મધ્યપ્રદેશના (MP) હરદામાં ફટાકડા ફેક્ટરીમાં થયેલા વિસ્ફોટથી (Blast) સમગ્ર રાજ્યને આંચકો લાગ્યો છે. મળતી માહિતી મુજબ આ દુર્ઘટનામાં અત્યાર સુધીમાં 11 લોકોના મોત થયા છે જ્યારે 184થી વધુ લોકો ઘાયલ થયા છે. જેમાંથી 40 ગંભીર રીતે ઘાયલ છે. કારખાનાના માલિક રાજેશ અને સોમેશ અગ્રવાલની પોલીસે રાજગઢ જિલ્લાના સારંગપુરથી ધરપકડ કરી છે. આ ઘટનાએ રાજકીય સ્વરૂપ લઈ લીધું છે. ભાજપ અને કોંગ્રેસ વચ્ચે આરોપ-પ્રત્યારોપ પણ શરૂ થઈ ગયા છે. મામલો એટલો વધી ગયો કે કોંગ્રેસના ધારાસભ્ય હરદામાં થયેલા અકસ્માતના વિરોધમાં સૂતળી બોમ્બની માળા પહેરીને વિધાનસભા (Assembly) પહોંચ્યા. જેને પગલે વિધાનસભાની બહાર હોબાળો મચી ગયો હતો.
મધ્યપ્રદેશના હરદાના કોંગ્રેસના ધારાસભ્ય રામ કિશોર દોગને ગુરુવારે સુતળી બોમ્બની માળા પહેરીને વિધાનસભા પહોંચ્યા હતા. નકલી સૂતળી બોમ્બની માળા પહેરીને આવતા વિધાનસભાની બહાર હોબાળો થયો હતો. હરદાના ધારાસભ્ય આરકે દોગનેએ કહ્યું કે માત્ર 4 લાખ રૂપિયાનું વળતર અને કલેક્ટર અથવા એસપીને હટાવવાથી કંઈ થશે નહીં, દોષિતો સામે કડક કાર્યવાહી થવી જોઈએ. આરકે દોગને આક્ષેપ કર્યો હતો કે કારખાનેદારોને પૂર્વ કૃષિ મંત્રી અને તત્કાલીન ધારાસભ્ય કમલ પટેલનું રક્ષણ હતું.
કોંગ્રેસના ધારાસભ્યના નિવેદન અને સૂતળી બોમ્બ સાથે વિધાનસભામાં આવ્યા બાદ ભાજપે તરત જ અવાજ ઉઠાવ્યો હતો. રાજ્ય મંત્રી કૃષ્ણા ગૌરે કહ્યું કે કોંગ્રેસના ધારાસભ્યો પોતે આરોપીઓને બચાવવાનું કામ કરી રહ્યા છે. ભાજપના ફાયરબ્રાન્ડ ધારાસભ્ય રામેશ્વર શર્માએ દોગને પર વળતો પ્રહાર કરતા કહ્યું કે કોંગ્રેસ આમ પણ બોમ્બની માળા પહેરીને ફરી રહી છે. કોંગ્રેસ કાશ્મીરથી કન્યાકુમારી જવાનું કામ કરી રહી છે. પરંતુ મધ્યપ્રદેશ સરકારે હરદા કેસને ગંભીરતાથી લીધો અને મુખ્ય પ્રધાન મોહન યાદવે પગલાં લીધા, એસપી કલેક્ટરને હટાવીને તપાસ સમિતિની રચના કરી. મધ્યપ્રદેશમાં આવી ઘટનાઓ ફરી ન બને તે માટે સરકાર પગલાં લઈ રહી છે.
