કેનેડાના કેલગરી શહેરમાં ચાલી રહેલા પોતાના ઓરા ટૂર દરમિયાન પ્રખ્યાત સિંગર અને એક્ટર દિલજીત દોસાંઝનો એક કોન્સર્ટ અચાનક ચર્ચામાં આવી ગયો. કાર્યક્રમ દરમિયાન કેટલાક લોકો દ્વારા ખાલિસ્તાન સમર્થક ઝંડા લહેરાવવામાં આવ્યા હતા, જેને જોઈને દિલજીતે તાત્કાલિક શો અટકાવી દીધો અને સ્ટેજ પરથી જ કડક પ્રતિક્રિયા આપી. વાયરલ થયેલા વીડિયોમાં સ્પષ્ટ દેખાય છે કે પ્રેક્ષકોના એક જૂથ દ્વારા ખાલિસ્તાનના ઝંડા લહેરાવવામાં આવી રહ્યા હતા. આ ઘટનાને દિલજીતે ગંભીરતાથી લીધી અને તરત જ મ્યુઝિક બંધ કરાવીને દર્શકોને સંબોધ્યા. તેમણે ખૂબ સ્પષ્ટ શબ્દોમાં કહ્યું કે તેમનો કોન્સર્ટ માત્ર મનોરંજન અને સંગીત માટે છે, કોઈપણ પ્રકારની રાજકીય પ્રવૃત્તિ માટે નહીં.
દિલજીતે આ દરમિયાન પોતાના પર થતી ટીકાઓનો પણ જવાબ આપ્યો. ઘણા લોકો સોશિયલ મીડિયા પર તેમને લઈને વિવિધ પ્રકારના આક્ષેપો કરતા હોય છે. તેના જવાબમાં તેમણે કહ્યું કે, મારું કામ ચેરિટી કરવાનું નથી, પરંતુ જ્યાં પણ તક મળે છે, હું હંમેશા પંજાબ વિશે વાત કરું છું. તેમણે સમજાવ્યું કે તેઓ પોતાના પ્લેટફોર્મનો ઉપયોગ પંજાબના મુદ્દાઓને આગળ લાવવા માટે કરે છે, પણ કોઈ રાજકીય એજન્ડાને પ્રોત્સાહન આપવાનું તેમનું ઉદ્દેશ્ય નથી. સિંગરે વધુમાં કહ્યું કે તેમણે હંમેશા પંજાબ માટે કામ કર્યું છે અને જરૂર પડે ત્યારે મદદ પણ કરી છે. ઉદાહરણ તરીકે, વર્ષ 2025માં તેઓ ‘કૌન બનેગા કરોડપતિ’શોમાં આવ્યા હતા અને ત્યાં જીતેલી રકમ પંજાબમાં પૂર પીડિતોને દાનમાં આપી દીધી હતી. આથી તેઓએ સ્પષ્ટ કરવાનો પ્રયત્ન કર્યો કે તેઓ માત્ર બોલતા નથી, પરંતુ શક્ય હોય ત્યારે કાર્ય પણ કરે છે.
દિલજીતે પોતાની વાત આગળ વધારતા જણાવ્યું કે તેઓ આંતરરાષ્ટ્રીય મંચ પર પણ પંજાબના મુદ્દાઓ ઉઠાવે છે. તેમણે ‘ધ ટુનાઇટ શો’માં જિમી ફેલન સાથેની મુલાકાતનો ઉલ્લેખ કર્યો, જ્યાં તેઓ કોઈ ફિલ્મ કે ગીતના પ્રમોશન માટે નહીં પરંતુ પંજાબ સાથે જોડાયેલા મુદ્દાઓને દુનિયા સામે લાવવા ગયા હતા. તેમના જણાવ્યા અનુસાર, તેઓ ઈચ્છે છે કે પંજાબની વાતો વૈશ્વિક સ્તરે પહોંચે અને લોકો તેની તરફ ધ્યાન આપે. કોન્સર્ટ દરમિયાન થયેલી આ ઘટનામાં દિલજીતનો મેસેજ ખૂબ જ સ્પષ્ટ હતો, મ્યુઝિક અને એન્ટરટેઇનમેન્ટને રાજકારણથી દૂર રાખવું જોઈએ. તેમણે દર્શકોને કહ્યું કે જો કોઈને તેમના વિચારો સાથે અસહમતિ હોય તો તે પોતાનું મત રાખી શકે છે, પરંતુ કોન્સર્ટ જેવા મંચનો ઉપયોગ રાજકીય સંદેશાઓ માટે ન કરવો જોઈએ. આ ઘટના સોશિયલ મીડિયા પર ઝડપથી વાયરલ થઈ ગઈ છે અને લોકો દિલજીતના આ પગલાને અલગ-અલગ રીતે જોઈ રહ્યા છે. કેટલાક લોકો તેમના આ નિર્ણયને સમર્થન આપી રહ્યા છે, જ્યારે કેટલાક લોકો તેની ટીકા પણ કરી રહ્યા છે.
