TMCના આરોપો પર ચૂંટણી આયોગનો સ્પષ્ટ જવાબ
પશ્ચિમ બંગાળ વિધાનસભા ચૂંટણી 2026ના મતદાન બાદ કોલકાતામાં EVM સ્ટ્રોંગ રૂમને લઈને રાજકીય વિવાદ વધુ તીવ્ર બન્યો છે. તૃણમૂલ કોંગ્રેસ (TMC) દ્વારા બેલેટ બોક્સ અને EVM સાથે ગડબડના આરોપો લગાવવામાં આવ્યા બાદ ચૂંટણી આયોગે આ તમામ આરોપોને નકારી કાઢ્યા છે અને જણાવ્યું છે કે EVM સંપૂર્ણ સુરક્ષિત છે.
ચૂંટણી અધિકારીઓએ સ્પષ્ટ કર્યું કે હાલમાં જે પ્રક્રિયા ચાલી રહી હતી તે પોસ્ટલ બેલેટ (ટપાલ મતપત્રો)ની છટણી સંબંધિત નિયમિત પ્રક્રિયા હતી. આ પ્રક્રિયા EVMથી અલગ હોય છે અને તે ચૂંટણીના નિયમો મુજબ કરવામાં આવે છે.અધિકારીઓએ જણાવ્યું કે EVM સ્ટ્રોંગ રૂમ અલગ અને સીલબંધ રાખવામાં આવ્યા છે.
TMCએ લગાવ્યા ગંભીર આરોપ
TMC નેતાઓએ આરોપ લગાવ્યો હતો કે કોલકાતાના સ્ટ્રોંગ રૂમમાં કેટલાક લોકો દ્વારા બેલેટ બોક્સ ખોલવાની કાર્યવાહી કરવામાં આવી રહી હતી અને પાર્ટીના પ્રતિનિધિઓ હાજર નહોતા. પાર્ટીએ CCTV ફૂટેજનો ઉલ્લેખ કરીને ચૂંટણી પ્રક્રિયામાં ગડબડના આક્ષેપ કર્યા હતા. આ મુદ્દે TMC ઉમેદવારો અને નેતાઓએ સ્ટ્રોંગ રૂમ બહાર ધરણા પણ કર્યા હતા અને ચૂંટણી પ્રક્રિયાની પારદર્શકતા અંગે પ્રશ્નો ઉઠાવ્યા હતા.
ચૂંટણી આયોગનો જવાબ – EVM સંપૂર્ણ સુરક્ષિત
ચૂંટણી આયોગે પોતાના સ્પષ્ટીકરણમાં જણાવ્યું કે તમામ સ્ટ્રોંગ રૂમ સીલ અને સુરક્ષા વ્યવસ્થાની ત્રણ સ્તરની વ્યવસ્થા હેઠળ રાખવામાં આવ્યા છે, જેથી કોઈ અનધિકૃત વ્યક્તિ પ્રવેશ ન કરી શકે.આયોગે વધુમાં જણાવ્યું કે પોસ્ટલ બેલેટની છટણીની પ્રક્રિયા અંગે તમામ રાજકીય પક્ષોને અગાઉથી જાણ કરવામાં આવી હતી અને તે નિયમ મુજબ કરવામાં આવી રહી હતી.
કોલકાતામાં રાજકીય તણાવ વધ્યો
આ સમગ્ર ઘટનાક્રમ બાદ કોલકાતાના અનેક સ્ટ્રોંગ રૂમ કેન્દ્રો પર TMC અને BJP વચ્ચે તણાવપૂર્ણ પરિસ્થિતિ સર્જાઈ હતી. મુખ્યમંત્રી મમતા બેનર્જીએ પણ સ્ટ્રોંગ રૂમની મુલાકાત લઈને સુરક્ષા વ્યવસ્થાની સમીક્ષા કરી હતી અને ચૂંટણી પ્રક્રિયા પારદર્શક રહે તે માટે પાર્ટી કાર્યકરોને નજર રાખવા અપીલ કરી હતી. બીજી તરફ ચૂંટણી આયોગે ખાતરી આપી છે કે મત ગણતરી સુધી તમામ EVM સંપૂર્ણ સુરક્ષિત રહેશે અને સુરક્ષા ભંગ કરવાનો પ્રયાસ કરનાર સામે કડક કાર્યવાહી કરવામાં આવશે.
