણ એ છે કે ડિઝનીએ દિવાળીના અવસર પર તેની બહુપ્રતિક્ષિત ફિલ્મ ‘ઈટર્નલ્સ’ ભારતમાં રિલીઝ કરવાની જાહેરાત કરી દીધી છે. જ્યારે ‘સૂર્યવંશી’ હિન્દી સિનેમામાં બનેલા રોહિત શેટ્ટીના પોલીસ બ્રહ્માંડનો નવો અધ્યાય લખશે, ત્યારે ‘ઇટર્નલ્સ’ દ્વારા માર્વેલ સિનેમેટિક બ્રહ્માંડમાં એવેન્જર્સનું નવું પ્રકરણ શરૂ થવા જઈ રહ્યું છે. માર્વેલ સિનેમેટિક યુનિવર્સની ફિલ્મોએ ભૂતકાળમાં ભારતમાં ઘણી કમાણી કરી છે અને આ વખતે પણ ડિઝનીને આશા છે કે આ ફિલ્મ ભારતીય દર્શકોને પસંદ આવશે. આ કારણે, આ ફિલ્મ અંગ્રેજી સિવાય પાંચ ભારતીય ભાષાઓમાં ડબ અને રિલીઝ થઈ રહી છે.
