ભારતીય વેરેબલ્સ માર્કેટમાં પોતાની ઓળખ બનાવી ચૂકેલી Fire-Boltt હવે સ્માર્ટફોન સેગમેન્ટમાં પ્રવેશ કરવા જઈ રહી છે. કંપનીએ જાહેરાત કરી છે કે તે 25 ઓગસ્ટે પોતાના નવા બ્રાન્ડ Boltt હેઠળ 2 નવા સ્માર્ટફોન લોન્ચ કરશે. Evo 4G અને Ace 5G નામના આ બંને સ્માર્ટફોન બજેટ સેગમેન્ટમાં રજૂ કરવામાં આવશે અને તેનુ પ્રથમ વેચાણ Flipkart પર થશે.
25 ઓગસ્ટે થશે સત્તાવાર લોન્ચ
કંપનીએ પુષ્ટિ કરી છે કે Boltt Evo 4G અને Boltt Ace 5G સ્માર્ટફોન 25 ઓગસ્ટે બપોરે 12 વાગ્યે લોન્ચ કરવામાં આવશે. આ પહેલાં બંને સ્માર્ટફોન વિવિધ સર્ટિફિકેશન વેબસાઇટ્સ પર જોવા મળ્યા હતા, પરંતુ હવે કંપનીએ તેમની લોન્ચ તારીખની સત્તાવાર જાહેરાત કરી છે.
Flipkart પર મળશે બંને સ્માર્ટફોન
કંપનીએ Flipkart પર એક ટીઝર પણ જાહેર કર્યો છે, જેમાં તેના પ્રથમ સ્માર્ટફોન લોન્ચ થવાની માહિતી આપવામાં આવી છે. લૉન્ચ બાદ બંને સ્માર્ટફોનનું વેચાણ Flipkart પર કરવામાં આવશે. લિસ્ટિંગમાં એવો પણ દાવો કરવામાં આવ્યો છે કે ફોન ક્લીન સોફ્ટવેર અનુભવ સાથે આવશે, એટલે કે તેમાં બિનજરૂરી પ્રી-ઇન્સ્ટોલ એપ્સ ઓછી હશે અને યુઝર્સને વધુ સ્મૂથ પરફોર્મન્સ મળશે.
ડિઝાઇનની પ્રથમ ઝલક આવી સામે
Flipkart પર જાહેર કરાયેલા ટીઝરમાં સ્માર્ટફોનની ડિઝાઇનની પ્રથમ ઝલક પણ જોવા મળી છે. ફોનમાં સેન્ટર પંચ-હોલ ડિસ્પ્લે આપવામાં આવ્યું છે. સ્ક્રીનની આસપાસ થોડા જાડા બેઝલ્સ જોવા મળે છે. ઉપરાંત ફોનની જમણી બાજુ પાવર બટન અને વોલ્યુમ બટન આપવામાં આવ્યા છે. કંપનીએ કિંમત જાહેર કરી નથી, પરંતુ બંને સ્માર્ટફોન બજેટ પ્રાઇસ રેન્જમાં લોન્ચ થવાની શક્યતા વ્યક્ત કરવામાં આવી રહી છે.
Geekbench લિસ્ટિંગમાં સામે આવ્યા Evo 4Gના ફીચર્સ
Fire-Boltt Evo 4G તાજેતરમાં Geekbench બેન્ચમાર્ક વેબસાઇટ પર પણ જોવા મળ્યો હતો. લીક થયેલી વિગતો મુજબ, આ સ્માર્ટફોનમાં Unisoc T7250 પ્રોસેસર આપવામાં આવશે. તેની સાથે 4GB RAM અને Android 16 ઓપરેટિંગ સિસ્ટમ મળશે. Geekbench ટેસ્ટમાં આ સ્માર્ટફોનને સિંગલ-કોર ટેસ્ટમાં 440 અને મલ્ટી-કોર ટેસ્ટમાં 1470 સ્કોર મળ્યો હોવાનું સામે આવ્યું છે.
બજેટ સ્માર્ટફોન માર્કેટમાં વધશે સ્પર્ધા
Fire-Boltt અત્યાર સુધી મુખ્યત્વે સ્માર્ટવોચ અને અન્ય વેરેબલ ડિવાઇસ માટે જાણીતી રહી છે. હવે સ્માર્ટફોન સેગમેન્ટમાં પ્રવેશ સાથે કંપની સીધી બજેટ સ્માર્ટફોન માર્કેટમાં સ્પર્ધા કરશે. કંપની લોન્ચ દરમિયાન બંને સ્માર્ટફોનની કિંમત, સંપૂર્ણ સ્પેસિફિકેશન અને ઉપલબ્ધતા અંગેની વધુ માહિતી જાહેર કરશે.
