દક્ષિણ ગુજરાતમાં સતત વરસી રહેલા ભારે વરસાદની અસર હવે ઉકાઈ ડેમમાં સ્પષ્ટ જોવા મળી રહી છે. શનિવાર, 1 ઓગસ્ટ 2026ના રોજ બપોરે 12 વાગ્યે જાહેર થયેલા આંકડા મુજબ ઉકાઈ ડેમમાં 4,29,583 ક્યુસેક પાણીની આવક નોંધાઈ છે. હાલમાં ડેમમાંથી માત્ર 800 ક્યુસેક પાણી છોડવામાં આવી રહ્યું છે, જેના કારણે ડેમના જળસ્તરમાં સતત વધારો થઈ રહ્યો છે. બપોરે 12 વાગ્યે ઉકાઈ ડેમનું જળસ્તર 321.51 ફૂટ નોંધાયું હતું, જ્યારે રૂલ લેવલ 333.00 ફૂટ છે. હાલમાં ડેમમાં 3,202.94 મિલિયન ક્યુબિક મીટર (MCM) લાઈવ સ્ટોરેજ છે, જે કુલ ક્ષમતાના 47.59 ટકા બરાબર છે. જ્યારે ડેમની કુલ ભરાવ ક્ષમતા 52.43 ટકા સુધી પહોંચી છે.
કાકરાપાર વીયરનું જળસ્તર 161.40 ફૂટ નોંધાયું છે. અહીંથી 10,600 ક્યુસેક પાણી ઓવરફ્લો થઈ રહ્યું છે. મોતીચેર ખાતે જળસ્તર 151.70 ફૂટ છે અને ત્યાંથી 1,546 ક્યુસેક પાણીનો પ્રવાહ નોંધાયો છે. આ બંને મળીને તાપી નદીમાં કુલ 12,146 ક્યુસેક પાણી વહે છે. સિંગણપોર વીયર-કમ-કોઝવે ખાતે બપોરે 12 વાગ્યે જળસ્તર 7.72 મીટર નોંધાયું છે. અહીંથી તાપી નદીમાં 99,536 ક્યુસેક પાણી પસાર થઈ રહ્યું છે. ઉકાઈ ડેમમાં હાલ પાણીની આવક ખૂબ જ ઊંચી હોવાથી સિંચાઈ વિભાગ અને જિલ્લા વહીવટી તંત્ર સતત સ્થિતિ પર નજર રાખી રહ્યા છે. આગામી દિવસોમાં વરસાદની સ્થિતિ અને ડેમમાં આવનારા પાણીના આધારે પાણી છોડવાનો નિર્ણય લેવામાં આવી શકે છે.
- ઉકાઈ ડેમમાં બપોરે 1 વાગ્યે ઇન્ફ્લો 4,77,160 ક્યુસેક નોંધાયો.
- ડેમની જળસપાટી વધીને 321.91 ફૂટ પહોંચી.
- ડેમમાંથી હાલ માત્ર 800 ક્યુસેક પાણી છોડવામાં આવી રહ્યું છે.
- ડેમનો જીવંત જળસંગ્રહ 3251.50 MCM એટલે કે 48.31% થયો.
- કુલ ક્ષમતા મુજબ ડેમ 53.09% ભરાયો છે.
- કાકરાપાર વીયરનું લેવલ 161.40 ફૂટ નોંધાયું.
- કાકરાપારમાંથી 10,600 ક્યુસેક પાણી ઓવરફ્લો થઈ રહ્યું છે.
- મોટીચરમાંથી 1,869 ક્યુસેક ડિસ્ચાર્જ નોંધાયો.
- તાપી નદીમાં કુલ 12,469 ક્યુસેક પાણીનો પ્રવાહ છે.
- સિંગણપોર વીયર-કમ-કોઝવેનું લેવલ 7.66 મીટર નોંધાયું.
- સિંગણપોર ખાતે 95,636 ક્યુસેક પાણીનો પ્રવાહ નોંધાયો.
- ભારે વરસાદને કારણે તંત્ર સતત ડેમ અને નદીની સ્થિતિ પર નજર રાખી રહ્યું છે.
