શહેરા: પંચમહાલ જિલ્લાના શહેરા તાલુકાના નાડા ગામે રહેતો પ્રવિણ ગોવિંદભાઈ બારીઆ ગઈ કાલે સાંજના સમયે તેના કુંટુંબી સુરેશ સરદારભાઈ બારીઆ અને અશ્વિન બુધાભાઈ બારીઆને સાથે લઈને બાઈક ઉપર સાજીવાવ ગામે રહેતા તેના મામાના ઘરે ગયો હતો,અને પોતાના મામાના ઘરેથી જમી પરવારીને રાત્રિના આઠેક વાગ્યે પરત નાડા ગામે પોતાના ઘરે જવા રવાના થયા હતા.
ત્યારે શહેરા-નાડા રોડ પર આવેલ ગુગલીયા પાટીયા નજીક રોડની સાઈડમાં આવેલ વિજ થાંભલા સાથે તેઓની બાઈક ધડાકાભેર અથડાતા અકસ્માત સર્જાયો હતો, જેને લઈને બાઈક ઉપર સવાર ત્રણેય યુવકો ગંભીર રીતે પછડાતા સુરેશ બારીઆ અને પ્રવિણ બારીઆનું ઘટના સ્થળે મોત નીપજ્યું હતું.
જ્યારે અશ્વિનને મોઢાના ભાગે ગંભીર ઈજાઓ પહોંચતા તેને ૧૦૮ એમ્બ્યુલન્સમાં સારવાર અર્થે શહેરા રેફરલ હોસ્પિટલમાં ખસેડવામાં આવ્યો હતો, જ્યાંથી વધુ સારવાર અર્થે ગોધરા તેમજ વડોદરા ખાતે ખસેડાયો હતો.આ અકસ્માતમાં મોત થયેલ સુરેશ અને પ્રવિણના મૃતદેહને શહેરા પોસ્ટમોર્ટમ માટે લવાયા હતા.જોકે વિજ થાંભલા સાથે ધડાકાભેર બાઈક અથડાતા વિજ થાંભલો વાંકો થઈ ગયો હતો.
