સુરત: (Surat) ડીંડોલીમાં આવેલ શ્રીનાથનગર સોસાયટીના રહીશોએ ગણેશ વિસર્જન (Ganesh Visarjan) માટે ખોદેલા 10 ફૂટ ઊંડા ખાડામાં 5 વર્ષના બાળકનું ડૂબી (Drowned) જતાં મોત થયું હતું. પરિવારમાં ત્રણ સંતાન પૈકી સૌથી નાના પુત્રનું મોત થયું હતું.
- ડિંડોલીમાં ગણેશ વિસર્જન માટે ખોદેલા ખાડામાં 5 વર્ષના બાળકનું ડૂબી જતાં મોત
- શ્રીનાથનગર સોસાયટીના રહીશોએ ગણેશ વિસર્જન માટે 10 ફૂટ ઉંડો ખાડો ખોદયો હતો
ડીંડોલી પોલીસ પાસેથી મળતી માહિતી મુજબ નવાગામ ડીંડોલી ખાતે આવેલ શ્રીનાથનગરમાં રહેતા રાજેશભાઇ ચૌહાણ જરીનું કામ કરી પત્ની અને ત્રણ સંતાનનું ભરણપોષણ કરે છે. રાજેશભાઇનો સૌથી નાનો પુત્ર સત્યમ( 5 વર્ષ) છે. સોસાયટીના લોકોએએ ગણેશજીની મૂર્તિઓના વિસર્જના માટે સોસાયટીમાં જ 10 ફૂટ ખાડો ખોધ્યો હતો. સત્યમ શુક્રવારે બપોરે ગણેશજીની મૂર્તિઓના વિસર્જન માટે ખોદેલા 10 ફૂટ ઊંડા ખાડામાં ડૂબી ગયો હતો. જેના કારણે તેનું મોત થયું હતું. સત્યમ લાપતા થતાં તેની માતાએ શોધખોળ કરી હતી. જેમાં આખરે ખાડામાંથી સત્યમનો મૃતદેહ મળી આવ્યો હતો. બનાવને પગલે લિંબાયતના ધારાસભ્ય સંગીતા પાટીલ ઘટનાસ્થળે પહોંચ્યા હતાં. તેમજ શાસક પક્ષના નેતા પણ ઘટના સ્થળ પર પહોંચ્યા હતા.
આ બનાવ અંગે ડીંડોલી પોલીસે વધુ તપાસ હાથ ધરી હતી. સ્થાનિક લોકો દ્વારા ગણેશજીની મૂર્તિઓના વિસર્જન માટે ખાડો ખોદવામાં આવ્યો હતો. વિસર્જન કર્યા બાદ પુરાણ ન કરતા મોટી દુર્ઘટના સર્જાઈ હતી. આ બાબતે ડિંડોલી પોલીસ સ્ટેશનના ઇન્સ્પેક્ટર આર.જે. ચુડાસમાએ જણાવ્યું હતું કે આ બાબતે બાળકના પરિવારજનોનો આક્ષેપ છે કે આયોજકોએ ખાડો ખોદ્યો હતો. જો તે ખાડો પૂરી દીધો હોત તો આ ઘટના નહીં બનતે. તેથી ત્યાં ખાડો ખોદીને વિસર્જન કાર્ય પુર્ણ કર્યા બાદ ત્યાં ખોડો નહીં પૂરનારા વિરુદ્ધ આઈપીસીની કલમ 304 મુજબ સાપરાધ મનુષ્યવધનો ગુનો દાખલ કરવામાં આવશે.
પોલીસ કંટ્રોલને જાણ કરી હતી કે આ ખાડામાં કોઈ ડૂબી શકે છે
સોસાયટીમાંથી કોઈએ પોલીસ કંટ્રોલ રૂમમાં ફોન કરીને કહ્યું હતું કે અહીં સોસાયટીમાં ખાડો ખોદવામાં આવ્યો છે. તે પૂરવામાં નહીં આવે તો કોઈ બાળક ડૂબી શકે છે. તેના થોડા જ કલાકોમાં સત્યમા ખાડામાં ડૂબી ગયો હતો. પોલીસ કંટ્રોલ રૂમમાં પણ જે પણ કર્મચારીએ કોલરનો ફોન રિસિવ કર્યો હતો તે પોલીસકર્મચારીએ કોલરને કહ્યું હતું કે તમે પોલીસ સ્ટેશનમાં જઈને રજૂઆત કરો તેનો કોઈ નિવેડો આવશે.
