Latest News

IPL 2026ની મહત્વપૂર્ણ મેચમાં મુંબઈ ઈન્ડિયન્સ (MI)એ ગુજરાત ટાઇટન્સ (GT) સામે જબરદસ્ત વાપસી કરીને 200 રનનો મજબૂત ટાર્ગેટ મુક્યો છે. શરૂઆતમાં ટીમ મુશ્કેલીમાં મુકાઈ હતી, પરંતુ તિલક વર્માની શાનદાર સદીના કારણે મુંબઈ મજબૂત સ્કોર સુધી પહોંચી શક્યું. અમદાવાદના નરેન્દ્ર મોદી સ્ટેડિયમમાં રમાયેલી આ મેચમાં ગુજરાતના કેપ્ટન શુભમન ગિલે ટોસ જીતીને પહેલા બોલિંગ કરવાનો નિર્ણય લીધો હતો. મુંબઈની શરૂઆત બહુ જ ખરાબ રહી હતી. ટીમે પાવરપ્લેમાં જ 3 વિકેટ ગુમાવી દીધી હતી. કાગીસો રબાડાએ ઘાતક બોલિંગ કરતાં દાનિશ માલેવાર, ક્વિન્ટન ડી કોક અને સૂર્યકુમાર યાદવને આઉટ કર્યા હતા.

એક સમયે મુંબઈનો સ્કોર 46/3 હતો અને ટીમ દબાણમાં દેખાઈ રહી હતી. પરંતુ ત્યારબાદ તિલક વર્મા અને નમન ધીરે ઇનિંગ્સ સંભાળી. ખાસ કરીને તિલક વર્માએ આક્રમક બેટિંગ કરીને મેચનો રૂખ બદલી નાખ્યો. તેમણે માત્ર 33 બોલમાં પોતાની અડધી સદી પૂર્ણ કરી અને પછી સદી તરફ આગળ વધ્યા. ઇનિંગ્સના અંતિમ ઓવરોમાં તિલક વર્માએ ગતિ વધુ તેજ કરી. 20મી ઓવરમાં પ્રસિદ્ધ કૃષ્ણા સામે તેમણે છગ્ગા-ચોગ્ગા ફટકારીને પોતાની IPL કારકિર્દીની પ્રથમ સદી પૂર્ણ કરી. તેમણે માત્ર 45 બોલમાં સદી ફટકારી, જે એક શાનદાર સિદ્ધિ ગણાય છે. તેમના આ ધમાકેદાર પ્રદર્શનથી મુંબઈએ 20 ઓવરમાં લગભગ 200 રનનો સ્કોર ઉભો કર્યો. તિલક વર્માને અન્ય બેટર્સનો પણ સાથ મળ્યો. હાર્દિક પંડ્યા સાથે તેમની મહત્વપૂર્ણ ભાગીદારી રહી, જેના કારણે ટીમ મજબૂત સ્થિતિમાં પહોંચી. અંતમાં સ્ટોઇનિસ જેવા ખેલાડીઓએ પણ ઝડપી રન બનાવી સ્કોરને આગળ ધપાવ્યો.

ગુજરાત તરફથી બોલિંગમાં કાગીસો રબાડા સૌથી સફળ રહ્યા. તેમણે 3 વિકેટ ઝડપી અને શરૂઆતમાં મુંબઈને ભારે દબાણમાં મૂકી દીધું. જોકે મધ્ય અને અંતિમ ઓવરોમાં ગુજરાતના બોલરો તિલકને રોકવામાં નિષ્ફળ રહ્યા. હવે ગુજરાત ટાઇટન્સ સામે 200 રનનો પડકારજનક લક્ષ્યાંક છે. ટીમ પાસે શુભમન ગિલ અને જોસ બટલર જેવા મજબૂત બેટર્સ છે, પરંતુ મુંબઈની બોલિંગ લાઇનઅપ સામે આ લક્ષ્યાંક હાંસલ કરવો સરળ નહીં રહે. આ મેચમાં તિલક વર્માની ઇનિંગ્સ ટર્નિંગ પોઇન્ટ સાબિત થઈ છે. શરૂઆતમાં લથડ્યા ખાઘા પછી મુંબઈએ જે રીતે વાપસી કરી છે, તે ટીમના આત્મવિશ્વાસ માટે મહત્વપૂર્ણ છે.