માંડ બધાએ રેઇન દક્ષિણ ગુજરાતમાં લાંબા સમયના વિરામ બાદ મેઘરાજાએ ફરી ધમાકેદાર એન્ટ્રી કરી છે. છેલ્લા બે દિવસથી અનેક વિસ્તારોમાં વરસાદી માહોલ જામ્યો છે. ખાસ કરીને નર્મદા, ભરૂચ અને નવસારી જિલ્લામાં ધોધમાર વરસાદ નોંધાયો છે. સુરત શહેર અને જિલ્લામાં પણ વરસાદ વરસી રહ્યો છે. ભારે વરસાદના કારણે અનેક જગ્યાએ પાણી ભરાવાની સ્થિતિ સર્જાઈ છે. બીજી તરફ વરસાદથી ડાંગર, શેરડી અને ચીકુ જેવા પાકોને મોટો ફાયદો થવાની આશા હોવાથી ખેડૂતોમાં ખુશી જોવા મળી રહી છે. સુરત શહેરમાં સતત બીજા દિવસે વરસાદી માહોલ જોવા મળ્યો છે. આજે વહેલી સવારથી શહેરના કેટલાક વિસ્તારોમાં વરસાદ શરૂ થયો હતો. રિંગ રોડ, ટેક્સટાઇલ માર્કેટ, ઉધના દરવાજા અને મજૂરાગેટ સહિતના વિસ્તારોમાં વરસાદ નોંધાયો હતો. વહેલી સવારથી વરસાદ પડતાં રસ્તાઓ પર પણ પાણી જોવા મળ્યું હતું. જોકે શહેરમાં વરસાદનું પ્રમાણ વિસ્તાર પ્રમાણે અલગ અલગ રહ્યું હતું.
નવસારી જિલ્લામાં લગભગ એક મહિના બાદ મેઘરાજાએ જોરદાર વાપસી કરી છે. રાત્રિના સમયે ધીમીધારે શરૂ થયેલો વરસાદ સવાર થતાં જ વધુ તેજ બન્યો હતો. હવામાન વિભાગ દ્વારા આજે નવસારી જિલ્લામાં રેડ એલર્ટ જાહેર કરવામાં આવ્યું છે. જિલ્લામાં રાત્રિ દરમિયાન તમામ છ તાલુકામાં વરસાદ નોંધાયો હતો. છેલ્લા 24 કલાકના આંકડા પ્રમાણે નવસારી જિલ્લાના વાંસદા તાલુકામાં સૌથી વધુ 2.80 ઇંચ વરસાદ નોંધાયો છે. જ્યારે નવસારી, જલાલપોર, ખેરગામ અને ચીખલી તાલુકામાં પોણો ઇંચ જેટલો વરસાદ નોંધાયો છે. સવાર થતાં ચીખલી, આલીપોર અને થાલા સહિતના ગ્રામ્ય વિસ્તારોમાં પણ વરસાદ શરૂ થયો હતો.
ચીખલીમાં થોડા સમય માટે પડેલા ભારે વરસાદની અસર રસ્તાઓ અને શેરી-મહોલ્લામાં જોવા મળી હતી. માત્ર 15 મિનિટના વરસાદમાં જ કેટલાક વિસ્તારોમાં પાણી ભરાઈ ગયા હતા. લાંબા વિરામ બાદ વરસાદ થતાં લોકોને ગરમી અને ઉકળાટમાંથી રાહત મળી છે. સાથે જ ખેતી માટે પણ આ વરસાદ મહત્વનો માનવામાં આવી રહ્યો છે. નવસારી જિલ્લામાં પડેલા વરસાદથી ડાંગર, શેરડી અને ચીકુના પાકને ફાયદો થવાની આશા છે. ખાસ કરીને લાંબા સમયથી વરસાદની રાહ જોઈ રહેલા ખેડૂતો માટે આ વરસાદ રાહતરૂપ બન્યો છે. પૂરતો વરસાદ મળવાથી પાકના વિકાસમાં મદદ મળી શકે છે.
