વિદ્યાર્થીઓના વિરોધ પ્રદર્શન દરમિયાન થયેલા પોલીસ લાઠીચાર્જના મુદ્દે રાજકારણ વધુ ગરમાયું છે. લોકસભામાં વિપક્ષના નેતા રાહુલ ગાંધીએ કેન્દ્રીય ગૃહમંત્રી અમિત શાહને પત્ર લખીને પોલીસ કાર્યવાહીને લઈને ગંભીર સવાલો ઉઠાવ્યા છે. તેમણે શાંતિપૂર્ણ રીતે વિરોધ કરી રહેલા વિદ્યાર્થીઓ પર લાઠીચાર્જ કરવાના નિર્ણય અંગે કેન્દ્ર સરકાર પાસેથી સ્પષ્ટતા માગી છે. રાહુલ ગાંધીએ પોતાના પત્રમાં પૂછ્યું છે કે, શાંતિપૂર્ણ રીતે પ્રદર્શન કરી રહેલા વિદ્યાર્થીઓ પર લાઠીચાર્જ કરવાનો આદેશ આખરે કોણે આપ્યો હતો? તેમણે આ ઘટનાને લોકશાહી મૂલ્યો વિરુદ્ધ ગણાવી જવાબદારી નક્કી કરવાની માંગ કરી છે.
પત્રમાં રાહુલ ગાંધીએ વધુ એક મહત્વનો સવાલ ઉઠાવ્યો છે કે, વિદ્યાર્થીઓ સામે બળપ્રયોગ કરવાની જરૂર શા માટે પડી? તેમણે કહ્યું કે લોકશાહી દેશમાં પોતાની માંગણીઓ રજૂ કરવાનો દરેક નાગરિકને અધિકાર છે અને આવા પ્રદર્શનને દમનથી નહીં પરંતુ સંવાદથી ઉકેલવા જોઈએ. તાજેતરમાં વિદ્યાર્થીઓ દ્વારા યોજાયેલા વિરોધ પ્રદર્શન દરમિયાન પોલીસે લાઠીચાર્જ કર્યો હોવાના અહેવાલો સામે આવ્યા હતા. આ ઘટનામાં અનેક વિદ્યાર્થીઓને ઈજાઓ પહોંચી હોવાનું પણ જણાવાયું હતું. આ ઘટનાને લઈને વિવિધ રાજકીય પક્ષો અને વિદ્યાર્થી સંગઠનો દ્વારા પણ વિરોધ નોંધાવવામાં આવ્યો છે.
રાહુલ ગાંધીએ પોતાના પત્રમાં કેન્દ્ર સરકારને અપીલ કરી છે કે સમગ્ર ઘટનાની નિષ્પક્ષ તપાસ કરાવવામાં આવે અને જો કોઈ અધિકારી અથવા જવાબદાર વ્યક્તિ દ્વારા અતિશય બળપ્રયોગનો આદેશ આપવામાં આવ્યો હોય તો તેની સામે યોગ્ય કાર્યવાહી કરવામાં આવે. કોંગ્રેસે આ મુદ્દે સરકાર પર નિશાન સાધતાં જણાવ્યું છે કે વિદ્યાર્થીઓના અવાજને દબાવવાનો પ્રયાસ લોકશાહી માટે યોગ્ય નથી. બીજી તરફ આ મુદ્દે રાજકીય ચર્ચાઓ વધુ તેજ બની છે અને આગામી દિવસોમાં આ મુદ્દે વધુ પ્રતિક્રિયાઓ સામે આવે તેવી શક્યતા છે.
