દેશભરમાં સતત વધી રહેલી મોંઘવારી વચ્ચે હવે સામાન્ય જનતાને વધુ એક મોટો ઝટકો લાગ્યો છે. પેટ્રોલ અને ડીઝલના ભાવમાં સતત વધારા બાદ હવે CNGના દરોમાં પણ વધારો નોંધાયો છે. ઈંધણના વધતા ભાવોને કારણે લોકોના દૈનિક ખર્ચમાં ભારે વધારો થવાની આશંકા વ્યક્ત કરવામાં આવી રહી છે. ખાસ કરીને ઓટો રિક્ષા, ટેક્સી, ટ્રાન્સપોર્ટ અને રોજિંદા મુસાફરી કરતા લોકો પર તેની સીધી અસર પડશે.
તાજેતરના દિવસોમાં વૈશ્વિક બજારમાં ક્રૂડ ઓઈલના ભાવમાં ભારે ઉછાળો જોવા મળી રહ્યો છે. મધ્ય પૂર્વમાં વધી રહેલા તણાવ અને તેલ સપ્લાયને લઈને ઉભી થયેલી અનિશ્ચિતતાના કારણે ભારતમાં પણ ઈંધણના ભાવ સતત વધી રહ્યા છે. છેલ્લા 10 દિવસમાં પેટ્રોલ અને ડીઝલના ભાવમાં અનેક વખત વધારો કરવામાં આવ્યો છે. હવે CNGના ભાવમાં પણ વધારો થતા લોકોમાં ભારે નારાજગી જોવા મળી રહી છે. અહેવાલો અનુસાર અમદાવાદ સહિત ગુજરાતના અનેક શહેરોમાં CNGના દરોમાં વધારો નોંધાયો. કેટલીક ખાનગી ગેસ કંપનીઓએ છેલ્લા થોડા સમયમાં વારંવાર ભાવ વધાર્યા હોવાનું સામે આવ્યું છે.
Gujaratમાં હાલ પેટ્રોલ, ડીઝલ અને CNGના વધેલા ભાવોને કારણે પરિવહન ખર્ચ ઝડપથી વધી રહ્યો છે. ખાસ કરીને રોજિંદા મુસાફરી માટે CNG વાહનો પર આધાર રાખતા લોકો માટે આ વધારો ચિંતાજનક માનવામાં આવી રહ્યો છે.
સુરતમાં હાલમાં પેટ્રોલનો ભાવ આશરે ₹98.43 પ્રતિ લિટર, ડીઝલ ₹94.29 પ્રતિ લિટર અને CNG ₹82.95 પ્રતિ કિલો સુધી પહોંચી ગયો હોવાનું સામે આવ્યું છે.
વિશ્લેષકોનું માનવું છે કે પેટ્રોલ-ડીઝલના વધેલા ભાવ પછી હવે CNG મોંઘી થતા ટ્રાન્સપોર્ટેશન ખર્ચમાં વધુ વધારો થશે. જેના કારણે શાકભાજી, દૂધ, રોજિંદા વપરાશની વસ્તુઓ અને ઓનલાઈન ડિલિવરી સહિત અનેક સેવાઓ મોંઘી બની શકે છે.
અમદાવાદમાં ઓટો રિક્ષા અને કેબ ભાડામાં પણ વધારો જોવા મળી રહ્યો છે. અહેવાલ મુજબ CNGના વધતા ભાવોને કારણે ઓટો અને ટેક્સી ચાલકો પર સીધી અસર પડી છે અને હવે મુસાફરોને પણ વધુ ભાડું ચૂકવવું પડી રહ્યું છે. તાજેતરમાં દિલ્હી-NCR સહિત દેશના અનેક વિસ્તારોમાં પણ CNGના દરોમાં વારંવાર વધારો નોંધાયો છે. કેટલાક વિસ્તારોમાં માત્ર 48 કલાકમાં બે વખત ભાવ વધારો કરવામાં આવ્યો હોવાનું જાણવા મળ્યું છે.
ઊર્જા ક્ષેત્રના નિષ્ણાતોનું કહેવું છે કે જો મધ્ય પૂર્વમાં તણાવ વધુ વધશે તો આવનારા દિવસોમાં ઈંધણના ભાવમાં હજુ વધુ વધારો થઈ શકે છે. ખાસ કરીને તેલ સપ્લાય રૂટ અને વૈશ્વિક બજારની સ્થિતિને કારણે ભારત જેવા આયાત આધારિત દેશો પર સીધી અસર પડી રહી છે. સામાન્ય લોકોનું કહેવું છે કે પહેલાથી જ ખાદ્ય પદાર્થો, ગેસ સિલિન્ડર અને દૈનિક જીવનની વસ્તુઓ મોંઘી બની રહી છે, ત્યારે હવે ઈંધણના વધેલા ભાવો તેમના માસિક બજેટને વધુ અસર કરશે. ખાસ કરીને મધ્યમ વર્ગ અને રોજ કમાઈને જીવન જીવતા લોકો માટે આ પરિસ્થિતિ મુશ્કેલ બની રહી છે.
રાજકીય પક્ષોએ પણ ઈંધણના ભાવ વધારાને લઈને કેન્દ્ર સરકાર પર નિશાન સાધવાનું શરૂ કર્યું છે. વિરોધ પક્ષોનું કહેવું છે કે વધતી મોંઘવારીને નિયંત્રણમાં રાખવા માટે સરકારે તાત્કાલિક પગલાં લેવા જોઈએ.આ સાથે જ આર્થિક નિષ્ણાતોનું માનવું છે કે જો ઈંધણના ભાવમાં સતત વધારો ચાલુ રહેશે તો તેનો પ્રભાવ સમગ્ર અર્થતંત્ર પર પડી શકે છે. ટ્રાન્સપોર્ટ ખર્ચ વધવાથી તમામ પ્રકારની વસ્તુઓના ભાવમાં વધારો થવાની શક્યતા વ્યક્ત કરવામાં આવી રહી છે. હાલ સામાન્ય જનતાની નજર હવે સરકાર અને ઓઈલ કંપનીઓના આગામી નિર્ણય પર ટકેલી છે. લોકો આશા રાખી રહ્યા છે કે આગામી દિવસોમાં ભાવમાં સ્થિરતા આવશે, નહીં તો મોંઘવારીનો બોજ વધુ ભારે બની શકે છે.