ભરૂચ જિલ્લામાં પણ મેઘરાજાએ મન મૂકીને વરસવાનું શરૂ કર્યું છે. જિલ્લાના અનેક વિસ્તારોમાં સારો વરસાદ નોંધાયો છે. અંકલેશ્વરમાં 3.35 ઇંચ, ભરૂચ શહેરમાં 3 ઇંચ અને હાંસોટ પંથકમાં પણ 3 ઇંચ વરસાદ નોંધાયો છે. આ ઉપરાંત ઝઘડિયા, વાલિયા અને નેત્રંગમાં 2-2 ઇંચ જ્યારે જંબુસરમાં 1 ઇંચ વરસાદ નોંધાયો છે. ભરૂચ શહેરમાં 3 ઇંચ વરસાદ પડતાં નીચાણવાળા વિસ્તારોમાં પાણી ભરાઈ ગયા હતા. વરસાદનું પાણી રસ્તાઓ પર એકઠું થતાં વાહનચાલકોને પણ મુશ્કેલીનો સામનો કરવો પડ્યો હતો. જોકે, વરસાદને કારણે જિલ્લાના ખેડૂતોને મોટી રાહત મળી છે.
નર્મદા જિલ્લામાં પણ સતત બીજા દિવસે ધોધમાર વરસાદ વરસી રહ્યો છે. છેલ્લા 24 કલાકમાં જિલ્લામાં સરેરાશ 2.57 ઇંચ વરસાદ નોંધાયો છે. ડેડિયાપાડામાં આજે માત્ર બે કલાકમાં 1.57 ઇંચ વરસાદ નોંધાયો છે. આ પહેલા ગઈકાલે પણ ડેડિયાપાડામાં 4 ઇંચ વરસાદ વરસ્યો હતો. એટલે કે ટૂંકા સમયગાળામાં અહીં ભારે વરસાદ નોંધાયો છે. ગરુડેશ્વરમાં આજે 1.18 ઇંચ વરસાદ પડ્યો છે, જ્યારે ગઈકાલે અહીં 2 ઇંચ વરસાદ નોંધાયો હતો. સાગબારામાં આજે 1 ઇંચ વરસાદ નોંધાયો છે અને ગઈકાલે અહીં 3 ઇંચ વરસાદ વરસ્યો હતો. આ ઉપરાંત ગઈકાલે તિલકવાડા અને ચીકડા વિસ્તારમાં 3.5 ઇંચ જ્યારે નાંદોદમાં 2.5 ઇંચ વરસાદ નોંધાયો હતો.
નર્મદા જિલ્લામાં સતત બીજા દિવસે વરસાદ થતાં અનેક વિસ્તારોમાં રસ્તાઓ અને નીચાણવાળા સ્થળોએ પાણી ભરાવાની સ્થિતિ જોવા મળી રહી છે. ડાંગર સહિતના પાક માટે આ વરસાદ ફાયદાકારક બની શકે છે. લાંબા સમયથી વરસાદની રાહ જોઈ રહેલા ખેડૂતો માટે મેઘરાજાની આ વાપસી આશીર્વાદ સમાન બની છે. દક્ષિણ ગુજરાતના ત્રણેય જિલ્લાઓમાં સારા વરસાદથી ખેડૂતોમાં ખુશી જોવા મળી રહી છે. ડાંગર, શેરડી અને ચીકુ સહિતના પાકોને વરસાદથી જરૂરી પાણી મળ્યું છે. જોકે, થોડા સમયમાં ખૂબ વધારે વરસાદ પડે તો નીચાણવાળા વિસ્તારોમાં પાણી ભરાવા અને સ્થાનિક સ્તરે મુશ્કેલી સર્જાવાની શક્યતા પણ રહે છે. હાલ દક્ષિણ ગુજરાતના અનેક વિસ્તારોમાં વરસાદી માહોલ યથાવત છે. નવસારીમાં રેડ એલર્ટને કારણે તંત્ર પણ સાવચેત બન્યું છે. આગામી કલાકોમાં વરસાદનું જોર વધે છે કે ઘટે છે તેના પર સૌની નજર રહેશે. એકંદરે લાંબા વિરામ બાદ થયેલા વરસાદથી દક્ષિણ ગુજરાતમાં વાતાવરણમાં ઠંડક પ્રસરી છે અને ખેડૂતોમાં પણ રાહતનો માહોલ જોવા મળી રહ્યો છે.
