IPL 2026માં આજની બીજી મેચમાં રાજસ્થાન રોયલ્સ (RR) અને સનરાઇઝર્સ હૈદરાબાદ (SRH) વચ્ચે જયપુરના સવાઈ માનસિંહ સ્ટેડિયમમાં રોમાંચક મુકાબલો રમાઈ રહ્યો છે. હૈદરાબાદે ટૉસ જીતીને પહેલા બોલિંગ કરવાનો નિર્ણય લીધો છે. આ મેચમાં ટીમ માટે સારા સમાચાર એ છે કે નિયમિત કેપ્ટન પેટ કમિન્સ ફરીથી ટીમમાં પરત ફર્યો છે અને તે દિલશાન મદુશંકાના સ્થાને રમી રહ્યો છે. આ સીઝનમાં બંને ટીમો બીજી વખત આમને-સામને આવી રહી છે. અગાઉ 13 એપ્રિલે રમાયેલી મેચમાં હૈદરાબાદે રાજસ્થાનને 57 રને હરાવ્યું હતું. હાલની સ્થિતિમાં રાજસ્થાન રોયલ્સે 7માંથી 5 મેચ જીતી છે, જ્યારે હૈદરાબાદે 7માંથી 4 જીત મેળવી છે. ખાસ વાત એ છે કે SRH પોતાની છેલ્લી ત્રણેય મેચ સતત જીતીને આત્મવિશ્વાસથી ભરપૂર છે.
હેડ-ટુ-હેડ આંકડાઓ પર નજર કરીએ તો હૈદરાબાદનું પલડું ભારે રહ્યું છે. બંને ટીમ વચ્ચે અત્યાર સુધીમાં 22 મેચ રમાઈ છે, જેમાંથી SRHએ 13 અને RRએ 9 મેચ જીતી છે. જોકે, જયપુરના આ મેદાન પર બંને ટીમો વચ્ચે 4 મેચ રમાઈ છે અને બંનેએ 2-2 મેચ જીતી છે, એટલે હોમ ગ્રાઉન્ડ પર રાજસ્થાન માટે તક સરખી છે. રાજસ્થાન માટે યુવા બેટર વૈભવ સૂર્યવંશી આ સીઝનમાં સૌથી મોટી શક્તિ બનીને ઉભર્યો છે. તેણે માત્ર 7 મેચમાં જ 254 રન બનાવ્યા છે અને તેનો સ્ટ્રાઇક રેટ 220.86 જેટલો જબરદસ્ત રહ્યો છે. બોલિંગમાં જોફ્રા આર્ચર મહત્વપૂર્ણ ભૂમિકા ભજવી રહ્યો છે, જેમણે 7 મેચમાં 11 વિકેટ ઝડપી છે. બીજી તરફ હૈદરાબાદ માટે અભિષેક શર્મા શાનદાર ફોર્મમાં છે. તેણે 7 મેચમાં 323 રન બનાવ્યા છે, જેમાં 1 સદી અને 2 અડધી સદી સામેલ છે. તેનો સ્ટ્રાઇક રેટ 215.33 છે, જે તેની આક્રમક બેટિંગ બતાવે છે. બોલિંગમાં ઇશાન મલિંગા ટીમનો મુખ્ય હથિયાર છે, જેમણે 7 મેચમાં 12 વિકેટ લીધી છે અને પર્પલ કેપની રેસમાં છે.
પીચની વાત કરીએ તો સવાઈ માનસિંહ સ્ટેડિયમની પીચ બેટિંગ અને બોલિંગ બંને માટે સંતુલિત માનવામાં આવે છે. જોકે સાંજના મેચમાં ઝાકળ મહત્વપૂર્ણ ફેક્ટર બની શકે છે, જેના કારણે બીજી ઇનિંગમાં બોલિંગ કરવી મુશ્કેલ બની શકે છે. આ જ કારણ છે કે ટૉસ જીતનારી ટીમે પહેલા બોલિંગ પસંદ કરી. આ મેદાન પર અત્યાર સુધી 64 IPL મેચ રમાઈ છે, જેમાંથી 64% મેચ પહેલા બોલિંગ કરનારી ટીમે જીતી છે. તેથી SRHનો નિર્ણય આંકડાઓ મુજબ યોગ્ય ગણાય છે. હવે જોવાનું રહેશે કે રાજસ્થાન પોતાની હોમ ગ્રાઉન્ડ પર મજબૂત સ્કોર ઉભો કરે છે કે હૈદરાબાદની બોલિંગ ટીમ તેને રોકવામાં સફળ થાય છે.
