નવી દિલ્હી: પાકિસ્તાનના (Pakistan) કેપ્ટન બાબર આઝમને (BabarAzam) પછાડી ભારતીય ઓપનિંગ બેટ્સમેન શુભમન ગિલે (ShubhmanGil) આઈસીસી વન ડે રેન્કિંગમાં (ICCODIRanking) વિશ્વના નંબર વન બેટ્સમેનનું સ્થાન મેળવ્યું છે.
યુવાન શુભમન ગિલે પહેલીવાર ટોચનું સ્થાન હાંસલ કર્યું છે. ભારત માટે આનંદની વાત એ છે કે આઈસીસીના વન ડે રેન્કિંગમાં નંબર વન બોલર પણ ભારતીય છે. મોહમ્મદ સિરાજ (MohammadSiraj) નંબર વન બોલર બન્યો છે. મોહમ્મદ સિરાજે વન ડે ફોર્મેટના બોલરોની રેન્કિંગમાં પણ પ્રથમ સ્થાન મેળવ્યું છે. તેણે શાહીન શાહ આફ્રિદી પાસેથી નંબર 1 ODI બોલરનું સિંહાસન છીનવી લીધું છે.
વર્લ્ડ કપમાં ભારતના અસાધારણ સારા પ્રદર્શનને કારણે બેટિંગ અને બોલિંગ બંનેની ટોપ 10 રેન્કિંગમાં મોટો ફેરફાર થયો છે. ગિલે વર્લ્ડ કપમાં ઘણી વખત ભારતને શાનદાર શરૂઆત અપાવી હતી, જ્યારે બાબર આઝમનું પ્રદર્શન સારું રહ્યું નથી. જેના કારણે ગિલે બાબરને હરાવી ટોચનું સ્થાન હાંસલ કર્યું છે.
ગિલ સચિન તેંડુલકર, એમએસ ધોની અને વિરાટ કોહલી પછી નંબર 1 ODI બેટ્સમેનની રેન્કિંગ હાંસલ કરનાર ચોથો ભારતીય ખેલાડી બન્યો છે. ગિલે ગયા અઠવાડિયે શ્રીલંકા સામે 92 અને દક્ષિણ આફ્રિકા સામે 23 રનનું યોગદાન આપ્યું હતું, જેનાથી તેણે ટૂર્નામેન્ટમાં છ ઇનિંગ્સમાં કુલ 219 રન બનાવ્યા હતા.
બીજી તરફ બાબરે વર્લ્ડ કપમાં આઠ ઇનિંગ્સમાં કુલ 282 રન બનાવ્યા છે અને તે ગિલ કરતા છ રેટિંગ પોઈન્ટ નીચે બીજા સ્થાને આવી ગયો છે. આમ વિશ્વના નંબર 1 ODI બેટ્સમેન તરીકેના તેના બે વર્ષથી વધુના શાસનનો અંત આવ્યો છે.
ઓડીઆઈ બેટ્સમેનની રેન્કિંગમાં કિંગ કોહલી ચોથા સ્થાને પહોંચ્યો છે. વર્લ્ડ કપમાં તેના 543 રનના કારણે કોહલી ત્રણ સ્થાનની છલાંગ લગાવીને ચોથા સ્થાને પહોંચી ગયો છે. ત્રીજા ક્રમે દક્ષિણ આફ્રિકાના ક્વિન્ટન ડી કોક છે.
શ્રેયસ અય્યર પણ ODI બેટ્સમેનોની યાદીમાં 17 સ્થાનની છલાંગ લગાવીને 18માં સ્થાને પહોંચ્યો છે, જ્યારે પાકિસ્તાનનો ઓપનર ફખર ઝમાન ત્રણ સ્થાનના ફાયદા સાથે 11માં સ્થાને અને અફઘાનિસ્તાનનો ઈબ્રાહિમ ઝદરાન છ સ્થાન આગળ વધી 12માં ક્રમે પહોંચ્યો છે.
બીજી તરફ ફાસ્ટ બોલર મોહમ્મદ સિરાજ પણ ODI બોલરોની યાદીમાં ટોપ પર પહોંચી ગયો છે. વર્લ્ડ કપમાં અત્યાર સુધી 10 વિકેટ લીધી છે. સિરાજે બે પોઈન્ટનો સુધારો કરીને નંબર 1 ODI બોલર તરીકેનો તાજ પાછો મેળવ્યો, જ્યારે કુલદીપ યાદવ ત્રણ પોઈન્ટ આગળ વધી ચોથા સ્થાને, જસપ્રીત બુમરાહ ત્રણ પોઈન્ટના સુધારા સાથે આઠમા સ્થાને અને મોહમ્મદ શમી સાત પોઈન્ટના સુધારા સાથે ઉપરથી 10મા ક્રમે પહોંચ્યો છે.
તેનો અર્થ એ થયો કે ટીમ ઈન્ડિયાના બોલરોને વર્લ્ડ કપમાં શાનદાર બોલિંગના ઈનામ રૂપે શાનદાર રેન્કિંગ હાંસલ કર્યું છે. દક્ષિણ આફ્રિકાના લેફ્ટ આર્મ સ્પિનર કેશવ મહારાજ બે સ્થાનના સુધારા સાથે બીજા સ્થાને અને ઓસ્ટ્રેલિયાના એડમ ઝમ્પા છ સ્થાનના સુધારા સાથે ત્રીજા સ્થાને ટોપ 10માં છે. જ્યારે ગયા અઠવાડિયે નંબર 1 ઓડીઆઈ બોલર શાહીન આફ્રિદી ચાર સ્થાન નીચે પાંચમા સ્થાને આવી ગયો છે.
ઈજાને કારણે વર્લ્ડ કપમાંથી વહેલા બહાર નીકળી જવા છતાં, બાંગ્લાદેશનો કેપ્ટન શાકિબ અલ હસન નંબર 1 ઓલરાઉન્ડર છે, જ્યારે મેક્સવેલ તેની મેચ પછી બે સ્થાન સુધરીને છઠ્ઠા સ્થાને પહોંચી ગયો છે- અફઘાનિસ્તાન સામે વિજયી પ્રદર્શન કર્યું છે.
