કોલંબિયામાં સોમવારે આવેલા 7.4ની તીવ્રતાના શક્તિશાળી ભૂકંપે ભારે તબાહી મચાવી છે. રાષ્ટ્રપતિ અબેલાર્ડો ડે લા એસ્પ્રિએલાના જણાવ્યા મુજબ, ભૂકંપમાં ઓછામાં ઓછા 132 લોકોનાં મોત થયા છે અને 570થી વધુ લોકો ઘાયલ થયા છે. અનેક વિસ્તારોમાં મકાનો અને જાહેર ઇમારતોને ભારે નુકસાન થયું છે.
રહેણાંક ઇમારતોને મોટું નુકસાન
અધિકારીઓના જણાવ્યા મુજબ ભૂકંપમાં 1,577 રહેણાંક ઇમારતોને નુકસાન થયું છે, જ્યારે 37 મકાનો સંપૂર્ણપણે ધરાશાયી થયા છે. 60થી વધુ ઇમારતો તૂટી પડી હોવાનું પણ સામે આવ્યું છે.
આ ઉપરાંત 18 આરોગ્ય કેન્દ્રો અને 52 શાળાઓને પણ નુકસાન થયું છે. બચાવ અને રાહત ટીમો અસરગ્રસ્ત વિસ્તારોમાં પહોંચી નુકસાનનું મૂલ્યાંકન કરી રહી છે.
રિસારાલ્ડામાં સૌથી વધુ અસર
પશ્ચિમ-મધ્ય કોલંબિયાના રિસારાલ્ડા વિસ્તારમાં ભૂકંપની અસર સૌથી વધુ જોવા મળી છે. રાજ્યના ગવર્નર જુઆન ડિએગો પાતિનોએ સ્થાનિક રેડિયો સાથેની વાતચીતમાં આ માહિતી આપી હતી. રાષ્ટ્રપતિએ તાત્કાલિક ઇમરજન્સી કમિટી બોલાવીને નુકસાનની સમીક્ષા અને રાહત કામગીરીનું સંકલન શરૂ કર્યું છે. તેમણે અસરગ્રસ્ત લોકોની સુરક્ષા માટે સરકાર જરૂરી તમામ પગલાં લેશે તેવી ખાતરી આપી છે.
ચોકો વિસ્તારમાં પણ ભારે નુકસાન
ઉત્તર-પશ્ચિમ કોલંબિયાના ચોકો વિભાગમાં પણ ભૂકંપની ભારે અસર જોવા મળી છે. ગવર્નર નુબિયા કેરોલિના કોર્ડોબા ક્યુરીના જણાવ્યા મુજબ, પ્રાદેશિક રાજધાની ક્વિબ્ડોમાં અનેક લોકો ઘાયલ થયા છે અને ઇમારતોને ગંભીર નુકસાન થયું છે. ભૂકંપ બાદ વધુ આફ્ટરશોક્સ આવવાની શક્યતાને ધ્યાનમાં રાખીને સ્થાનિક તંત્રને સાવચેત રહેવા જણાવાયું છે.
બોગોટા સુધી અનુભવાયા આંચકા
અમેરિકન જિયોલોજિકલ સર્વે (USGS) મુજબ, સ્થાનિક સમય પ્રમાણે સવારે લગભગ 7:34 વાગ્યે ભૂકંપ આવ્યો હતો. તેનું કેન્દ્ર કોલંબિયાના ચોકો વિસ્તારમાં આવેલા સાન જોસ ડેલ પાલમાર નજીક હતું, જે રાજધાની બોગોટાથી લગભગ 280 કિલોમીટર દૂર છે. ભૂકંપનું કેન્દ્ર જમીનની અંદર 107 કિલોમીટર ઊંડાઈએ હોવાનું જણાવાયું છે. લગભગ 5 લાખની વસ્તી ધરાવતું પેરેઇરા શહેર પણ ભૂકંપના કેન્દ્રથી 64 કિલોમીટરથી ઓછા અંતરે આવેલું છે. બોગોટામાં પણ આંચકા અનુભવાયા હતા. કેટલીક ઇમારતોમાં એલાર્મ વાગતાં લોકો સાવચેતીના ભાગરૂપે બહાર નીકળી ગયા હતા.
બોગોટાના મેયર કાર્લોસ એફ. ગાલાને અસરગ્રસ્ત વિસ્તારો માટે જરૂરી સામગ્રી એકત્ર કરવા શહેરમાં 6 કલેક્શન પોઇન્ટ શરૂ કરવાની જાહેરાત કરી છે. મેયરે જણાવ્યું કે બોગોટામાં અત્યાર સુધી ગંભીર નુકસાનના અહેવાલ મળ્યા નથી. જોકે, રાષ્ટ્રીય સરકાર સાથે સંકલન કરીને બોગોટાથી 100 બચાવકર્મીઓને સૌથી વધુ અસરગ્રસ્ત શહેરોમાં મોકલવાની તૈયારી કરવામાં આવી છે.
ભૂકંપ બાદ કોલંબિયામાં બચાવ અને રાહત કામગીરીને પ્રાથમિકતા આપવામાં આવી છે. અસરગ્રસ્ત વિસ્તારોમાં ધરાશાયી થયેલી ઇમારતોમાંથી લોકોને બહાર કાઢવા તેમજ ઘાયલોને સારવાર પહોંચાડવાની કામગીરી ચાલી રહી છે. સરકારનું ધ્યાન હાલ જાનહાનિનો આંકડો વધે નહીં અને નુકસાનગ્રસ્ત વિસ્તારોમાં ઝડપથી મદદ પહોંચે તેના પર છે. બીજી તરફ, સંભવિત આફ્ટરશોક્સને લઈને પણ તંત્ર સતર્ક છે.
