ગુજરાતમાં ચોમાસાએ હવે જોર પકડી લીધું છે. સતત ત્રીજા દિવસે પણ મેઘરાજાની મહેર યથાવત રહેતા રાજ્યના 139 તાલુકાઓમાં વરસાદ નોંધાયો છે. ઉત્તર ગુજરાતથી લઈને દક્ષિણ ગુજરાત સુધી અનેક વિસ્તારોમાં પાણી ભરાઈ ગયા છે, જ્યારે નદીઓ, નાળા અને જળાશયોમાં પાણીની આવક સતત વધી રહી છે.છેલ્લા 24 કલાક દરમિયાન બનાસકાંઠાના વાવ અને થરાદ તાલુકામાં અતિભારે વરસાદ નોંધાયો છે. ઘણા નીચાણવાળા વિસ્તારોમાં પાણી ભરાઈ જતાં લોકોના જનજીવન પર અસર પડી છે. બીજી તરફ દક્ષિણ ગુજરાતના વલસાડ જિલ્લામાં પણ મેઘરાજાએ મન મૂકીને વરસતા રસ્તાઓ પાણીમાં ગરકાવ થઈ ગયા છે અને અનેક વિસ્તારોમાં પાણી ભરાવાની સ્થિતિ સર્જાઈ છે.
રાજ્યના અન્ય અનેક જિલ્લાઓમાં પણ ધોધમાર વરસાદ અને સતત ઝાપટાંને કારણે વાતાવરણ સંપૂર્ણપણે વરસાદી બની ગયું છે. વરસાદની આ જોરદાર એન્ટ્રીથી ખેડૂતોમાં ખુશીની લહેર ફરી વળી છે. લાંબા સમયથી સારા વરસાદની રાહ જોઈ રહેલા અન્નદાતાઓ માટે આ વરસાદ આશીર્વાદ સમાન સાબિત થઈ રહ્યો છે. ખેતરોમાં વાવણીની કામગીરીને નવી ગતિ મળશે તેવી આશા વ્યક્ત કરવામાં આવી રહી છે.વરસાદને કારણે નદી-નાળા અને ડેમોમાં પાણીની આવક સતત વધી રહી છે. અનેક જળાશયોના જળસ્તરમાં વધારો નોંધાતા સિંચાઈ અને પીવાના પાણીની ચિંતા પણ ઘણી હદ સુધી ઓછી થઈ છે. જોકે ભારે વરસાદના કારણે કેટલાક વિસ્તારોમાં પાણી ભરાવા, ટ્રાફિકની સમસ્યા અને દૈનિક જીવન પર અસર જોવા મળી રહી છે.
હવામાન વિભાગે આગામી દિવસોમાં પણ રાજ્યમાં વરસાદી માહોલ યથાવત રહેવાની આગાહી કરી છે. કેટલાક વિસ્તારોમાં ભારેથી અતિભારે વરસાદની સંભાવના વ્યક્ત કરવામાં આવી છે. તેથી સ્થાનિક તંત્રને એલર્ટ રહેવા સૂચના આપવામાં આવી છે અને લોકોને પણ બિનજરૂરી મુસાફરી ટાળવા અપીલ કરવામાં આવી છે.વરસાદની મોસમમાં ખાસ સાવચેતી રાખવી જરૂરી છે. પાણી ભરાયેલા રસ્તાઓ પર પસાર થતી વખતે સાવધાન રહો, ખુલ્લા વીજ થાંભલા અથવા વીજ તારોથી દૂર રહો અને માત્ર અધિકૃત માહિતી પર જ ભરોસો રાખો.
