ઇન્ડિયન પ્રીમિયર લીગ (આઇપીએલ)માં આવતીકાલે અહીં દિલ્હી કેપિટલ્સ અને રોયલ ચેલેન્જર્સ બેંગ્લોર વચ્ચે બરોબરીનો જંગ ખેલાશે. આરસીબી ચેન્નાઇ સુપર કિંગ્સ સામેના પોતાના છેલ્લી મેચના પરાજયને ભુલીને જીતના માર્ગે પરત ફરવાના ઇરાદાથી મેદાનમાં ઉતરશે, જ્યારે દિલ્હી કેપિટલ્સે પોતાની છેલ્લી મેચમાં સનરાઇઝર્સ હૈદરાબાદને સુપર ઓવરમાં હરાવ્યું હતું અને તેઓ પોતાની જીતની લયને જાળવી રાખવા માગશે.
દિલ્હી કેપિટલ્સ સામે આરસીબીએ પોતાની મિડલ ઓવરોની નબળાઇઓને દૂર કરવી પડશે. આરસીબીને દેવદત્ત પડ્ડીકલ અને વિરાટ કોહલી સારી શરૂઆત તો અપાવે છે પણ તેમને મિડલ ઓર્ડર પાસેથી છેલ્લી મેચમાં સહકાર મળ્યો નહોતો. મેક્સવેલે અત્યાર સુધી સારું પ્રદર્શન કર્યું છે અને તેણે ડિવિલિયર્સ સાથે મળીને મિડલ ઓર્ડરમાં ટીમની સ્થિતિ સંભાળવી પડશે.
હર્ષલ પટેલ સીએસકે સામેની મેચમાં છેલ્લી ઓવરમાં થયેલી ધોલાઇ ભુલવી પડશે, જ્યારે મહંમદ સિરાજ અને કાઇલ જેમિસને પોતાનું પ્રદર્શન વધુ બહેતર બનાવવું પડશે. આરસીબી નવદીપ સૈની અથવા તો ડેન ક્રિશ્ચીયનના સ્થાને સ્પિનર શાહબાઝ અહેમદને ઉતારી શકે છે. દિલ્હી વતી તેના ઓપનર શિખર ધવન અને પૃથ્વી શો પોતાના ફોર્મને જાળવી રાખવા માગશે. કેપ્ટન ઋષભ પંત અને સ્ટીવ સ્મિથ પર સૂત્રધારની ભૂમિકા ભજવવાની જવાબદારી વહન કરવાની શક્તિ છે.
