કોંગ્રેસના નેતા અને લોકસભામાં વિરોધ પક્ષના નેતા રાહુલ ગાંધીને બેવડી નાગરિકતાના મુદ્દા અંગે વધતી મુશ્કેલીઓનો સામનો કરવો પડી શકે છે. અલ્હાબાદ હાઈકોર્ટની લખનૌ બેન્ચે રાહુલ ગાંધી સામે તપાસનો આદેશ આપ્યો છે જેના પગલે તેમની સામે ઔપચારિક કેસ નોંધાઈ શકે છે. શુક્રવારે અલ્હાબાદ હાઈકોર્ટની લખનૌ બેન્ચે આ આદેશ જારી કર્યો હતો. વધુમાં કોર્ટે ઉત્તર પ્રદેશ સરકારને આદેશ આપ્યો હતો કે કાં તો તપાસ પોતે કરે અથવા આ મામલો તપાસ માટે કેન્દ્રીય એજન્સીને સોંપે.
રાહુલ મુશ્કેલીમાં
ટ્રાયલ કોર્ટના ચુકાદાને રદ કરતા અલ્હાબાદ હાઈકોર્ટની લખનૌ બેન્ચે સ્પષ્ટ નિર્દેશો જારી કર્યા કે આ મામલે FIR નોંધવામાં આવે અને તપાસ આગળ વધે. સુનાવણી દરમિયાન બંને પક્ષોએ કોર્ટ સમક્ષ પોતપોતાની દલીલો રજૂ કરી. લાંબી ચર્ચા બાદ કોર્ટે સ્પષ્ટ કર્યું કે તપાસ જરૂરી છે. કોર્ટે કહ્યું, “લોકસભામાં વિરોધ પક્ષના નેતા રાહુલ ગાંધી બેવડી નાગરિકતા ધરાવે છે તેવા આરોપોની તપાસ જરૂરી છે.”
આ સમગ્ર મામલો કર્ણાટકના ભાજપ નેતા વિગ્નેશ શિશિર દ્વારા દાખલ કરાયેલી અરજીમાંથી ઉદ્ભવ્યો હતો. શિશિરે આરોપ લગાવ્યો હતો કે રાહુલ ગાંધી ભારત ઉપરાંત યુનાઇટેડ કિંગડમની નાગરિકતા ધરાવે છે. આ આધારે તેમણે રાયબરેલીમાં FIR નોંધવાની માંગ કરી હતી.
સંપૂર્ણ કેસ શું છે?
આ અરજીમાં ભારતીય ન્યાય સંહિતા (ભારતીય દંડ સંહિતા) ની વિવિધ કલમો તેમજ સત્તાવાર ગુપ્તતા અધિનિયમ, પાસપોર્ટ અધિનિયમ અને વિદેશી અધિનિયમ હેઠળ કેસ નોંધવાની માંગ કરવામાં આવી હતી. વધુમાં એવો આરોપ મૂકવામાં આવ્યો હતો કે સંસદ સભ્ય તરીકે સેવા આપતી વખતે બે પાસપોર્ટ રાખવાથી કાયદાનું ઉલ્લંઘન થઈ શકે છે. જોકે અગાઉ રાયબરેલીની MP-MLA કોર્ટે આ અરજી ફગાવી દીધી હતી. હાઈકોર્ટે હવે તે નિર્ણયને રદ કર્યો છે જેનાથી કેસને નવી દિશા મળી છે.
